ජෙනරාල් ගාල්ලෙන් තරග කළොත්
අමතක නොවන පාඩමක්‌ මා කියා දෙනවා
දකුණු පළාත් සභාවේ මහ ඇමැති

ලලිත් චාමින්ද සහ එස්‌. කේ. කළුආරච්චි - ගාල්ල

ජෙනරාල් සරත් ෆොන්සේකා මහතා ඉදිරි පාර්ලිමේන්තු මැතිවරණයේදී ගාල්ල දිස්‌ත්‍රික්‌කයෙන් තරග කරන්නේ නම් තමන් නියත වශයෙන්ම එක්‌සත් ජනතා නිදහස්‌ සන්ධානයෙන් ගාලු දිස්‌ත්‍රික්‌කයෙන් තරග කරන බව දකුණු පළාත් ප්‍රධාන අමාත්‍ය ෂාන් විඡේලාල් ද සිල්වා මහතා පැවැසීය.

ජෙනරාල් සරත් ෆොන්සේකා මහතා පසුගිය ජනාධිපතිවරණයේදී මහින්ද රාජපක්‍ෂ මහතාගෙන් අමතක නොවන පාඩමක්‌ ඉගෙනගත් බවත් ගාල්ලේදී තමන් ජෙනරාල් ෆොන්සේකාට එම පාඩම නැවතත් කියාදෙන බවත් ප්‍රධාන අමාත්‍යවරයා සඳහන් කළේය.

ඉදිරි පාර්ලිමේන්තු මැතිවරණයට ඉදිරිපත් වන්නේ දැයි "දිවයින" කළ විමසුමකදී ප්‍රධාන අමාත්‍යවරයා මේ බව සඳහන් කළේය.

ජෙනරාල් පසුගිය ජනාධිපතිවරණයේදී අම්බලන්ගොඩ ආසනය ජය ගන්නා බවට පැවසුවත් ඔහුට තම උපන් ගමෙන් ද අත් වූයේ අන්ත පරාජයක්‌. ඉදිරි මහ මැතිවරණයේදී එ.ජ.නි. සන්ධානය ගාලු දිස්‌ත්‍රික්‌කයෙන් ලබා ගන්නේ ඓතිහාසික ජයග්‍රහණයක්‌. අපේ ඉලක්‌කය මෙවර මහ මැතිවරණයේදී ගාලු දිස්‌ත්‍රික්‌කයෙන් මන්ත්‍රී ධුර හතක්‌ ලබාගැනීමයි.