ශ්‍රී ලංකාව ස්‌වෛරී රාජ්‍යයක්‌
සරත් ෆොන්සේකාගෙන් ප්‍රශ්න කරන්න
ඇමරිකා රජයට හිමිකමක්‌ නෑ රජය ඇමරිකා රජයට දන්වයි

කීර්ති වර්ණකුලසූරිය සහ නෝමන් පලිහවඩන

ශ්‍රී ලංකාව ස්‌වෛරී රාජ්‍යයක්‌ බවත් වන්නි මෙහෙයුම ක්‍රියාත්මක කළ ආකාරය ගැන සෙවීමට ඇමරිකානු රජයට කිසිම හිමිකමක්‌ නැති බැවින් ආරක්‍ෂක මාණ්‌ඩලික ප්‍රධානි ජෙනරාල් සරත් ෆොන්සේකා මහතාගෙන් ප්‍රශ්න කිරීමට ඇමරිකානු අභ්‍යන්තර ආරක්‍ෂක දෙපාර්තමේන්තුව ගත් තීරණය වහාම ඉවත දමන්නැයි ශ්‍රී ලංකා රජය ඊයේ (02 දා) ඇමරිකානු රජයට දැනුම් දී ඇත.

ඇමරිකානු රාජ්‍ය දෙපාර්තමේන්තුව විසින් ප්‍රකාශයට පත්කළ පිටු 67 කින් යුත් වාර්තාවෙන් පවා වන්නි මෙහෙයුමේදී සිදුවූවා යි කියන සිදුවීම් නියත වශයෙන්ම සිදු වූයේ ද යන්න ගැන නිගමනයක්‌ කර නොමැති අතර ඒ සම්බන්ධව නීතිමය ක්‍රියාමාර්ගයකට එළැඹ නැති විටෙක ස්‌වෛරී රාජ්‍යයක හමුදා ප්‍රධානියකුගෙන් ප්‍රශ්න කිරීම රටෙක අභ්‍යන්තර කටයුතුවලට බරපතල ලෙස මැදිහත්වීමක්‌ යෑයි රජය විසින් පෙන්නුම් කර තිබේ. එසේම සුදු කොඩි ඔසවාගෙන ආ කොටි මරාදැමූ බවට හිටපු හමුදාපතිවරයා කිසිම ප්‍රකාශයක්‌ කර නැතැයි රජය පෙන්නුම් කර ඇත.

ඇමරිකානු බලධාරීන් සරත් ෆොන්සේකා මහතාගෙන් ප්‍රශ්න කිරීම සඳහා තීරණය කිරීමට පෙර එරට රාජ්‍ය දෙපාර්තමේන්තු ප්‍රකාශක ඉයන් කෙලි ප්‍රකාශයක්‌ කරමින් වන්නි මෙහෙයුම ක්‍රියාත්මක කළේ කෙසේ ද කියා දැන ගැනීමට ඇමරිකාවට අවශ්‍ය බව පවසා තිබුණා යෑයි ජ්‍යෙෂ්ඨ ආරක්‍ෂක නිලධාරියෙක්‌ පැවසීය.

මේ අතර ඇමරිකානු රජයේ මේ නීති විරෝධී ක්‍රියාව ගැන රජය ඊයේ එක්‌සත් ජාතීන්ගේ ආරක්‍ෂක මණ්‌ඩලයේ බලධාරියෙක්‌ වූ රුසියාව හා චීනය ඇතුළු මිත්‍රශීලී රටවල් රැසකට දැනුම් දුන්නේය.

ශ්‍රී ලංකාව යුද අපරාධ කළ බවට එක්‌සත් ජාතීන්ගේ මානව හිමිකම් කොමිසමට ඉදිරිපත් වූ යෝජනාව පවා පරාජය වූ විටක ඇමරිකානු රජය එක්‌සත් ජාතීන්ගේ ආරක්‍ෂක මණ්‌ඩලයේ බලතල පවා ඒකමතිකවම භාවිත කිරීමට යැම මුළුමනින්ම නීති විරෝධී ක්‍රියාවක්‌ යෑයි ද රජය විසින් පෙන්නුම් කර ඇත.

මේ අතර කොටි සංවිධානයේ ප්‍රධානතම නීති උපදේශක විශ්වනාදන් රුද්රකුමාරන්ගෙන් ත්‍රස්‌තවාදයට සහායවීම ගැන මෙතෙක්‌ ප්‍රශ්න කිරීමට ඇමරිකානු අභ්‍යන්තර ආරක්‍ෂක දෙපාර්තමේන්තුව ක්‍රියාකර නැතැයි හෙළිවී තිබේ.