මාලිගාවත්ත පාතාලය හෙල්ලු "ෆාජි"

අපරාධකරුවෝ කිසි දිනෙක වීරයෝ නොවෙති. ඔවුහු සිය ප්‍රචණ්‌ඩත්වයෙන් හා සාහසිකත්වයෙන් සමාජයම කළඹවන්නෝය. අවිගත් සාහසිකත්වය සමඟ ගැටුමකට නොගියත් සමාජය අපරාධකරුවන් දකින්නේ පිළිලයක්‌ ලෙසිනි. මේ ලිපි පෙළ එවන් බිහිසුණු අපරාධකරුවන් ලුහුබැඳ ගිය පොලීසියේ ධෛර්ය හා වික්‍රමාන්විත මෙහෙයුම් පිළිබඳ සත්‍ය කතාවයි. නීතියට හා යුක්‌තියට උඩින් පියඹා යන කවරකුගේ වූවද ඉරණම යහපත් එකක්‌ නොවේ.

ඒ පසුගියදා නිමාවට පත්වු බස්‌නාහිර පළාත් සභා මැතිවරණ සමයේ එක්‌තරා දිනයකි. පළාත් සභාවට කොළඹින් තරග කළ මුස්‌ලිම් දේශපාලනඥයකු පිළිගැනීමේ උත්සවයක්‌ මාලිගාවත්ත ප්‍රදේශයේ සූදානම් කර තිබිණි.

මාලිගාවත්තේ පදිංචි සෑහෙන පිරිසක්‌ මේ පිළිගැනීමේ උත්සවයට රැස්‌ව සිටියහ. උත්සවයේ සංවිධාන කටයුතු කෙරුණේ මාලිගාවත්තේ පාතාල සාමාජිකයන් විසින්ය.

මැතිවරණය සඳහා ඉදිරිපත්ව සිටි මුස්‌ලිම් දේශපාලනඥයා පෙරහැරකින් උත්සව භූමියට කැඳවාගෙන එනු ලැබීය. දේශපාලනඥයා සමඟ පෙරහැරේ ඉදිරියෙන්ම ගමන් කළේ මාලිගාවත්ත මුස්‌ලිම් පාතාලයේ මහා කෙරුම්කාරයකු වූ "ෆාජි" සහ ඔහුගේ සොහොයුරා වූ "බයියා" ය.

දේශපාලනඥයා පිළිගැනීමට රැස්‌ව සිටි ආධාරකරුවන් සිය කාරිය පසෙක තබා "ෆාජි" සහ බයියා වෙත මල්මාලා පලන්දවමින් ඔවුන් පිළිගන්නට වුහ. මේ සිද්ධියෙන් මුස්‌ලිම් දේශපාලනඥයා අන්දමන්ද වූයේය. එහෙත් ඔහුට කිසිවක්‌ කිරීමට ඉඩක්‌ තිබුණේ නැත.

ආධාරකරුවන් "ෆාජි" සහ "බයියා" වෙත පැළැන්දුවේ නිකම්ම නිකන් මල්මාලා නොවේ. රුපියල් දහසේ නෝට්‌ටුවලින් සකස්‌ කළ මල්මාලා සහ පලතුරුවලින් සකස්‌ කළ විශේෂ මල්මාලාය.

බස්‌නාහිර පළාත් සභා මැතිවරණයට පෙර "ෆාජි" සිටියේ වැලිකඩ බන්ධනාගාරයේය. මැතිවරණය සඳහා කොළඹින් තරග කළ මුස්‌ලිම් ජාතික දේශපාලනඥයා ෆාජිගේ ගජ මිතුරෙකි. මැතිවරණය ජයග්‍රහණය කිරීම සඳහා මොහු නොකළ දෙයක්‌ නැත.

සිය ප්‍රචාරක කටයුතු සාර්ථකව කරගෙන යැමට පාතාලයේ සහාය ලබා ගැනීමට දේශපාලනඥයාට අවශ්‍ය විය.

ඔහු මාලිගාවත්තට ගොස්‌ ෆාජිගේ සොහොයුරාවූ බයියා මුණ ගැසුනේය.

මම මේ පාර ඉලෙක්‌ෂන් එක කොහොමහරි දිනන්න ඕනෙ. උඹලගෙ සපෝර්ට්‌ එක ඕනෙ. මම ෆාජිව එලියට අරගෙන දෙන්නම්. මට සපෝර්ට්‌ කරපල්ලා.

දේශපාලනඥයාගේ යෝජනාවට බයියා ඇතුළු සගයන් එකඟවූහ. දින කීපයක්‌ ඇතුල ෆාජි සහ තවත් පාතාල ගෝලබාලයන් කීපදෙනෙකු ඇපමත මුදාගැනීමට මුස්‌ලිම් දේශපාලනඥයාට හැකි විය.

ෂේක්‌ පරීඩ් මොහොමඩ් ෆාසීල් නොහොත් ෆාජි කොළඹ පාතාලයේ මුල් සාමාජිකයෙකි. මාලිගාවත්ත මුස්‌ලිම් පාතාලය බිහිවුයේ 90 දශකය මුල් කාලසීමාවේදීය. ඒ වකවානුව වනවිට කොළඹ පාතාලයේ රජකරගෙන සිටියේ සුදාකරන්ගේ නායකත්වයෙන් යුත් දෙමළ පාතාල කල්ලියයි. ක්‍රිස්‌ටෝපර්, වෙලේසුදා, තෙල්බාලා, ඇතුළු පාතාල ප්‍රබලයන් රැසකගෙන් සමන්විත වූ දෙමළ පාතාලය එකල ඉතා බලසම්පන්න විය. සුදාකරන්ගේ නියෝගවලට පිටින් ගිය කිසිවකුටත් ජීවත්වීමට ඉඩක්‌ ලැබුණේ නැත.

දෙමළ පාතාලයේ අණසකට යටවී දැඩි ලෙස පීඩා විඳිමින් සිටි මුස්‌ලිම් ජාතිකයන් ඊට පිළියම් සොයාගන්නට වූහ. මාලිගාවත්තේ මුස්‌ලිම් ජාතිකයන් සමඟ එක්‌තරා මුස්‌ලිම් නාගරික මන්ත්‍රීවරයෙකු සිටියේය. ඔහු නමින් ඉමිටියාස්‌ විය.

දෙමළ පාතාලයට එරෙහිවීමට මුස්‌ලිම් තරුණයන් පිරිසක්‌ සන්නද්ධ වන්නට පටන් ගත්තේ මේ කාලසීමාවේදීය. ඊට ආධාර අනුබල දුන්නේ ඉමිටියාස්‌ මන්ත්‍රීවරයාය. ඉතාම කෙටිකාලයකදී මාලිගාවත්තේ මුස්‌ලිම් කණ්‌ඩායම සීඝ්‍ර ප්‍රගතියක්‌ ලබාගත්තේය. මාලිගාවත්ත මුස්‌ලිම් පාතාල කල්ලියට නායකත්වය දුන්නේ කුඩුනූර්ය. නූර්ගේ කිට්‌ටුවන්තම සගයා වූයේ ෆාජිය. එවකට මාලිගාවත්ත මුස්‌ලිම් පාතාලයේ සිටි ප්‍රබලයන් අතර අයුබ් ඛාන්, මාස්‌ටර් ඉමිටියාස්‌, ඉන්ටිකාබ්, ලීමෝලවත්තේ රිස්‌වාන්, අම්බට්‌ටා ෆසාල්, මලබාර් රිල්වාන්, බයියා, නවුෂාඩ්, මංජල් අක්‍රම්, ඩොන්, සිරාස්‌, පප්පා, ආනමාලු ඉමිටියාස්‌, දිගා ෆයිසර්, රාජාබ්දීන්, ඔජීර්, එලී, ටෝජි, අච්චා, නවුසර් ෆවුම් ඉදිරියෙන්ම සිටියහ.

දේශපාලනඥයන්ගේ සහ ඇතැම් උසස්‌ පොලිස්‌ නිලධාරීන්ගේ ආධාර අනුබලදීම් මත දිනෙන් දින වර්දනය වූ මාලිගාවත්ත පාතාල කල්ලිය අන්තිමේදී කොළඹ ප්‍රධාන පෙලේ පාතාල කල්ලිය බවට පත්විය.

කොළඹ කිරුලු පැළඳ සිටි දෙමළ පාතාල කල්ලිය සුනුවිසුනු කර දැමූ කුඩුනූර් ප්‍රමුඛ මුස්‌ලිම් පාතාලය කොළඹ පාතාල කිරුළ දිනා ගත්තේය.

කුඩුනූර්ගේ නායකත්වයෙන් යුත් මුස්‌ලිම් පාතාල කල්ලියේ ප්‍රධාන ආදායම් මාර්ගය වූයේ මත්කුඩු ජාවාරමයි. කුලියට මිනීමැරීම ඇතුළු තවත් ජාවාරම්වලින් මොවුන් ඉතාම කෙටිකාලයක්‌ තුළදී මහා ධනවතුන් බවට පත්වුහ.

එහෙත් පසු කාලයකදී මුස්‌ලිම් පාතාලය දෙදරායන්නට විය. ඊට ප්‍රධානම හේතුව වූයේ කප්පම් ලබාගැනීමය. කොළඹ ව්‍යාපාරිකයන්ගෙන් කප්පම් ලබා ගැනීම කුඩුනූර් තදින්ම ප්‍රතික්‍ෂේප කළේය.

එහෙත් අයුබ්ඛාන්, ලීමෝල වත්තේ රිස්‌වාන්, ආනමාලූ ඉමිටියාස්‌ දිගා ෆයිසර් ඇතුළු කල්ලියක්‌ කුඩු නූර්ගේ නායකත්වයෙන් යුත් පාතාල කල්ලිය අතහැර දැමූහ.

අයුබ්ඛාන්ගේ නායකත්වයෙන් යුත් අලුත් පාතාල කල්ලියක්‌ බිහිවූයේ එතැන් සිටය. කුඩුනූර්ගේ කල්ලියේ ප්‍රබලම සාමාජිකයා බවට පත්ව සිටියේ. ෆාජිගේ සොහොයුරා වූ බයියාද කුඩුනූර් සමග සිටියේය. දෙකඩවූ මුස්‌ලිම් පාතාලය දීර්ඝ කාලයක්‌ තිස්‌සේ එකිනෙකා මරා ගනිමින් පාතාල ආධිපත්‍යය තමන් වෙත ලබා ගැනීමට දැඩි උත්සාහයක නිරත වූහ. එහි ප්‍රතිඵලය වූයේ මාලිගාවත්ත මුස්‌ලිම් සාමාජිකයන් විශාල පිරිසක්‌ ජීවිතක්‍ෂයට පත්වීමය.

පසුකාලයක මාලිගාවත්ත මුස්‌ලිම් පාතාලයේ කෙරුම්කාරයා බවට පත්ව සිටියේ ෆාජිය. තම සහෝදරයා වූ බයියා ද ළඟින් සිටීම ෆාජිට විශාල ශක්‌තියක්‌ විය.

මත්කුඩු ජාවාරම කප්පම් ලබා ගැනීම, කොන්ත්‍රාත් ක්‍රමයට මිනීමැරීම කොල්ලකෑම්, අවිආයුධ විකිණීම ඇතුළු ජාවාරම් රැසකින් ෆාජිගේ කල්ලියට විශාල ධනස්‌කන්ධයක්‌ ගලා ආවේය.

තේ ව්‍යාපාරිකයකු ලබාදුන් කොන්ත්‍රාත්තුවක්‌ මත තේ පරීක්‍ෂකවරුන් දෙදෙනකුට වෙඩිතබා එක්‌ අයකු මරා දමා අනෙකා සදාකාලික අබ්බගාතයකු කිරීමේ සිද්ධිය ෆාජිගේ අපරාධ ලෝකයේ එක්‌ දරුණු ක්‍රියාවක්‌ විය.

මොහොමඩ් අමීන් ෆාජිගේ කිට්‌ටුවන්තම මිතුරෙකි. අමීන්ට ගම්පොල ප්‍රදේශයේ තේ කර්මාන්ත ශාලා කීපයක්‌ තිබිණි. කසල තේ රහස්‌ මාර්ගවලින් අපනයනය කිරීම අමීන්ගේ ප්‍රධානම ආදායම් මාර්ගය විය.

තේ පරීක්‍ෂකවරුන්ට අල්ලස්‌ ලබා දෙමින් මොහු සිය ජාවාරම දීර්ඝකාලයක්‌ තිස්‌සේ කරගෙන ගියේය. එහෙත් ඔහුගේ ව්‍යාපාරයට හෙනහුරා පාත්වූයේ තේ පරීක්‍ෂකවරුන් දෙදෙනකු ලෙස අලුත පත්වී ආ බෝධිදාස සහ කරුණාරත්න යන මහත්වරුන්ගේ ක්‍රියා කලාපය නිසාය.

ඉතාම නීති ගරුක නිලධාරීන් දෙදෙනකු වූ මොවුන් නිසා අමීන්ට සිය ජාවාරම් කරගෙන යැමට නොහැකි තත්ත්වයක්‌ උදාවිය.

අන්තිමේදී අමීන් සිය මිතුරා වූ ෆාජිගේ සහාය ලබාගත්තේය. තම ව්‍යාපාරවලට එරෙහිව සිටි නීතිගරුක නිලධාරීන් දෙදෙනා පරලොව යෑවීමේ කාර්යය ෆාජි වෙත භාරදීමට අමීන් කටයුතු කළේය.

ෆාජි සිය ගෝලබාලයන් යොදවා බෝධිදාස මහතා නාවලදී මරාදැමූ අතර මරදාන එල්ෆින්ස්‌ටන් රඟහල ඉදිරිපිටදී කරුණාරත්න මහතාටද වෙඩි තැබුවේය.

එහෙත් ඒ වෙඩි ප්‍රහාරවලින් කරුණාරත්න මහතා මරාදැමීමට නොහැකි වුවද ඔහු සදාකාලික අබ්බගාතයකු විය. සිය ඉල්ලීම නොපිරිහෙලා ඉටුකිරීම නිසා උද්දාමයට පත්වූ අමීන් ෆාජිට නවීනපන්නයේ පැජරෝ ජීප් රථයක්‌ තෑගි කළේය.

පසුකලකදී නාඳුනන සන්නද්ධ කණ්‌ඩායමක්‌ අමීන් ඇතුළු තිදෙනෙකු පැහැරගෙන ගොස්‌ කොළඹ කුරුඳුවත්ත ප්‍රදේශයේදී වෙඩිතබා ඝාතනය කර තිබිණි.

ෆාජිගේ කසාද බිරිඳ අනියම් ප්‍රේම සම්බන්ධතාවක්‌ හොර රහසේම පවත්වාගෙන ගියාය. ඒ වෙන කවරයකු සමඟ නොව ෆාජිගේ කල්ලියේම සිටි අච්චා නමැත්තා සමඟය. ෆාජිගෙන් කිසිම දිනක සමාවක්‌ නොලැබෙන බව දැන සිටි අච්චා සිය අනියම් බිරියද සමඟ නුවරඑළියට පලා ගියේය.

මේ සිද්ධියෙන් ෆාජි දැඩිලෙස කෝපයට පත් වූයේය. සිය සගයන් ගෙන්වා වහාම අච්චා සොයාගෙන එන ලෙස ඔවුන්ට නියෝග කළේය.

මම ඕකුන් දෙන්නව ඉතුරු කරන්නේ නැහැ. ෆාජිගෙ හැටි උන් දන්නේ නැහැ"

එවකට ෆාජි සමඟ එකට සිටි ආනමාලු ඉමිටියාස්‌, මාස්‌ටර් ඉමිටියාස්‌ ඇතුළු පිරිස නුවරඑළියට ගොස්‌ අච්චා සහ ෆාජිගේ බිරිඳ රැගෙන ආහ.

අච්චාටත් සිය බිරිඳටත් දසවදදී මරාදැමීමට ෆාජි මුලින් සිතා සිටියද පසුව ඒ තීරණය වෙනස්‌ කළේය. සිය බිරිඳ කෙරෙහි අනුකම්පාවෙන් සිටි ෆාජි ඇයට අභය දානය දුන්නේය. එහෙත් අච්චාට කිසිදු සමාවක්‌ ලැබුනේ නැත. අච්චා වෙඩි තබා ඝාතනය කිරීමට ෆාජි වගබලාගත්තේය.

මිනීමැරුම් කොල්ලකෑම් ඇතුළු අපරාධ රැසක්‌, සම්බන්ධයෙන් අත්අඩංගුවට පත්වු ෆාජිට වැලිකඩ බන්ධනාගාරය වෙත යැමට සිදුවිය. ඒවනවිට මාලිගාවත්තේ අනසක පතුරුවාගෙන සිටියේ ආනමාලු ඉමිටියාස්‌ය. ෆාජිගේ කල්ලියෙන් වෙන්වී පාතාල කල්ලියක්‌ බිහිකරගෙන සිටි ආනමාලු ඉමිටියාස්‌ මාලිගාවත්තේ බලය සියතට ගෙන සිටියේය.

ෆාජිගේ කල්ලියත් ආනමාලූ ඉමිටියාස්‌ගේ කල්ලියත් අතර ගැටුම් ඇතිවන්නට පටන් ගත්තේය. බයියාට ඉමිටියාස්‌ සමඟ තනිවම සටන් කිරීමට ශක්‌තියක්‌ තිබුණේ නැත.

බස්‌නාහිර පළාත් සභා මැතිවරණයට වැඩ කිරීමට ෆාජි මාලිගාවත්තට පැමිණියේ ඔය අතරතුරදීය. ෆාජිගේ පැමිණීම බයියාට මෙන්ම අනෙක්‌ පාතාල සහචරයන්ටද මහා අස්‌වැසිල්ලක්‌ වූහ.

ආනමාලු ඉමිටියාස්‌ ෆාජි මරාදැමීමට දැඩි උත්සාහයක නිරතව සිටියේය. එහෙත් මාලිගාවත්තේ පිහිටි ෆාජිගේ බලකොටුවට කඩාවැදී ප්‍රහාර එල්ල කිරීම ලෙහෙසි පහසු කටයුත්තක්‌ නොවීය.

දිනක්‌ ආනමාලු ඉමිටියාස්‌ මාලිගාවත්ත ජුම්මා පල්ලිය අසලදී ෆාජිට ප්‍රහාරයක්‌ එල්ල කළේය. ජිහාඩ් සංවිධානයේ සහචරයන් පිරිසක්‌ද මේ ප්‍රහාරය සඳහා ඉමිටියාස්‌ සමඟ පැමිණ සිටියහ. එදින ෆාජි දිවිගලවා ගත්තේ අනුනවයෙන්ය.

තම හිතවත් මුස්‌ලිම් දේශපාලනඥයාට සහායදීමට පැමිණ සිටි ෆාජි වෙත විශාල වැඩකොටසක්‌ පැවරී තිබිණි.

ෆාජි උඹ කොහොම හරි මාව දිනවලා දීපන් මම හැම දෙයක්‌ම බලා ගන්නම් පළාත් සභාවට යනවා කියන්නේ ලොකු ඉල්ලමක්‌ පෑදුනා වගේ වැඩක්‌.

මුස්‌ලිම් දේශපාලනඥයා ෆාජි ඉදිරියේ බැගෑපත් වූයේය. බන්ධනාගාරයෙන් නිදහස ලබා ආ ෆාජි මාලිගාවත්තේ පිහිටි සිය සොහොයුරාවු බයියාගේ නිවස වෙත ගියේය.

මේ වෙලාව අපිට සල්ලි ටිකක්‌ එකතු කරගන්න හොඳ වෙලාව. කොළඹ ඉන්න මුස්‌ලිම් බිස්‌නස්‌ කාරයන්ගේ නම් ලිස්‌ට්‌ එකක්‌ හදලා උන්ට දැනුම් දියං මාව හම්බවෙන්න එන්න කියාල.

ෆාජි සිය සමීපතම ගෝලයකු වු ටෝජිට කීවේය. ෆාජිගේ උපදෙස්‌ මත පිටකොටුව මාලිගාවත්ත, කෙසෙල්වත්ත, මරදාන කොටහේන, ග්‍රෑන්ඩ්පාස්‌ ඇතුළු ප්‍රදේශ රැසක මහාපරිමාණයෙන් ව්‍යාපාර කරන මුස්‌ලිම් ජාතිකයන් 170 දෙනෙකුගේ ලැයිස්‌තුවක්‌ සකස්‌ කිරීමට ටෝජිට හැකිවිය.

මේ හැම එකෙක්‌ම මට වෙන වෙනම හම්බවෙන්න ඕනේ. දවසට දහදෙනා ගානේ මුන්ව බයියාගේ ගෙදරදි මට මුණ ගස්‌සවන්න ඕනේ.

ෆාජි සිය ගෝලබාලයන්ට උපදෙස්‌ දුන්නේය. මාලිගාවත්ත මුස්‌ලිම් පාතාලයේ අණ ක්‍රියාත්මක වන්නට විය ලැයිස්‌තුවේ නම් සඳහන් මුස්‌ලිම් ව්‍යාපාරිකයන් වෙත පණිවිඩ යෑවූ ටෝජි ඔවුන්ට ෆාජිව හමුවීම සඳහා දිනයක්‌ද ලබා ගත්තේය.

ෆාජි කිසිම අණක්‌ ගුණක්‌ නැති තිරිසනකු බව දැන සිටි මුස්‌ලිම් ව්‍යාපාරිකයන් ඔහුගේ නියෝගයන්ට අවනත වූහ.

ව්‍යාපාරිකයන්ට ෆාජි හමුවීමට සුදානම් කර තිබුණේ බයියාට අයත් සුවිසල් නිවසක කාමරයකය. ඒ කාමරය පුරා ස්‌වයංක්‍රීය අවි ආයුධවලින් සන්නද්ධව සිටි කීපදෙනෙකු රඳවා තැබීමට ෆාජි කටයුතු කළේය. ඒ ව්‍යාපාරිකයන් බිය වැද්දීම සඳහාය.

ෆාජි ඉඳගෙන සිටි අසුන අසල වූ මේසයේ මිලිමීටර් 9 වර්ගයේ පිස්‌තෝලයකි. ෆාජි හමුවීමට දින නියමවී තිබු ව්‍යාපාරිකයන් නොවරදවාම තමන්ට වෙන්වූ දිනයේ බයියාගේ නිවසට පැමිණ සිටියහ.

වරකට ෆාජි හමුවීමට ලැබුණේ එක්‌ ව්‍යාපාරිකයෙකුට පමණි. ඔහුද ෆාජි හමුවීමට ගියේ ෆාජිගේ කිට්‌ටුවන්තයකු සමඟය. ෆාජි මුස්‌ලිම් ව්‍යාපාරිකයන් සමඟ කථා කළේ පිස්‌තෝලය සිය දකුණු අතට ගෙන එය කරකවමින්ය.

මේ පළාත් සභා ඡන්දෙදි අපේ හිතවතෙක්‌ ඡන්දෙ ඉල්ලනවා. අපි මිනිහාට උදව් කරන්න ඕනෙ. මුදලාලි අපට හැමදාම උදව් කරනවනෙ. මේ වෙලාවෙ අපිට ලොකු සහයෝගයක්‌ දෙන්න ඕන.

ෆාජි මේසය මත වු පිස්‌තෝලය ව්‍යාපාරිකයා දෙසට එල්ල කරමින් කීවේය. ඒ වන විට ව්‍යාපාරිකයා දැඩි අපහසුතාවටත් භීතියටත් පත්ව සිටියේය.

ඉල්ලන ඕනේම ගානක්‌ දෙන්නම් අපිට කරදර කරන්න එපා.

ව්‍යාපාරිකයා ෆාජි ඉදිරියේ බැගෑපත් වූයේය.

රුපියල් ලක්‍ෂ 5 ක කප්පමක්‌ දීමට ආ ව්‍යාපාරිකයාට අවසානයේදී සිදුවූයේ රුපියල් ලක්‍ෂ තිහ හතලියක මුදලක්‌ කප්පම් වZශයෙන් ලබාදීමටය.

ඒ ආකාරයට ෆාජි ඇතුළු කල්ලිය කොළඹ ව්‍යාපාරිකයන් 170 වකට අධික පිරිසකගෙන් අතිවිශාල වූ මුදලක්‌ කප්පම් වශයෙන් ලබා ගත්හ.

ඒ ලබාගත් අතිවිශාල ධනස්‌කන්ධය වියදම් කරමින් ෆාජි ඇතුළු කල්ලිය ඉතාම සුපිරි ජීවිතයක්‌ ගත කළහ. මැතිවරණයට තරගකරන මුස්‌ලිම් දේශපාලනඥයාගේද සහාය ඇතිව මාලිගාවත්ත නගර මධ්‍යයේ ජනාධිපතිතුමන්ගේ ඡායාරූපය සහිත අතිවිශාල පුවරුවක්‌ ඉදිකිරීමටද ෆාජි ඇතුළු කල්ලිය කටයුතු කළහ.

ඒ පුවරුව ඔවුන් ඉදිකළේ තමන් රජය සමඟ සම්බන්ධතා පවත්වන බවට ජනතාවට ඒත්තු ගැන්වීමටය. එහෙත් ෆාජිට පව්සමාකර ගැනීමට හැකිවූයේ නැත.

ෆාජිගේ බිරිඳ වූයේ චූටිය. ඇයට මාලිගාවත්තේ ජනතාව කීවේ කුඩු චූටි කියාය. ෆාජි බන්ධනාගාර ගතව සිටි කාල සීමාවේදී චූටි ගැන නොයෙකුත් කතන්දර අසන්නට ලැබී තිබිණි. එහෙත් ෆාජි ඒ කිසිවක්‌ ගණනකට ගත්තේ නැත.

ෆාජි අයියා චූටි මාලිගාවත්තේ එකෙක්‌ එක්‌ක සෙට්‌වෙලා. ජලක්‌ඩීන් තමයි කපුකම කරලා තියෙන්නේ.

දන්නා හඳුනන කීපදෙනෙකුම ෆාජිට මේ බව කීය. අවසානයේදී ෆාජිට මේ හුටපටය අතටම හසු වූවේය. එහෙත් එවර ෆාජිට තම බිරිඳවු චූටි බේරා ගැනීමට හැකිවුණේ නැත.

චූටි සිය අලුත් පෙම්වතා සමඟ ඉන්දියාවට පලා ගියේ මෙවර ෆාජිගෙන් කිසිම සමාවක්‌ නොලැබෙන බව හොදා කාරවම දැන සිටි නිසාය.

මෙම සිද්ධියෙන් ෆාජි දැඩි ලෙස කෝපාවිෂ්ඨව සිටියේය.

මේ හැම දේකටම මුල ජලක්‌ඩීන්. ඌ තමයි කපුකම කරලා තියෙන්නේ. චූටි විතරක්‌ නෙවෙයි බයියාගෙ ගෑනිටත් කොල්ලෙක්‌ සෙට්‌ කරලා.

මාලිගාවත්තේ සිටි කීපදෙනෙකු ෆාජිට මේ බව කීහ. ෆාජි සිය ගෝලබාලයන් කැඳෙව්වේය. මහා විනාශයක පෙරලකුණු පහල වෙමින් තිබිණි.

ජලක්‌ඩීන්ව හොයාගෙන වරෙල්ලා. මම ඕකව ඉතුරු කරන්නේ නැහැ.

ෆාජි කෝපයෙන් කෑගැසුවේය. ජලක්‌ඩීන් නපුංසක චරිතයක්‌ ඇති පුද්ගලයෙකු ලෙස කා අතරත් ප්‍රසිද්ධව සිටියේය. ඇතැම් උත්සව වලදී කාන්තාවන්ගේ චරිතයට පණපොවමින් ඔහු කොයි කව්රුත් රසවත් කළේය.

ෆාජිගේ ගෝලයන් ජලක්‌ඩීන්ව සොයාගත්හ. ඔහු වැඳවැටෙමින් සමාව අයෑද සිටියේය.

මේකව වෑන් එකක බැඳලා පාරදිගේ ඇදගෙන පලයල්ලා

ෆාජි සිය ගෝලබාලයන්ට අණ කළේය. වෑන් රථයක පිටුපස ගැටගැසූ ජලක්‌ඩීන් මාලිගාවත්තේ අතුරුමාර්ගයක්‌ දීගේ ඇදගෙන ගියේය. මේ මහා අපරාධය නතර කිරීමට කිසිවකුත් ඉදිරිපත් වූයේ නැත. ජලක්‌ඩීන් විලාපනගන්නට වූයේය. එහෙත් ඔහුගේ සහායට කිසිවකුත් පැමිණියේ නැත.

අන්තිමේදී ජලක්‌ඩීන් බයියාගේ නිවසේ වූ වධකාගාරයක්‌ වෙත ඇදගෙන ගියේය. එහිදී ඒ අහිංසකයාට මිහිපිට කිසිම පුද්ගලයෙකුට ලබාදිය නොහැකි තරම් වධහිංසා පමුණුවන්නට මේ නරුමයන් කටයුතු කළහ.

ජලක්‌ඩීන්ට අමානුෂික ලෙස පහරදුන් පාතාල සගයන් ඔහුගේ දෑත්වලට යකඩ ඇන ගැසූහ. යකඩ සිදුරු කරන යන්ත්‍රයකින් ජලක්‌ඩීන්ගේ සිරුර සිදුරුකරමින් ඔහුට දස වධ දුන්හ.

ඒ අහිංසකයාගේ ඥාතීන් මෙන්ම මාලිගාවත්තේ ජනතාවද මේ අපරාධය දෙස බලා සිටියහ. එහෙත් කිසිවකුත් ඊට එරෙහිවීමට පැමිණියේ නැත. ජලක්‌ඩීන්ගේ විලාපයෙන් මුළු මාලිගාවත්තම දෝන්කාර දුන්නේය.

ෆාජිගේ ගෝලබාලයන් ජලක්‌ඩීන්ගේ දෑත් දෙපා අමු අමුවේම කපා දැමුහ. අවසානයේදී ඔහු මියයැමට පෙර පෙට්‌ට්‍රල් දමා පුලුස්‌සා දැමීමට ෆාජි ඇතුළු ගෝලබාලයන් කටයුතු කළහ.

පැය කීපයකට පසු ජලක්‌ඩීන්ගේ සිරුරේ සුන්බුන් කොටස්‌ මාලිගාවත්තේ පාලු ඉඩමක වළදැමීමට ෆාජි ඇතුළු සගයන් කටයුතු කළහ.

අපිට විරුද්ධවෙන මොකාට වුණත් වෙන්නේ මේක තමයි.

ෆාජි මාලිගාවත්තේ ජනතාවට තර්ජනය කරළ්ය.

මේ ආකාරයට ෆාජි ඇතුළු පාතාල අපරාධකරුවන් සිදු කළ අපරාධ අතිවිශාලය. මේ නරුමයන්ට ඇති බිය නිසා ඒ කිසිවක්‌ හෙළි කිරීමට මාලිගාවත්තේ ජනතාව මැලි වුහ.

කාන්තාවන් ඇසුරටද ෆාජි දැක්‌වූයේ දැඩි ලොල් බවකි. තමන්ට හිත ගිය කාන්තාවක්‌ වෙතොත් කෙසේ හෝ ඇයගේ පහස ලබා ගැනීමට ෆාජි පසුබට වූයේ නැත.

මේ ආකාරයට කාන්තාවන් විශාල පිරිසක්‌ ෆාජිගේ අතවරයන්ට ලක්‌වූහ. තමන්ට හිතගිය කාන්තාව ගෙන්වා ගැනීමේ කාර්ය සිය ගෝලබාලයන් වෙත පවරන ෆාජි මාලිගාවත්තේ සුවිසල් නිවසකට වී තම සිතැගි කාන්තාව එන තුරු සිටියි.

ආයුධ සන්නද්ධව ඒ කාන්තාව සොයා යන ගෝල බාලයන් හොඳින් හෝ නරකින් ඒ කාන්තාව ෆාජි වෙත රැගෙන ආහ.

ෆාජි අයියාගෙ ගෙදර පොඩි වැඩක්‌ තියනවා. ඒක කරලා දීලා යන්න. එවැනි රැවටිලිබස්‌වලින්ද කාන්තාවන් රවටා ෆාජි වෙත රැගෙන යැමට ඔහුගේ ගෝලබාලයන් කටයුතු කළහ. තම කැමැත්තට ඉඩ නොදෙන කාන්තාවන්ට විවිධ අතවර හිරිහැරවලට ලක්‌වීමට සිදු වූහ. එවැනි සිද්ධීන් කිසිවක්‌ පොලිසියට වාර්තාවූයේ ද නැත. ෆාජි කිසිම හිතක්‌ පපුවක්‌ නැති තිරිසනකු බව මේ ක්‍රියාවලින් ලොවට හෙළි කළේය.

තරුණයකු සමග ඉන්දියාවට පලාගිය සිය බිරිඳගෙන් පලිගැනීමට ෆාජි යොදාගත්තේ තම ලෙයින් බිහිකළ දියණියයි. දහතුන් හැවිරිදි දියණියටද අතවර කළ මේ නරුමයා තම බිරිඳගෙන් පලිගත්තේය.

පාතාල මර්දන මෙහෙයුම් ආරම්භ කිරීමත් සමඟම මාලිගාවත්ත පාතාල බලකොටුවද හෙල්ලූම් කෑවේය. තම සගයන් එකා දෙන්නා පොලිස්‌ වෙඩිපහරින් මැරී වැටෙද්දී ෆාජි සහ බයියා ඉතාම රහසිගත ජීවිත ගත කිරීමට පුරුදු වූහ. උඹ ලංකාවේ ඉන්න එපා දැන් කාලේ එච්චර හොඳ නැහැ. ඒ නිසා රට පැනලා හිටපන්.

ෆාජි සිය සොහොයුරාවූ බයියාට යෝජනා කළේය. සිය සොහොයුරාගේ අණට කීකරු වූ බයියා හොර රහසේම විදෙස්‌ ගත වූයේය. ෆාජිද විදෙස්‌ ගත වූ බවට ප්‍රචාරයක්‌ යෑවීමට මාලිගාවත්ත පාතාල සගයන් කටයුතු කළහ.

ආනමාලු ඉමිටියාස්‌ගේ මරණයත් සමඟම ෆාජිගේ කප්පම් මුදල් ආදායම දෙගුණ තෙගුණවන්නට විය. හොර රහසේම කොළඹ නගරයේ සැරි සැරීමට ෆාජි උපායක්‌ යොදා ගත්තේය. මුස්‌ලිම් කාන්තාවන් මෙන් මුලු සිරුරම වැසීය හැකි කබායකින් සරසාගත් ෆාජි තමන්ට අවශ්‍ය ස්‌ථානවලට නිරුපද්‍රිතව ගියේය. ෆාජිගේ මේ ගමන් බිමන් ගැන කිසිවකුත් දැන සිටියේ නැත.

එහෙත් පොලිස්‌ විශේෂ කාර්යබලකායේ බුද්ධි අංශය කාලයක සිට ෆාජිගේ ගමන් බිමන් ගැන සොයමින් සිටියහ. තම පෞද්ගලික ඔත්තුකරුවන් යොදා ගනිමින් ෆාජිගේ හැසිරීම පිළිබඳව ඔවුන් තොරතුරු රැස්‌ කරන්නට වූහ.

මාලිගාවත්තේ නිවාස පිහිටා තිබෙන්නේ එකිනෙකට යාබදවය. ෆාජි ඇතුළු සගයන් සැඟවී සිටීමට වැඩිපුරම යොදා ගත්තේ තට්‌ටු නිවාසයක උඩුමහලය. පොලිසියෙන් හෝ ප්‍රතිවිරුද්ධ කල්ලියකින් පැමිණියහොත් වහලය මතින් දිවගොස්‌ බේරීයැමට ෆාජි ඇතුළු කල්ලියේ උපායමාර්ගය වූහ. විශේෂකාර්ය බලකායේ බුද්ධි අංශ මේ සියලූ තොරතුරු සොයාගත්තේය.

ෆාජි අත්අඩංගුවට ගැනීමේ මෙහෙයුම ඉතාම රහසිගතව සකස්‌ විය. පොලිසිය කිසි අවස්‌ථාවකදී ඒ සඳහා සම්බන්ධ කර නොගැනීමට ඔවුහු කටයුතු කළහ. ඊට හේතුවූයේ කිසියම් අවස්‌ථාවකදී මෙම මෙහෙයුම පිළිබඳව තොරතුර ෆාජි අතට පත්වූවොත් සියලු සැලසුම් ව්‍යර්ථ වීමය.

ෆාජිගේ ඔත්තුකරුවන් සියලු දෙනා මාලිගාවත්තට ඇතුළු වන ප්‍රධාන මාර්ගවල රඳවා සිටින බව විශේෂ කාර්යබලකාය සොයාගත්තේය. ප්‍රධාන මාර්ගවලින් මාලිගාවත්තට ඇතුළුවී ෆාජි අත්අඩංගුවට ගැනීම නිෂ්ඵල ක්‍රියාවක්‌ බව විශේෂ කාර්යබලකාය දැන සිටියේය.

ගරිල්ලා සටන්වලදී භාවිතා කරන උපක්‍රම යොදාගෙන මාලිගාවත්තට ඇතුළුවී ෆාජි අත්අඩංගුවට ගැනීමේ මෙහෙයුමක්‌ සකස්‌ විය. ඒ සඳහා විශේෂ කාර්ය බලකායේ අණදෙන නිලධාරී නියෝජ්‍ය පොලිස්‌පති ඩබ්ලිව්. සරත්චන්ද්‍ර මහතාගේ පූර්ණ සහයෝගය ලැබී තිබිණි. මාලිගාවත්ත හරහා දිවෙන භූගත කානු ඔස්‌සේ සහ අතහැර දැමූ ඉඩම් හරහා ගොස්‌ තම අවශ්‍ය ස්‌ථානය වෙත ළඟාවීමට විශේෂ කාර්ය බලකායේ නිලධාරීන් සමත්වූහ. කොටි ත්‍රස්‌තවාදීන්ගේ බලකොටු තුලට ඉතාම සූක්‍ෂමව ගොස්‌ ප්‍රහාර එල්ල කිරීමේ හැකියාව තිබූ විශේෂ කාර්ය බලකායට මෙම මෙහෙයුම එතරම් අපහසු එකක්‌ නොවීය.

ෆාජි ඇතුළු කල්ලිය පලායන ස්‌ථානයන්ද කලින් නිරීක්‍ෂණය කර ගෙන සිටි විශේෂ කාර්යබලකායේ නිලධාරීන් වහල මතට වී ඒ සියලු ස්‌ථානවල රැකවල්ලාගෙන සිටියහ.

මාලිගාවත්තේ භූගත කානුවක්‌ ඔස්‌සේ පැය ගණනකින් ගමන් කළ විශේෂ කාර්ය බලකායේ සෙබළුන් ෆාජි නිදාසිටි සුවිසල් නිවස වටකළහ. ඒ වනවිට අලුයම 3.30 ට පමණ වී තිබිණි. මෙම මෙහෙයුම සඳහා විශේෂ කාර්ය බලකායේ විශේෂ අවි හා උපක්‍රම කණ්‌ඩායම (SඋAඔ) ද එක්‌ව සිටියහ.

නිවසේ තුන්වැනි මහලට ඇතුළුවූ විශේෂ කාර්ය බලකායේ නිලධාරීහු එක්‌වරම දොරවල් කඩා බිඳ දමා එයට ඇතුළු වූහ. එහෙත් ඒ සැනින් ෆාජි, ටෝජි සහ අනෙක්‌ පාතාල සගයා නිවසේ වහල මතට පැන දිව යන්නට වූහ.

ඒවනවිට විශේෂ කාර්ය බලකායේ නිලධාරීහු වහලය මත රැකවල්ලා සිටියහ. ඔවුන් දුටු ෆාජි සහ ටෝජි තමන් අතවූ ගිනි අවිවලින් ඔවුන්ට වෙඩි තබන්නට වූහ.

සැනෙකින් ක්‍රියාත් වූ විශේෂ කාර්ය බලකාය පාතාල අපරාධකරුවන් වෙත ප්‍රතිප්‍රහාර එල්ල කළහ. ඒ ප්‍රහාරවලින් මාලිගාවත්ත පාතාලයේ මහා කෙරුම්කාරයකුව සිටි ෆාජි සහ ඔහුගේ ගෝලයන් දෙදෙනා මරුවැළඳ ගත්හ.

මේ පාතාල නරුමයා විනාශ කිරීම මුළු මාලිගාවත්තටම මහා අස්‌වැසිල්ලක්‌ විය.

හේමන්ත රන්දුණු

 
Powered By -


         sWm`shQw up`lQ pRvw~pw~ sm`gm
            aAk 223 , b|lRm#n~dl~ p`r, @k`LB 13, XWY lAk`v