නෙළුවේ විහාරයක සැඟවී සිටියදී
දඹර අමිල හිමියන්ගේ
හිටපු රියෑදුරු අත්අඩංගුවට

හේමන්ත රන්දුණු

කොරියාවේ රැකියා ලබාදෙන බව කියමින් තරුණයන් පිරිසක්‌ රවටා රුපියල් විසිලක්‍ෂයකට අධික මුදලක්‌ වංචා කළ බව කියන සිද්ධියට සම්බන්ධ දඹර අමිල හිමියන්ගේ හිටපු රියෑදුරු රහස්‌ පොලිසිය මගින් පෙරේදා (07 වැනිදා) අත්අඩංගුවට ගෙන ඇත. සැකකාර විශාන් ජනිත් වෙල්ලාලගේ නමැත්තා එදිනම සවස හොරණ වැඩබලන මහෙස්‌ත්‍රාත්තුමිය වෙත ඉදිරිපත් කිරීමෙන් පසු ලබන 19 වැනිදා දක්‌වා රක්‍ෂිත බන්ධනාගාරගත කිරීමට නියෝග කර තිබේ.

මෙම සිද්ධිය සම්බන්ධයෙන් චෝදනා ලැබ සිටි දඹර අමිල හිමියන් ද මීට ඉහතදී රහස්‌ පොලිසිය මගින් අත්අඩංගුවට ගෙන අධිකරණයට ඉදිරිපත් කිරීමෙන් පසු බන්ධනාගාරගත කෙරිණි. පසුව අමිල හිමියන් ඇප මත මුදාහැර තිබිණි.

මෙම වංචාවට සම්බන්ධ ප්‍රධාන සැකකරු බව කියන විශාන් ජනිත් නමැත්තා නෙළුව ප්‍රදේශයේ විහාරස්‌ථානයක සැඟවී සිටියදී එහි ගිය විශේෂ රහස්‌ පොලිස්‌ කණ්‌ඩායමක්‌ ඔහු අත්අඩංගුවට ගත්හ.

සැකකරුට එරෙහිව පැමිණිලි 19 ක්‌ මේ වන විට ඉදිරිපත්ව ඇති අතර මොහු වංචා කර ඇති මුදල රුපියල් විසිලක්‍ෂය ඉක්‌මවන බව රහස්‌ පොලිසිය පවසයි.

සැකකරු සිවුරු හැර ගිය පුද්ගලයකු වන අතර බහුවිවාහයක්‌ ද කරගෙන ඇති බව පරීක්‍ෂණවලදී හෙළිවී ඇත.

මෙම මුදල් වංචා කිරීමේ සිද්ධීන්වලින් පසුව අමිල හිමියන් විසින් මෙම පුද්ගලයා රියෑදුරු රැකියාවෙන් ද නෙරපා ඇති බව පරීක්‍ෂණවලදී අනාවරණය විය.

රහස්‌ පොලිසිය වැඩිදුර පරීක්‍ෂණ පවත්වාගෙන යයි.