වරදාන, වරප්‍රසාද චෝදනාව සම්පූර්ණයෙන්ම
ප්‍රතික්‍ෂේප කරනවා
- ඇමැති මහින්ද සමරසිංහ

ශ්‍යාම් නුවන් ගනේවත්ත

18 වැනි ආණ්‌ඩුක්‍රම ව්‍යවස්‌ථා සංශෝධනයට සහාය පළ කළ එජාප මන්ත්‍රීවරුන්ට නොයෙකුත් වාසි හා වරදාන ලබාදී ඇති බවට ඉදිරිපත් කරන චෝදනාව රජය සම්පූර්ණයෙන්ම ප්‍රතික්‍ෂේප කරන බව ඊයේ (09 දා) කැබිනට්‌ තීරණ දැනුම්දීමේ ප්‍රවෘත්ති සාකච්ඡාවේදී වැවිලි කර්මාන්ත ඇමැති මහින්ද සමරසිංහ මහතා පැවසීය.

පාර්ලිමේන්තුවෙන් සම්මත වූ 18 වැනි ආණ්‌ඩුක්‍රම ව්‍යවස්‌ථා සංශෝධන පනත සඳහා ඊයේ (09 දා) කථානායකවරයා අත්සන් තැබීමට නියමිතව තිබූ බවද, ඉන් පසු එය රටේ නීතියක්‌ බවට පත් වන බවද මහින්ද සමරසිංහ මහතා කීවේය.

ජනාධිපති ක්‍රමය ක්‍රියාත්මකවන සහ අසීමිත වාර ගණනක්‌ ජනාධිපතිවරණයට තරග කිරීමට හැකියාව ඇති ලොව වෙනත් රටවල් මොනවා දැයි මෙහිදී "දිවයින" ඇසූ ප්‍රශ්නයට පිළිතුරු දීමට අපොහොසත් වූ ඇමැති මහින්ද සමරසිංහ මහතා කියා සිටියේ ලොව වෙනත් රටවල ආදර්ශ අනුව අප ක්‍රියා නොකරන බවයි. මේ ප්‍රශ්නයට පිළිතුරු දීමට ජනමාධ්‍ය ඇමැති කෙහෙළිය රඹුක්‌වැල්ල ද ඉදිරිපත්වූ අතර ඔහුට ද ජනාධිපති ධුරයකට අසීමිත වාර ගණනක්‌ ඉදිරිපත්වීමට ඉඩ සලසා ඇති ලොව වෙනත් රටක්‌ නම් කිරීමට නොහැකි විය. රජය රටේ අවශ්‍යතා අනුව ක්‍රියාකරන බවද, රජය කරන්නේ වෙනත් රටවල ආදර්ශ ක්‍රියාත්මක කිරීමක්‌ නොවන බවද ඇමැති කෙහෙළිය රඹුක්‌වැල්ල මෙහිදී කියා සිටියේය.