හරි... 13 ගෙනාවොත් බලමු!

ජවිපෙ වසර ගණනාවකට ඉහතදී 13 වැනි සංශෝධනය ක්‍රියාත්මක කරන මොහොතේ ඊට දැඩි විරෝධයක්‌ පෑවා සේම, වර්තමානයේදී ද එකී ස්‌ථාවරය නොවෙනස්‌ව පවත්වාගෙන යයි. වර්තමානයේදී රජය විටින් විට කරනු ලබන ප්‍රකාශයන් හරහා ගොඩනැඟෙන දේශපාලන අර්ථයන් පිළිබඳ ජනතා විමුක්‌ති පෙරමුණේ පාර්ලිමේන්තු මන්ත්‍රී සුනිල් හඳුන්නෙත්ති මහතා පළ කළ අදහස්‌ බිඳක්‌ පහත දැක්‌වේ.

ප්‍රශ්නය - වර්තමාන දේශපාලන කරුණු කාරණා ගැටගැහෙන ආකාරය ගැන ඔබට තිබෙන්නේ මොන වගේ අදහසක්‌ද?

පිළිතුර - ආණ්‌ඩුව ඉන්නේ පඹගාලක පැටලිලා. විශේෂයෙන් රට අභ්‍යන්තරයේ ලොකු ආර්ථික අර්බුදයකට ආණ්‌ඩුව මුහුණ දීලා ඉන්නවා කියන එක පේන්න තියෙනවා. නමුත් රට ඇතුළේ තියෙන ප්‍රශ්න ටික කළමනාකරණය කරගන්න බැරුව ඉන්න ආණ්‌ඩුවට ජාත්‍යන්තර වශයෙන් එල්ලවන බලපෑම්වලටත් මුහුණ දෙන්න සිද්ධවෙලා තියෙනවා.

හැබැයි මේවා හසුරුවා ගන්න කළමනාකරණය කරගන්න බැරිවෙලා තියෙන්නේ රටේ ජනතාවගේ වරදින්වත් වෙනත් හේතුවක්‌ නිසාවත් නෙවෙයි. ආණ්‌ඩුවේම වැරැදි අදූරදර්ශී දේශපාලන ක්‍රියාමාර්ග නිසයි. ඒක තමයි පොදුවේ පේන්න තියෙන දේ.

ප්‍රශ්නය - ඔබ ඔය කියන දේශපාලන කරුණු කාරණා අතර මූලික වශයෙන් 13 වැනි ව්‍යවස්‌ථා සංශෝධනය පිළිබඳව වැඩි වශයෙන් කතා බහ කෙරෙනවා. 13 වැනි ව්‍යවස්‌ථා සංශෝධනයේදී ජවිපෙ මුල සිටම සිටියේ විරෝධාකල්පයක. වර්තමානයේ නැවත එය කරලියට පැමිණීම ගැන ජවිපෙ දරන්නේ මොන වගේ අදහසක්‌ද?

පිළිතුර - ඉතා පැහැදිලිව අපි කියන්නේ, මේ බලය බෙදීම කියන සංකල්පයම වැරැදියි. ඒ නිසා ඒ ගැන අපට නැවත දෙගිඩියාවක්‌ නැහැ. අපට මෙතන තිබෙන්නේ වෙනත් ප්‍රශ්නයක්‌, ඒ කියන්නේ මේ ගැන ආණ්‌ඩුවේම ඇමැතිවරු සහ ජනාධිපතිවරයා වරින් වර කියන විකාර කතා. මේ කතාව නැවත කරලියට එන්නෙම විදේශ ඇමැති ජී. එල්. පීරිස්‌ මහතා ඉන්දියාවට ගිහින් කරපු ඒකාබද්ධ නිවේදනයත් එක්‌කයි. ඒකට තමයි ඉන්දියාව 13 වැනි සංශෝධනය යළි ක්‍රියාත්මක කළ යුතුයි කියලා තිබෙන්නේ. එතකොට එතැනට ආණ්‌ඩුව පත්වන්නේ කොහොමද? ආණ්‌ඩුව එතැනට යන්නේ දරුස්‌මාන් වාර්තාවට විරෝධය පාන්න ඉන්දියාවේ සහයෝගය ගන්න ගිහිල්ලා කියල. කියන එක පැහැදිලියි. ඉන්දියාව එතැනදි කළේ, ඒ වාර්තාවේ තියෙන කරුණු සියල්ලමත් සනාථ කරලා ඒකට උඩින් ආර්ථික, දේශපාලන, ආරක්‍ෂක කොන්දේසි ගණනාවක්‌ පැනවීමයි. එතකොට ඇත්තටම ආණ්‌ඩුව ඉන්දියාවට ගිහින් කළේ ඉල්ලගෙන කෑමක්‌ කියන එක තමයි අපට පේන්න තියෙන්නේ.

ඊළඟට 13 වැනි සංශෝධනයට එහා ගිහින් බලය බෙදනවා රඹුක්‌වැල්ල ඇමැතිවරයා කියනවා. එතකොට 13 ට මෙහා තියෙන දේවල් ගැන ජනාධිපතිවරයා කියනවා. එතකොට අපිට තියෙන ප්‍රශ්නය කැබිනට්‌ ඇමැතිවරයකු හැටියට රඹුක්‌වැල්ල මහත්තයා ඉදිරිපත් කරන්නේ ආණ්‌ඩුවේ මතය නෙවෙයිද?

නැතිනම් රටේ ජනාධිපතිවරයා කියන්නේ රටේ මතය නෙවෙයිද? ජී. එල්. පීරිස්‌ විදේශ ඇමැතිවරයා හැටියට කියන්නේ රජයේ ස්‌ථාවරය නොවෙයිද කියන ගැටලු මතුවනවා. ඒ නිසා ඉතා පැහැදිලිව මේ සම්බන්ධයෙන් ආණ්‌ඩුව තමන්ගේ ස්‌ථාවරය කියන්න ඕන. තමන්ගේ විසඳුම මොකක්‌ද කියලා කියන්න ඕන.

අර කතාවට කියනවා ටික දෙනෙක්‌ ටික දවසක්‌ රවට්‌ටන්න පුළුවන් වුණාට වැඩි දෙනෙක්‌ වැඩි දවසක්‌ රවට්‌ටන්න බැහැ. දැන් මේ රටේ කවුද 13 ට එහා හරි මෙහා හරි ඉල්ලන්නේ. ජනතාව ඉල්ලන ප්‍රශ්නයක්‌ නෙවෙයි මේ තියෙන්නේ. ජත්‍යන්තරයේ බලපෑමට අනුව ආණ්‌ඩුව නැටවෙන එකයි මේ තියෙන්නේ. ඕක බටහිරින් කිව්වත් යුරෝපා සංගමයෙන් කිව්වත්, ඉන්දියාවෙන් කිව්වත් එකයි. හැබැයි අපි පුදුම වෙන්න ඕන හරි කලබල වෙන්න ඕන හරි මේ ජාත්‍යන්තර බලපෑම් ගැන නෙවෙයි... අධිරාජ්‍යවාදී බලපෑම් ඉතිහාසය පුරාම සිද්ධ වුණා. අපි කියන්නේ ඒ අත්දැකීම් දශමයක්‌ හෝ ප්‍රයෝජනයට නොගෙන අපේ රටේ දේශපාලන නායකයෝ විශේෂයෙන් ආණ්‌ඩුව ඒ පදේට නැටවෙන එකයි අපට තියෙන ප්‍රශ්නය.

ප්‍රශ්නය - එවැනි අර්බුද පැත්තකින් තිබ්බොත්, මේ මොහොතේ ජවිපෙ ඉදිරිපත් කරන දේශපාලන විසඳුම කවරාකාරද?

පිළිතුර - ඉතාම පැහැදිලියි. අපි මීට පෙරත් මේ ගැන කතා කළා. අපි තමයි, ජවිපෙ තමයි රටට එම ස්‌ථාවරය ගැන පැහැදිලි කළේ. මෙතැනදී බලය බෙදන්නේ කොයි ප්‍රමාණයෙන් ද කියන එක නෙවෙයි ප්‍රශ්නය. අනික බලය බෙදීම කියන එකම වැරැදියි. ඒක විසඳුමක්‌ නෙවෙයි. අවශ්‍ය වෙන්නේ ජනතාවගේ අයිතිවාසිකම් ලබාදෙන එකයි. කිසිම ජනකොටසක්‌ අයිතිවාසිකම් දෙන්න එනකොට එපා කියන්නේ නැහැනේ. ජනතාවට ප්‍රජාතන්ත්‍රවාදය දෙන එක. ප්‍රජාතන්ත්‍රවාදී අයිතීන් ලබාදෙන එක. 13 ට එහා මෙහා කතා කරලා වැඩක්‌ නැහැනේ. යුද්දේ ඉවරවෙලා අවුරුදු දෙකක්‌ ගතවුණු මොහොතකත් ඒ මිනිස්‌සුන්ගේ අවතැන් ප්‍රශ්න විසඳන්න බැරිවෙච්ච කොට... දේශපාලන වශයෙන් ත්‍රස්‌තවාදීන් කියලා හරි අත්අඩංගුවට ගන්න දෙමළ තරුණයාට මොකක්‌ද කරන්නේ කියලා ආණ්‌ඩුවට තීරණය කරන්න බැහැනේ. අත්අඩංගුවේ ඉන්න දෙමළ තරුණයන්ගේ ප්‍රමාණය කොච්චර ද කියලා ආණ්‌ඩුවට කියන්න බැරිනම්, තවත් කුමන කතාද? මම අහන්නේ එවැනි ප්‍රශ්නයක්‌ ගැනවත් සංවේදී වෙන්න බැරි මිනිස්‌සු කොහොමද ඊට එහා යන විසඳුමක්‌ ගැන කතාකරන්නේ. ඒ අයිතිවාසිකම් දෙන්නේ. ඒ නිසා 13 ට එහා ද මෙහා ද කියන එක හොයනවාට වඩා ජනතාවගේ අයිතිවාසිකම් ලබාදීමට කටයුතු කළ යුතුයි. ප්‍රජාතන්ත්‍රවාදය තහවුරු කළ යුතුයි. ඒක තුළ මාධ්‍ය නිදහස, කතා කිරීමේ නිදහස, දේශපාලනය කිරීමේ නිදහස, තමන් කැමැති තැනක විසීමේ නිදහස ආදී වශයෙන් මේ හැම දෙයක්‌ම අයිතියි. මම බලය බෙදීමක්‌ ඉල්ලන්නේ නැහැ. නමුත් සිංහල කතා කරන මිනිහෙක්‌ හැටියටවත්, උතුරට ගිහිල්ලා දේශපාලනය කරන්න මට අයිතියක්‌ නැහැනේ. එතකොට දෙමළ කතා කරන කෙනාගේ තත්ත්වය මොකක්‌ද?

ප්‍රශ්නය - ඔබ ඔය කියන "අයිතිවාසිකම" කියන කාරණය මේ දේශපාලනය තුළ විග්‍රහ කරන්නේ කොහොමද?

පිළිතුර - ඒක මේ පවතින පාලනය ඇතුළේ දෙන්න බැරිනම්, මීට වඩා එහා එකක්‌ දෙන්නේ කොහොමද කියන්න. දැන් අපිට ව්‍යවස්‌ථාවක්‌ තියෙනවා. ඒක තුළ හෝ අපිට අයිති දේවත් දෙන්න බැරිනම්... දෙන්නේ නැත්නම් ඊට එහා එකක්‌ මේ පවතින ක්‍රමයෙන් ඉල්ලන එක වැරැදියිනේ. ඒක ගැන ඊට වඩා ගැඹුරු විශ්ලේෂණ අවශ්‍ය නැහැ.

රටේ මහාපරිමාණ ව්‍යාපෘති අද ඉන්දියාවට පවරලා දෙනවා. සාම්පූර් විදුලි බලාගාරය, කන්කසන්තුරේ දුම්රිය මාර්ගය වෙන්න පුළුවන්. පාර හදන එක මේ මොකක්‌ වුණත් වෙන්න පුළුවන්. ඇයි අපිට බැරි දෙමළ, - මුස්‌ලිම් තරුණයා, රැකියා විරහිතයා අරගෙන අපේ රටේ කර්මාන්තකරුවා, ඉදිකිරීම් ක්‍ෂේත්‍රයේ නිපුණයන් පාවිච්චි කරලා ඇයි ඒවා අපිට කරන්න බැරි.

ඔබ අහන්නේ ඇයි එහෙම යටවෙන්නේ. ආණ්‌ඩුවට හම්බවෙන කොමිස්‌ කුට්‌ටියටයි ඒ යටවෙන්නේ. එහෙම යටවෙන ආණ්‌ඩුවකින් කොහොමද අයිතිවාසිකම් ඉල්ලන්නේ. ආණ්‌ඩුව මේ දෙපිටකාට්‌ටු කතා කියන්නෙත්, අධිරාජ්‍යවාදී බලපෑම්වලට යටවෙන්නෙත් එදා වේල පවත්වාගෙන යන්නයි.

ප්‍රශ්නය - 13 වැනි සංශෝධනයට දැඩි විරෝධයක්‌ පළ කළ ජවිපෙ යම් විදියකින් නැවත මෙය කරළියට ආවොත් ගන්නා පියවර මොකක්‌ද?

පිළිතුර - යම් විදියකින් ආවොත් කියලා අනුමාන කරලා දේශපාලනයේ තීන්දු තීරණ ගන්න බැහැ. එහෙම අරගෙනත් නැහැ. "යම් විදියකින් ආවේ නැත්නම්" එහෙම වෙන්නත් පුළුවන්නේ. මොකද මේ ආණ්‌ඩුව ගැන එකක්‌ පැහැදිලියි. මේ ආණ්‌ඩුව කියන දේ කරන ආණ්‌ඩුවකුත් නෙවෙයි. කරන දේ කියන ආණ්‌ඩුවකුත් නෙවෙයි.

දැන් ජී. එල්. පීරිස්‌ මහත්තයා පිට පැටෙව්වට, ආණ්‌ඩුව ඉන්දියාවට ගිහිල්ලා එයාලාට යටවෙලා බලය බෙදන්න කතා කරලා 13 ක්‍රියාත්මක කරන්න කතා කරලා මෙහෙට එනකොට ආයේ ඇතුළේ කචල්. එතැනදී සනසන්න පිරිසක්‌ ඉන්නවා. ශ්‍රී ලංකා නිදහස්‌ පක්‍ෂයේ ඉන්න ජාතිකවාදී කණ්‌ඩායම් පිනවන්න ඕන. ඒකට තමයි අර පොලිස්‌ බලතල, ඉඩම් බලතල දෙන්නේ නැහැ කියලා කියන්නේ.

ප්‍රශ්නය - අනුමාන කරන්නේ නැතිව අපි කියමු මේක ගේනවාමයි කියලා... එතකොට මොකද වෙන්නේ...

පිළිතුර - හරි ගෙනාවොත් බලමු · ගේනවා කියලා හරියන්නේ නැහැනේ... ගෙනාවොත් බලමු. ඔබ කියනවා ගේනවා කියලා. මම කියනවා ගේනවා කියලා පෙන්නලා ගේන්නේ නැහැ කියලා. එහෙම වෙන්නත් පුළුවන්නේ. මේ කට්‌ටියගේ හැටි එහෙම තමයි.

ප්‍රශ්නය - දැන් මේ වෙනකොට ඉහත කාරණය වගේම දේශපාලන සමාජයේ දැඩි ලෙස කතාබහට ලක්‌වන මාතෘකාවක්‌ හැටියට "චැනල් 4" සිද්ධිය නැවත ඉස්‌මතු වී තිබෙනවා. ජවිපෙ මේ සම්බන්ධයෙන් දරන ස්‌ථාවරය මොකක්‌ද?

පිළිතුර - ආණ්‌ඩුව දැන් හතර අතේ ගල් ගහලා හරියන්නේ නැහැ. ඒ පිළිබඳ පිළිගත්ත ජාත්‍යන්තර සම්මතයක්‌ අනුව පරීක්‍ෂණයක්‌ කරන්න ඕන. වගකිවයුතු පරීක්‍ෂණයක්‌ කරන්න ඕන. ඒකට විදේශ කටයුතු අමාත්‍යාංශයක්‌ තියෙනවා, තානාපති අංශ තියෙනවා මේ සියල්ල නිවරැදිව කළමනාකරණය කළ යුතුයි. යම්කිසි නාලිකාවකට ආණ්‌ඩුවක්‌ අර්බුදයට යවන්න පුළුවන් නම් ඒ ආණ්‌ඩුව කොහොමටවත් තිබිලා වැඩක්‌ නැහැ. මේ ආණ්‌ඩුව කන්න ඕන වුණාම කබරගොයා, තලගොයා කරගන්න වැඩ කරනවා. ආණ්‌ඩුව මේ වෙනකොට රට තුළ තිබෙන දැඩි ආර්ථික අර්බුදය මුදල් අර්බුදය හමුවේ කරගන්න දෙයක්‌ නැතුව ඉන්නේ. මිනිස්‌සු පඩි වැඩිකරලා ඉල්ලනකොට බඩු මිල බදු බර පහත දාන්න කියනකොට, ඒවාට උත්තර දෙන්න ආණ්‌ඩුවට අමාරුයි. හැබැයි ආණ්‌ඩුව තාමත් විශ්වාස කරනවා දේශප්‍රේමී රෙද්ද ඇඳගත්තොත් අනෙක්‌ සියලු අර්බුද වහගන්න පුළුවන් කියලා. ඒක නිසා එහෙම හතුරෙක්‌ නැත්නම්, එහෙම හතුරෙක්‌ හදලා හරි ආණ්‌ඩුව තමන්ට ගස්‌සගන්න බලනවා. මේ ආණ්‌ඩුව එහෙමත් කරනවා. එදා වේල පවතින්නේ එහෙමයි.

ප්‍රශ්නය - චැනල් 4 සිද්ධිය එවැනි දේශපාලන කාරණාවකට ලඝූ කරන්න පුළුවන්ද?

පිළිතුර - නැහැ මම එහෙම කියන්නේ නැහැ. මම කියන්නේ එවැනි සිද්ධි නඩත්තු කරලා දේශප්‍රේමී පෙනුම තියාගන්න උත්සාහ දැරිය හැකියි කියලයි. හැකිනම් මේ වෙනකොටත් ආණ්‌ඩුව වගකිවයුතු ක්‍රියාමාර්ගයක්‌ අරගෙන මෙය වැරැදි ප්‍රචාරයක්‌ කියන එක ජාත්‍යන්තරයට ඔප්පු කළ යුතුයි. ආපහු මම කියන්නේ හතර අතේ ගල් නොගහා මේක ගැන විධිමත් පරීක්‍ෂණයක්‌ කළ යුතුයි.

සාකච්ඡා කළේ උදේශ සංජීව ගමගේ
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.