චීන "හුනුවටයේ කතාව"

"ප්‍රේක්‍ෂකයාගේ සිත් ගන්නා නාටකීය අවස්‌ථා හා ප්‍රයෝග සහිත "රටහුනු කවය" මනුෂ්‍ය ජීවිතයෙහි හා සමාජයේ විප්‍රලාප උපහාසයට හා සිනාවට හසු කෙරෙන රචනාවකි. මෙහි අවසානයෙහි දක්‌නා ලැබෙන පුත්‍ර ප්‍රශ්නය විසඳන උපාය අවුරුදු 700 කට පමණ පෙර රචිත චීන නාටකයකින් ගත්තක්‌ යෑයි නාටක රචකයා කියයි. එය චීන නාටකයට පිවිසියේ උමංදාවේ පුත්‍ර ප්‍රශ්නයෙන් විය හැකිය". - මාර්ටින් වික්‍රමසිංහ (1967 දී)

හෙන්රි ජයසේනයන්ගේ "හුනුවටයේ කතාව" පළමු වරට නැරඹූ වහාම මසිතට නැගුණේ උම්මග්ග ජාතකයයි. (උමංදාවයි) එහි ඇත්තේ හුනුවටය නොව බිම ඇඳි ඉරකි. දරුවා තැබුණේ ඉර මතය. මාර්ටින් වික්‍රමසිංහයන්ගේ ඉහත සඳහන් විස්‌තරයේ එන චීන නාටකය ගැන ඇතිවූයේ කුහුළකි. මෑතක්‌ වනතුරුම ඒ හා සම්බන්ධ කිසිවක්‌ දැන ගැනීමට හැකිවූයේ නැත.

ඉඩ කඩ ලැබෙන පරිදි, චීනය හා සම්බන්ධ විවිධ ලිපි ලේඛන කියවන මට නොබෝදා එම චීන නාටකය හා සම්බන්ධ සෑහෙන විස්‌තරයක්‌ දැන ගැනීමේ හැකියාව ලැබිණි. මෙම ලිපිය වූ කලී එම තොරතුරු අළලා කරන ලද්දකි. පළමුවෙන් එම චීන නාටකයේ (ඔපෙරාවේ) එන කතා වස්‌තුව දැක්‌වීමට කැමැත්තෙමි. එය නම් කර ඇත්තේද හුනුවටයේ කතාව (Story of the Lime Ring) යනුවෙනි.

ශැන් හයිටැන් නමැති කාන්තාවගේ පියා මරණයට පත්වන්නේ ඇය කුඩා අවධියේදීය. පසුව වැන්දඹු මව රක්‍ෂා කරනු පිණිස මුලදී ඇයට ගණිකා වෘත්තියේ පිහිට සෙවීමට සිදුවිය. දෙවනුව "මා" නමැති ධනවත් පුරුෂයාගේ අනියම් භාර්යාව (විවාහ නොවූ බිරිඳ - concubine) බවට පත්වන්නීය. එම පුරුෂයාට දාව ඇය පුතෙකු ද ප්‍රසූත කළාය. හයිටැන්ගේ මෙම වාසනාවන්ත දිවිය දුටු සහෝදරයා පිහිට පතාගෙන ඇය ළඟට පැමිණියේය. එහෙත් අතීතයේදී ඔහු තමාට කොපමණ වෙනස්‌කම් හා අවමන් කළේ දැයි මතකයට නගාගත් ඇය, ඔහුට උදව් කිරීමට කැමැති වූයේ නැත. මාගේ ප්‍රධාන බිරිඳ (විවාහක බිරිඳ) දැඩි ලෙසට හයිටැන් කෙරේ ඊර්ෂ්‍යා සහගත වූ කාන්තාවකි. බොරු අනුකම්පාවක්‌ මෙම තරුණයා කෙරේ දැක්‌වූ ඇය රෙදි පිළි හා ආභරණ කීපයක්‌ ඔහුට පරිත්‍යාග කිරීමට හයිටැන් පෙළඹුවාය. ඇයගේ ඊළඟ පියවර වූයේ හයිටැන්ගේ ආදරවන්තයකුට තෑගි දුන් බවට මා ට ගතු කීමය·

එහෙත් සත්‍ය වශයෙන්ම අනියම් පුරුෂයකු සිටියේ මා ගේ විවාහක බිරිඳටය. ඔහුත් සමඟ එකතුව ඇය තම සැමියාට වස දීමට කුමන්ත්‍රණය කළාය. එහි ප්‍රතිඵලයක්‌ ලෙස මා ජීවිතක්‍ෂයට පත්විය. ඉන්පසු මෙම කෲර කාන්තාව, හයිටැන්ගේ පුත්‍රයා, තමාගේ පුතකු බවට අයිතිවාසිකම් කියන්නට විය. ඒ සඳහා අසල්වැසියන්ට හා වින්නඹුවකට අල්ලස්‌ දී ඒ බව තහවුරු කිරීමට ඇය ක්‍රියා කළේ කෝරළයේ අධිකරණය වෙත මෙම අවනඩුව ඉදිරිපත්වූ බැවිනි. අවුල් වූ හිසක්‌ ඇති කෝරළ නඩුකාරයාට මෙම නඩුවේ සැබෑ තත්ත්වය වටහා ගැනීමට නොහැකි විය. වාසනාවකට මෙන් අවසානයේ අභියාචනයකින් පසු මෙය විස¹ලීමට භාර වූයේ බාඕ ෂෙන් (ආදිපාද බාඕ) ටය. (මොහු කවුරුද යන්න පසුව දැක්‌වේ).

බාඕ නඩුව අසා දිය නොගැසූ පිළිස්‌සූ හුනු (Quicklime) වලින් ඇඳි කවයක්‌ තුළ දරුවා තැබීමට අණ කළේය. ඉන්පසු අරගලකාරී කාන්තාවන් දෙදෙනාට, දරුවා කවයෙන් පිටතට ඇදගැනීමට නියම කෙරිණි. හයිටැන් දරුවා රිදවීමට නොකැමැතිව එය ප්‍රතික්‍ෂේප කළාය. එහෙත් දුෂ්ඨ කාන්තාව කිසිදු තෙත් ගතියකින් තොරව දරුවා කවයෙන් පිටතට ඇද ගැනීමට වහාම ඉදිරිපත් විය. ඒ අනුව දරුවාගේ සැබෑ මව කවුරුන්දැයි බාඕ හැඳින ගත්තේය. ඉන් නොනැවතුනු ඔහු, මා ගේ මරණය පිළිබඳ රහසද අනාවරණයකොට ගති. විත්තිකරුවනට දඬුවම්ද හයිටැන්ට දරුවාද හිමි විය.

මෙම කතාව ඇතුළත් චීන ඔපෙරාව මීට වසර 750 කට පමණ පෙරදී වේදිකා ගත කෙරුණකි. අද පවා චීනයේ මෙය ඉතා ජනප්‍රියය.

ඔපෙරාව තුළින් කතාව ඉදිරිපත් වුවද එහි එනම්, කතාන්දරයේ සැබෑ සම්භවය සිදුව ඇත්තේ කොහිද? ඒ ගැන විමසා බැලීමේදී අපට උතුරු සොන් රජ පෙළපත (ක්‍රි.ව. 960 - 1127) දක්‌වා යැමට සිදුවේ. චීන ඉතිහාසයේ මෙම රාජ සමය තුළදී ඉතා කීර්තිමත් නඩුකාරයෙක්‌ විසුවේය. අන්හුයි ප්‍රාන්තයේ උපත ලද ඔහු වූ කලී ඉහත සඳහන් වුණ බාඕ ෂෙන් හෙවත් ආදිපාද බාඕය. එවකට අගනුවර වූ කායිෙµන්හි ඉහළ අධිකරණ රාජකාරී කටයුතු වල නියෑළීමට පෙර ඔහු කෝරල හා ප්‍රාදේශීය මට්‌ටමේ මහෙස්‌ත්‍රාත්වරයකු ලෙස කටයුතු කළේය. අවසානයේ ඔහු අධිරා- ප්‍රිවි කොන්සල්වරයකු විය. මෙම ධුරය වූ කලී එක්‌ අතෙකින් අගමැතිවරයකුගේ තත්ත්වයට සමාන වූවකි.

ඔහු අවංක, සෘජු, කෙලින් වැඩකරන චරිතයක්‌ ඇත්තකු ලෙස ප්‍රසිද්ධියට පත්වී සිටියේය. බාඕ බලවත් හා ධනවත් අයගේ වැරදි ක්‍රියා අනාවරණය කළා පමණක්‌ නොව, අධිකරණ කටයුතු වල නියෑලි නිලධාරීන්ටද වරද දුටු තැන දොස්‌ පැවරීමට පසුබට වූයේ නැත. යුක්‌තියට පටහැනිව යා හැකි අවස්‌ථාවලදී අධිරාජයා ගැන වුවද එහි වෙනසක්‌ නොවීය. මෙසේ නඩුකාරයෙක්‌ වශයෙන් බාඕගේ දස්‌කම් හා වීරකම් නිසා ඔහු නොමියෙන චරිතයක්‌ බවට පත්විය.

සාම්ප්‍රදායී චීන අධිකරණ ක්‍රියාවලියට අනුව සාක්‍ෂිකරුවන් ප්‍රශ්න කිරීම, සාක්‍ෂි පරීක්‍ෂා කිරීම, පරීක්‍ෂණ පැවැත්වීමටද නඩුකාරයන්ට බලය ඇති අතර, පැමිණිලි මෙහෙයවීමට හා රහස්‌ පරීක්‍ෂණයේ යෙදීමටද විනිශ්චය ලබා දීමටද ඔවුනට හැකිය. "ආදිපාද බාඕගේ නඩු" (Duke Bao's Cases) නමැති ග්‍රන්ථයට ඔහු විසින් විභාග කෙරුණු සිද්ධීන් ඇතුළත් කතාන්තර සියයක්‌ පමණ ඇතුළත් වී ඇත. අහිංසකයන් අගතියෙන් ගලවා ගැනීමත්, ඉතා දුෂ්ඨ අපරාධකරුවන්ගේ කූටෝපායයන් හෙළිකොට දැඩි දඬුවම් පමුණුවා ලීමත්, කරනුයේ, මානව චරියාව කෙරේ හෙළනු ලැබූ තීක්‍ෂණ දැක්‌මත්, හෝඩුවාවන් ඔස්‌සේ ඉතා දක්‍ෂ ලෙස ලුහුබැඳීමත්, එහිලා හුවා දක්‌වා තිබේ.

ඉහත සඳහන් කෙරුණ "හුනුවටයේ කතාව" වූ කලී මෙම ග්‍රන්ථයේ එන එක්‌ සිද්ධියක්‌ පමණි. ඒ අනුව මෙය සත්‍ය පුවතක්‌ ලෙසද සැලකිය හැකිය. බර්ටෝල් බ්‍රෙෂ්ට්‌ තම නාටකය වන ඔයෑ The Caucasian Chalk Circle හි එන පුත්‍ර ප්‍රශ්නය විසඳන උපාය රැගෙන ඇත්තේ, ඔහුම ප්‍රකාශකොට ඇති පරිදි ඉහත සඳහන් ග්‍රන්ථයේ එන කතාව පාදක කොටගත් චීන "හුනුවටයේ කතාව" නම්වූ ඔපෙරාවෙනි. හෙන්රි ජයසේනයන්ගේ නාටකය වනාහි බ්‍රෙෂ්ට්‌ගේ නාටකයේ පරිවර්තනයකි.

බාඕ ෂෙන් සම්බන්ධ කතාවක්‌ ඇසුරෙන් දෙවන ඔපෙරාවක්‌ද වේදිකා ගතකොට ජනප්‍රිය වී ඇත. එය නම් කර ඇත්තේ "චෙන් ෂිමෙයි මරණයට පත්කිරීම" (Execution of Chen Shimei) යනුවෙනි. එහි එන කතා පුවත මෙසේය.

ශිල්ප හදාරන දුප්පත් තරුණයකු වන චෙන් ෂිමෙයි විවාහ වන්නේ චින් සියෑන්ග්ලියන් නමැති තරුණියක සමඟය. ඔහුගේ අධ්‍යයන කටයුතු සපුරා ගැනීමට ඇය බෙහෙවින් දුක්‌ පීඩා විඳගනිමින් කටයුතු කළාය. රාජකීය විභාග වලට පෙනී සිටීම සඳහා ඔහු අගනුවරට යන්නේ, ඇය කඳුළු පිරි දෙනෙතින් බලා සිටියදීය. එහිදී චෙන් එම විභාග සියල්ලෙන්ම උසස්‌ අන්දමින් සමත් වූයේ ප්‍රථම ස්‌ථානයටද පත්වෙමිනි. මෙහිදී ඔහු අධිරාජයාගේ දියණිය විවාහ කර ගැනීම පෙරදැරි කොට තමාට භාර්යාවක හා දරු දෙදෙනකු සිටින බව සඟවාලයි.

මේ අතර, චෙන් විසින් අත්හැර දමන ලද භාර්යාව තම දරු දෙදෙනාද කැටුව ඔහු ගැන සොයා බැලීමට අගනුවරට පැමිණියාය. තම තත්ත්වය රැක ගැනීම සඳහා භාර්යාව හා දරු දෙදෙනා මරා දැමීමට චෙන් කුලියට ගත් මිනීමරුවකුට පැවරීය. එහෙත් කරුණාවන්ත හදවතක්‌ ඇති මිනීමරුවා තම අදහස වෙනස්‌ කර ගන්නේ ඇයගේ සැබෑ කතාව ඇසීමෙන් පසුවය. ඉන් නොනැවතුන ඔහු ඇයගේ ස්‌වාමියාට එදිරිව පැමිණිලි කිරීමට බාඕ ෂෙන් ගේ උසාවියට සියෑන්ග්ලින් යොමුකරවීය.

බාඕ නඩුකාරතැන එම අසරණ ස්‌ත්‍රියට පිහිට වීමට ඉදිරිපත් විය. අධිරාජයාගේත්, කුමරියගේත් බලපෑම් නොතකා ඔහු වංක චෙන්ට එදිරිවූ පැමිණිල්ල විභාග කොට ඔහුට මරණීය දඬුවම් ලබා දුන්නේය.

බාඕ ෂෙන් සම්බන්ධව වඩාත් සුප්‍රසිද්ධියට පත් සිදුවීමක්‌ වන්නේ, සොන් අධිරාජකු වන රෙන් සොන්ග් ගේ ප්‍රියතම අමාත්‍යවරයා වූ වෑන් කුයි ට එදිරිව ඔහු විසින් ගොනු කළ චෝදනා මාලාවය. වෑන් රාජකාරි වශයෙන් නියුතුවී සිටියේ බදු එකතු කිරීමේ හා ප්‍රවාහනය පිළිබඳ වූ කාර්යයන්හිය. ඔහු ප්‍රසිද්ධියට පත්වී තිබුණේ දුප්පත් ජනයා පෙලන, ඔවුනට පිහිටක්‌ නොවන හා නීතිය අභිබවා නිර්දය ලෙස ක්‍රියාකරන නරුමයකු වශයෙනි. වෑන් කුයි ඇමැත්තාට එදිරිව බාඕ චෝදනා පත්‍රයක්‌ පිළියෙල කළේය. එහෙත් අධිරාජයා එය එතරම් ගණනකට නොගෙන, වෑන් කුයි, පළමුවැන්නට දෙවැනි නොවන හා ඒ හා සමානව වැදගත් වූ වෙනත් තනතුරකට මාරු කරනු ලැබීය. බාඕ දෙවන වරදට ඔහුට එදිරිව චෝදනා ඉදිරිපත් කළේය. පලක්‌ නොවූයෙන් තෙවැනි, සිව්වැනි, පස්‌වැනි, හයවැනි හා හත්වැනි වරටද බාඕ නොකඩවාම චෝදනා එල්ල කළේ, අධිරාජයා විසින් ඔහු නෙරපා හැර ඔහුට විරුද්ධව ඇති චෝදනා විභාගයට ගන්නා තුරුය·

ආදිපාද බාඕ තමාටම මෙන්ම, පවුලේ සාමාජිකයන්ටද අනුගමනය කළේ ඉතා දැඩි පිළිවෙතකි. ඔහුගේ දිවි තුරන් වීමට පෙර බාඕ ගල් පුවරුවක "පවුලේ විනය" සම්බන්ධයෙන් නීති මාලාවක්‌ කැටයම් කර තැබීය. එහි මෙසේද සඳහන් විය.

"මගෙන් පැවත එන්නන් නීතියට අකීකරු වුවහොත් හා රාජකාරී තත්ත්වය භාවිතකොට ගෙන වාසි ලබා ගතහොත්, ඔහු කෙදිනකවත් ආපසු නිවසට නොපැමිණිය යුතු අතර. මරණින් පසු මුතුන්මිත්තන්ගේ සොහොන් බිමේ වළ නොදැමිය යුතුය. මගේ කැමැත්තට එදිරිව ගිය කෙනකු, තව දුරටත් මගෙන් පැවත එන්නකුසේද නොසැලකිය යුතුය".

බාඕ ගේ බෑණනුවකු නීතියට පටහැනිව කටයුතු කිරීම නිසා ඔහු පවුලෙන් නෙරපා හැරි බව එක්‌ ආරංචියකින් කියෑවේ.

ආරියපාල මුදලිගේ

(චීනය ගැන ලියෑවුණ ලිපි හා පුවත් ඇසුරෙනි)

 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.