ලංගම සේවය වඩාත් ඵලදායී කිරීමට
පේරාදෙණිය සරසවිය ඉදිරිපත් වේ

අකිත පෙරේරා

ශ්‍රී ලංකා ගමනා ගමන මණ්‌ඩලයේ සේවකයන් වඩාත් ඵලදායී කිරීම සඳහා අවශ්‍ය පාඨමාලා සහ නවීන තාක්‌ෂණය ලබා දීමට පේරාදෙණිය විශ්වවිද්‍යාලයේ ඉංජිනේරු පීඨය ඉදිරිපත්ව ඇත.

ලංගම සේවකයන් සඳහා විවිධ කෙටි කාලීන පාඨමාලා හඳුන්වා දී අවසානයේදී ඔවුන්ට වටිනා සහතික පත්‍රයක්‌ ද ලබා දෙන අතර සේවක කුසලතාද, මානසික තෘප්තියද වර්ධනය කිරීමට සූදානම් යෑයි පේරාදෙණිය විශ්වවිද්‍යාලයේ උපකුලපති එස්‌. බී. එස්‌. අභයකෝන් මහතා පැවැසීය.

මේ වනවිට ලංගමය අනුගමනය කෙරෙන පැරණි ක්‍රමවේදයන් වෙනුවට නව ඵලදායී ක්‍රමවේද හඳුන්වා දීමටත් විදේශවලින් අධික මුදලක්‌ ගෙවා ගෙන්වන යන්ත්‍ර සූත්‍ර වෙනුවට දේශීයව නිපදවන යන්ත්‍ර සූත්‍ර හඳුන්වා දීමටද විශ්වවිද්‍යාලය බලාපොරොත්තු වේ.

ලංගමයේ ඉදිරි අවශ්‍යතා මත නව පුහුණු වැඩසටහන් සම්පාදනය කිරීම ද කරන බව උපකුලපතිවරයා සඳහන් කළ අතර ගමනා ගමන මණ්‌ඩලයේ ප්‍රධාන විධායක නිලධාරී විජය වික්‍රමරත්න මහතා සහ පේරාදෙණිය විශ්වවිද්‍යාලයේ ඉංජිනේරු පීඨයේ එම්. පී. රණවීර යන මහත්වරු මේ සම්බන්ධව පසුගියදා සාකච්ඡා පැවැත්වූහ.