මෝටාර් උණ්‌ඩය පුපුරා
ග්‍රාමාරක්‍ෂක ඇතුළු දෙදෙනෙක්‌ මියයති

කරුණාරත්න ගමගේ - පොළොන්නරුව

මාදුරුඔය යුද හමුදා කඳවුරට අයත් වෙඩි පිටියක පරණ යකඩ එකතු කිරීම සඳහා ගිය හිටපු ග්‍රාමාරක්‍ෂක භටයෙක්‌ සහ පුද්ගලයෙක්‌ එහි තිබූ පරණ මෝටාර් උණ්‌ඩයක්‌ කැබැලි කිරීමට යැමේදී පුපුරා ගොස්‌ මරුමුවට පත්වී තිබේ.

මෙසේ මියගොස්‌ ඇත්තේ මාදුරුඔය කන්දේගම දම්මින්න ප්‍රදේශයේ හිටපු ග්‍රාමාරක්‍ෂක භටයකු වන ඡේ. එම්. වික්‍රමරත්න (28) යන අය සහ කන්දේගම දම්මින්න පදිංචි එච්. එම්. අබේරත්න (35) යන අය බවට හඳුනාගෙන ඇත.

මොවුන්ගේ මළ සිරුරු පෙරේදා (01 දා) පස්‌වරුවේ මාදුරුඔය රක්‍ෂිතයේ පිහිටි මාදුරුඔය යුද හමුදා කඳවුරට අයත් වෙඩි පිටියේ තිබී හමුවී ඇතැයි මහඔය පොලිසිය කියයි.

මළ සිරුරු හමුවන අවස්‌ථාව වන විට විශාල වශයෙන් නරක්‌ වී තිබී ඇති අතර මෙම මරණ කවදා සිදුවීද යන්න මෙතෙක්‌ අනාවරණය වී නොමැත.

මියගිය පුද්ගලයන් දෙදෙනා මීට දින 04 කට පමණ පෙර නිවෙස්‌වලින් ගොස්‌ ඇත්තේ පරණ යකඩ එකතු කිරීම සඳහා බවත් ඔවුන් නැවත නිවෙස්‌ වෙත නොපැමිණි නිසා පවුල්වල ඥාතීන් යුද හමුදාවට සහ පොලිසියට දැනුම් දීමෙන් අනතුරුව මෙම සොයාබැලීම් සිදුකොට තිබේ. මෙම වෙඩි පිටිය සාමාන්‍ය ජනයාට ඇතුළුවීමට තහනම් කලාපයක්‌ බව ද කියති. මේ සම්බන්ධයෙන් මහඔය පොලිසිය වැඩිදුර පරීක්‍ෂණ පවත්වාගෙන යයි.