සිංහල දරුවන්ට ඉංග්‍රීසි කතා කරවන හැටි !

ජනාධිපති මහින්ද රාජපක්‌ෂ මහතාගේ සංකල්පයකට අනුව රට පුරා සියලුම පාසල් දරුවන් ඇතුළු සමස්‌ත ජනතාවගේ ඉංගී්‍රසි භාෂා ඥනය හා ඉංගී්‍රසි බස කතා කිරීමේ හැකියාව නංවාලීමේ වැඩසටහනක්‌ මේ වන විට ඉතා සාර්ථකව ක්‍රියාත්මක වෙමින් පවතී. ඉංගී්‍රසි සහ තොරතුරු තාක්‌ෂණය පිළිබඳ ජනාධිපති කාර්ය සාධක බලකාය මෙම වැඩසටහන ක්‍රියාත්මක කරන අතර එහි ප්‍රගතිය සහ ඉදිරි ක්‍රියාමාර්ග සම්බන්ධයෙන් ඒ පිළිබඳ ජනාධිපති උපදේශක සුනිමල් ප්‍රනාන්දු මහතා සමග අපි කතා බහ කළෙමු.

"දශක ගණනක්‌, මුළුල්ලේ අධ්‍යාපන ක්‌ෂේත්‍රය ඔස්‌සේ ඉංගී්‍රසි භාෂා හැකියාව අපේ දරුවන් අතරට යවන්න විවිධ උත්සාහයන් තිබුණා. නමුත් ඒ සියල්ලම අසාර්ථක බව තහවුරු වෙලා තිබෙනවා. සෑම දරුවෙක්‌ම අවුරුදු දොළහක්‌ මුළුල්ලේ අඩුම තරමේ සතියට පැය දෙක තුනක්‌වත් බැගින් පාසලේදී ඉංගී්‍රසි විෂයය ඉගෙන ගන්නවා. නමුත් අපේ සාමාන්‍ය දරුවෙක්‌ පාසලෙන් ඉවත්ව යන්නේ ඉංගී්‍රසි භාෂාවෙන් වාක්‍ය දෙක තුනක්‌වත් කතා කරන්න බැරුවයි. මේ ව්‍යසනය බලාගෙන ඉන්න බැරිම තැන ජනාධිපතිතුමා මේ වැඩේ බාරදුන්නා.

එතුමා කිව්වා රට පුරා ගිහින් ළමයින්ට ඉංගී්‍රසි කතා කරන්න බැරි මොකද කියලා හොයලා බලන්න කියා.

එතැන් පටන් ගම්වල අහිංසක ගුරුවරු මුණ ගැසිලා ඒ ඔස්‌සේ මේ ප්‍රශ්නයට විසඳුම් සොයන්න මම පියවර ගත්තා. එතැනදී මට ඉතාම දක්‌ෂ, මේ විෂයයට කැපවීමෙන් කටයුතු කරන ගුරුවරු මුණ ගැසුණා. ඒ අතරින් හොඳම 80 දෙනෙක්‌ තෝරා ගෙන ඉන්දියාවේ හයිද්‍රdබාද්වල තිබෙන ඉංගී්‍රසි සහ විදේශ භාෂා විශ්වවිද්‍යාලයෙහි පුහුණුව සඳහා යොමු කළා. ඉන් පසුව දෙවැනි පෙළ පුහුණුකරුවන් ලෙස තවත් 320 දෙනෙකුට අපි එම පුහුණුව ලබා දුන්නා. මේ වැඩපිළිවෙළෙහි නියමුවන් බවට පත් වූයේ ඒ පිරිසයි. ජනාධිපති කාර්යාලයේ විශේෂ කාර්යාරම්භන ඒකකයේ කොඳුනාරටිය බවට පත් වන්නේ මේ කණ්‌ඩායමයි.

මෙතෙක්‌ මේ රටේ ඉංගී්‍රසි බස ව්‍යාප්තිය කඩාකප්පල් වූයේ ද නැත්නම් ඉතාම සංවිධානාත්මකව එය කඩාකප්පල් කළා ද යන්න පිළිබඳ අදහස්‌ දැක්‌වූ ප්‍රනාන්දු මහතා එකී කාරණා දෙකම බලපා ඇති බව සඳහන් කළේය.

සුද්දාගේ දරුවා මුලින් ඉංගී්‍රසි කතා කරලා ලියන්න ඉගෙන ගන්න තමයි පාසලට යොමුවන්නේ. ඉංගී්‍රසිය හොඳින් හසුරවන්න පුළුවන් නම් සියයට අනූවක්‌ම ඒ දැනුම ලැබිලා ඉවරයි. සුද්දාගේ න්‍යාය ගෙඩිපිටින් අරගෙන අපේ අය මොකද කළේ... සුද්දන්ගේ ළමයි උපන් දා සිට ක්‍රමක්‍රමයෙන් අවුරුදු පහක්‌ පමණ ඉංගී්‍රසි කතාව ගෙදරදී පුහුණු වූ බව මුළුමනින්ම අමතක කරලා වචනයක්‌වත් ඉංගී්‍රසියෙන් කතා කරන්න බැරිව පාසලට එන සිංහල දරුවන්ට ඉංගී්‍රසි ලියන්න උගන්වනවා. අන්තිමට මොකද වෙන්නේ ඒ ළමයාට කවදාවත් ඉංගී්‍රසි ලියන්නත් බැරි වෙනවා. කතා කරන්නත් බැරි වෙනවා.

ඉංගී්‍රසි කතා කරන්න නොදැන පාසලට යන දරුවා තමන් ඉංගී්‍රසියෙන් ලියන්නේ මොනවාද කියලාවත් දැන්නේ නැහැ.

මේ නිසා දරුවන් ඉංගී්‍රසි කතා කරන්නේ නැහැ. වැරදුනොත් හිනාවෙන්න බලාගෙන තව පිරිසක්‌ ඉන්නවා. මේ නිසා පුංචි කාලේ සිටම ළමයි ඉංගී්‍රසියෙන් ඈත් වෙනවා.

මේ රටේ පසුගිය කාලයේ ඉංගී්‍රසියේ ව්‍යවසායකයින් නැත්නම් අයිතිකරුවන් බවට පත්වූ කණ්‌ඩායම් දෙකක්‌ තිබුණා. පළමු කණ්‌ඩායම වන්නේ බටහිරකරණය වූ නශ්ඨාවශේෂයි. ඔවුන් බටහිරට නතු වූ ඊට වැඳුම් පිදුම් කරන්නා වූ පිරිසයි. ඔවුන්ගේ ඇවතුම් පැවතුම් සියල්ල බටහිරකරණය වෙලා. මේ අයට ග්‍රාමීය වෙන්න අමාරුයි. ගම ගැන අවබෝධයක්‌ නැහැ. නමුත් මේ අය භයානක නැහැ. අපේ පැත්තට නැඹුරු කරන්න පුළුවන්කම තියෙනවා. ඔවුන් අහිංසකයි. නමුත් දෙවැනි කොට්‌ඨාසය හරිම භයානකයි. ඔවුන් ගමේ ඉපදිලා, අගහිගකම් වලින් තෙරපිලා, අමාරුවෙන් ඉගෙන ගෙන, බටහිරකරණය ආරූඪ කරගත් අයයි. ඔවුන් ඊළඟට ඒ තැනට එන්න ඉන්න කණ්‌ඩායමට වල කපනවා. එන්න දෙන්නේ නැහැ. මේ දෙවැනි කණ්‌ඩායම ඉතා කෲර විදිහට ඉංගී්‍රසි උගන්වන ක්‍රමය පරිපාලනය කරමින් ළමයින්ට ඉංගී්‍රසි එපා කරවන්න කටයුතු යොදනවා. ඒ කණ්‌ඩායමට අයත් පිරිසක්‌ තමයි අධ්‍යාපන ආයතනයේ ඉංගී්‍රසි අධ්‍යාපනය පාලනය කරන්නේ. මේකට දර දඬු තීරණයක්‌ ගන්න මට සිද්ධ වුණා. ජනාධිපතිතුමාගේත්, ජනාධිපති ලේකම් ලලිත් වීරතුංග මහතාගේත් බලතල යොදවා එම පිරිස මම ඉවත් කළා. ඊට පස්‌සේ තමයි ගම්වලින් තෝරාගන්න කණ්‌ඩායම පුහුණු කරලා මේ මෙහෙයුම දියත් කළේ.

සුනිමල් ප්‍රනාන්දු මහතාගේ අධික්‌ෂණය යටතේ තෝරාගත් මෙම විශේෂ කාර්යාරම්භන ඒකකය මගින් මේ වන විට ඉංගී්‍රසි විෂයය පිළිබඳ පාසල් විෂයය නිර්දේශය උඩු යටිකුරු කර තිබේ. කථනයට පළමු තැන ලබා දෙමින්, සවන් දීම ඊට සමගාමීව හුරු කරවමින් පාසල් විෂය පද්ධතියේ ඉංගී්‍රසි අධ්‍යාපනය වෙනස්‌ ම වූ ක්‍රියාමාර්ගයක්‌ ඔස්‌සේ දීප ව්‍යාප්ත කිරීමට මෙකී කණ්‌ඩායම පියවර ගෙන ඇත. විභාග ඉලක්‌ක කරගත් විෂයය පද්ධතිය ඉවත් කර කථනය පරීක්‌ෂා කිරීම සහ ඊට ලකුණු ලබාදීමේ ක්‍රමවේදයක්‌ මේ අනුව සකස්‌ කෙරිණි. මෙකී පරීක්‌ෂණ මෙවලම් හා ලකුණු ලබාදීම සම්බන්ධයෙන් පාසල් ගු=රුවරුන්ට විශේෂ පුහුණුවක්‌ ලබාදීමට ද නියමිතය. මෙම ක්‍රමය 2012 සිට ක්‍රියාත්මක වන බව ප්‍රනාන්දු මහතා අවධාරණය කළේය.

අපට සුද්දා කතා කරන විදිහ අවශ්‍ය නැහැ. අපි අපේ විදිහට මුලින්ම කතා කළ යුතුයි. ජපනා ඉංගී්‍රසි කතා කරන්නේ ජපන් විලාසයටයි. චීන මිනිස්‌සු ඉංගී්‍රසියෙන් කතා කළත් ඒ අය චීන කියලා හඳුනාගන්න පුළුවන්කම තිබෙනවා. හින්දි අය ඉංගී්‍රසියෙන් කතා කළත් හඳුනාගත හැකියි. සිංහල මිනිහා මොකටද සුද්දෙක්‌ වගේ ඉංගී්‍රසි කතා කරන්න උත්සාහ කරන්නේ... අපට වැරදුනේ එතැනයි. සරත් අමුණුගම, ජී. එල්. පීරිස්‌, ලලිත් වීරතුංග, රනිල් වික්‍රමසිංහ, මහින්ද රාජපක්‌ෂ මේ අය ඉංගී්‍රසි කතා කරන්නේ අපේ විදිහටයි.

ශ්‍රී ලාංකික ඉංගී්‍රසි කියා ප්‍රභේදයක්‌ තිබෙනවා. ඒක හරියටම හරි. බ්‍රිතාන්‍ය ඉංගී්‍රසි, ඇමරිකානු ඉංගී්‍රසි තියෙනවා නම් ශ්‍රී ලාංකික ඉංගී්‍රසිත් තියෙන්නම ඕනේ.

මෙම වැඩපිළිවෙළට සමගාමීව විශේෂ වැඩ සටහනක්‌ 19 වැනි සඳුදා පැවැත්වෙනු ඇත. එදින ප්‍රධාන වශයෙන්ම සිදු වන්නේ නව ඉංගී්‍රසි ගුරු අත්පොත නිකුත් කිරීමයි. මෙම පොත් එතැන් සිට ජාතික අධ්‍යාපන ආයතනය හරහා රට පුරා සියලුම ඉංගී්‍රසි ගුරුවරුන්ට ලබා දීමට නියමිතය. මීට අමතරව ඉංගී්‍රසි ගුරුවරු 22500 ක්‌ අතරින් මෙම නව වැඩපිළිවෙළ යටතේ සියයට හැටක්‌ පුහුණුව ලබා අවසන් බව එදින ජනාධිපතිතුමා වෙත සැළ කිරීමට ද විශේෂ කාර්යාරම්භන ඒකකය පියවර ගෙන තිබේ.

ඉංගී්‍රසි ගුරුවරු වරින් වර පත් කරනවා. ඒ අය පුහුණුව ලබනවා. පත්වීම් ගන්න දවසේ සිට ඒ අය මාරු වෙන්න දඟලනවා. හරියට වැඩ කෙරෙන්නේ නැහැ. නාගරික පාසල්වල 1196 ක ගුරු අතිරික්‌තයක්‌ තියෙනවා. නමුත් ග්‍රාමීය පාසල්වල 3468 ක ගුරු හිඟයක්‌ තියෙනවා. එක ඉංගී්‍රසි ගුරුවරයෙක්‌වත් නැති පාසල් 866 ක්‌ මේ රටේ තියෙනවා. මේ නිසා වහාම ඉංගී්‍රසි ගුරු ඇබෑර්තු පුරවන්න අපි කටයුතු කරනවා. ඉන්න අයට පිං පඩි දෙනවා හැරෙන්න ඔවුන්ව විසිරුවන්න බැහැ. ඒ නිසා නව නීති රීති යටතේ බඳවා ගැනීම් කරනවා. දැනට තිබෙන ලොකුම බාධකය එයයි.


සාකච්ඡා කළේ  තුෂාරී කළුබෝවිල
පින්තූර - චන්ද්‍රසිරි වීරසිංහ

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.