දික්‌වැල්ලේ රිය අනතුරකින් කාන්තාවක්‌ මිය යයි

සිසිල් රුවනාර - වලස්‌ගල අතිරේක

දික්‌වැල්ල තංගල්ල මාර්ගයේ පෙහෙඩියහන්දිය අසල පෙරේදා (7 දා) රාත්‍රි 7.30 ට සිදුවූ රිය අනතුරකින් කාන්තාවක්‌ මියගොස්‌ ඇතැයි දික්‌වැල්ල පොලිසිය කියයි. දික්‌වැල්ල මහවෙල පාරේ පදිංචිකාරියක්‌ වන හැට අට හැවිරිදි කොළමුන්නගේ කරුණාවතී නමැති අය මෙම අනතුර සිදුවූ ස්‌ථානයේදීම මියගොස්‌ ඇත. ධීවර වරායක්‌ වෙත ඩීසල් රැගෙන දික්‌වැල්ල සිට තංගල්ල දෙසට ධාවනය කළ කැන්ටර් රථයේ මියගිය කාන්තාව ගැටී ඇත්තේ අසල වෙළෙඳසලකින් භාණ්‌ඩ රැගෙන කහ ඉර හරහා තම නිවස වෙත පාර මාරුවන අවස්‌ථාවේදීය.

සිද්ධියත් සමඟම රියෑදුරු පැනගොස්‌ ඇති අතර, කැන්ටර් රිය පොලිසිය භාරයට ගෙන ඇත. උප පොලිස්‌ පරීක්‍ෂක ඥාණපාල මහතාගේ මූලිකත්වයෙන් දික්‌වැල්ල පොලිසියේ රථවාහන අංශය වැඩිදුර පරීක්‍ෂණ පවත්වයි.