අභාවප්‍රාප්ත ආචාර්ය ඒ.ටී. ආරියරත්නයෝ අද මෙලොව හැර යති. අවිහිංසාවාදයේ ප්‍රතිමූර්තියක් බඳු ශ්‍රීමත් ආරියරත්න මැතිඳුන් මෙත්තා, මුදිතා, කරුණා, උපේක්ඛා යන සිව් බඹ විහරණ අනුව තම දිවි මග සරිකරමින් ලෝකයට ලබාදුන් ආදර්ශය අතිමහත්ය. අවිහිංසාවාදය මගින් භාරතය අවදි කළ මහත්මා ගාන්ධිගේ චරිතය ශ්‍රී ලංකාවේ ජීවමාන කළ චරිතය අන් කවරකු හෝ නොව, ඒ.ටී. ආරියරත්නයෝමය. නිරන්තරයෙන් ශ්වේත වර්ණය ප්‍රිය කළ එතුමා ජාතික ඇඳුමට ලබා දිය හැකි උපරිම ගෞරවය ලබාදුන්නේ එය ඇඳ- පැළඳ සිටීමෙන් පමණක් නොව, ඔහුගේ නිවුණු, පහත් ස්වරයෙන් යුත් ආමන්ත්‍රණය තුළින් හා මෛත්‍රීය උපදවන කතාබහ තුළිනි. නිරන්තරයෙන් සිල්වත් භික්ෂූන් ඇසුරු කළ හෙතෙම සැබෑ බෞද්ධ චරිතය කවරකු ද යන්න ලොවට පසක් කළේය. ආචාර්ය ඒ.ටී. ආරියරත්න මහතා වඩා ප්‍රකට වන්නේ ඔහු විසින් නිර්මාණය කරන ලද “සර්වෝදය” ශ්‍රමදාන ව්‍යාපාරය නිසාය. 1958 දී ආරම්භ කරන ලද මෙම ව්‍යාපාරය ශ්‍රී ලංකාවේ විශාලතම සහ පුළුල්ම ප්‍රජා සංවර්ධන රාජ්‍ය නොවන සංවිධාන ව්‍යුහය ලෙස නමක් දිනාගත්තේ ශ්‍රී ලංකාවේ බොහෝ දෙනකු රාජ්‍ය නොවන ව්‍යාපාර පිළිබඳව හසරක් නොදන්නා කාලයේදී ය. රටේ තරුණ ජනගහනය යොදා...