සුද්දෙක්‌ ලෙස ඔබ අමතන සඳුන්


ප්‍රවීණ නාට්‍ය නිෂ්පාදකවරයකු මෙන්ම පළපුරුදු චිත්‍රපට අධ්‍යක්‍ෂවරයකු වූ සුගත් සමරකෝන් අධ්‍යක්‍ෂණය කරන ලද ''විජය කුවේණි'' චිත්‍රපටය මැයි 6 වැනිදා තිරගත කෙරේ.

එහි එන වැදගත්ම චරිතයක්‌ වන සිංහබාහු චරිතය නිරූපණය කරන්නේ පළපුරුදු දක්‍ෂ නළුවෙකි. ඔහු සඳුන් විජේසිරිය. වේදිකා නාට්‍ය කිහිපයකම විදේශිකයන්ගේ චරිත රඟ පෑ සඳුන් විඡේසිරිට සුද්දන් සිංහල කථා කරන විලාසය එලෙසින්ම කථා කිරීමේ දක්‍ෂතාවක්‌ ඇත.

විදේශිකයන්ගේ චරිත රඟපාන නළුවන් අප අතර ඇතත් ඒ විදේශිකයන් මෙන්ම සිංහල උච්චාරණය ඒ කාටවත් කළ නොහැකිය. එහෙත් සඳුන් හට ඒ හැකියාව ලැබී ඇත.

නාට්‍ය නිෂ්පාදකවරයෙක්‌ තමාගේ නාට්‍යයේ සුද්දෙක්‌ ගේ චරිතයක්‌ ඇතොත් අනිවාර්යයෙන්ම සොයන්නේ සඳුන් විඡේසිරිය. නිෂ්පාදකවරයා නවකයෙක්‌ද, පළපුරුදු අධ්‍යක්‍ෂවරයෙක්‌ද කියා ඔහු නොබලයි.

විදේශිකයන්ගේ චරිත රැගත් නාට්‍ය මා නරඹා ඇති බැවින් සඳුන් රඟ පෑ ''සමුද්‍ර දේවි'', ''ශ්‍රී වික්‍රම'' නාට්‍ය නැරඹූ අය මගේ මතයට එකඟවනු නිසැකය. ඔහු පෙනුමෙනුත් සුද්දෙක්‌ හා සමාන බැවින් නාට්‍ය නිෂ්පාදකවරු ඔහුට එම චරිත පවරනවා විය හැකිය.

ඇඳුමෙන්, ගමනින් කථාවෙන්ම සුද්දකු වූ සඳුන් ''සමුද්‍රදේවි'' නාට්‍යයේ ''ගෝවේ..... ගෝවේ.... ගෑනු පරාදයි... රූපේ.....රූපේ මා හද පිනායය'' ගීතය ගායනා කරමින්, සුද්දන් නටන්නා සේ නැටුමක්‌ ඉදිරිපත් කරන විලාසය කදිමය. එම චරිත නිරූපණයේදී සඳුන් විඡේසිරි කෙනෙක්‌ අපි නොදුටුවෙමු.

සඳුන් ඔයා චරිත නිරූපණයක යෙදෙන විට අප දකින අමුත්ත කුමක්‌ද?

''අපි චරිතයක්‌ නිරූපණය කරන්නේ ඒ චරිතය මිස සඳුන් විෙ-සිරි නෙවෙයිනේ. අපි ඒ බව කලින් සිතට ගත යුතුයි. අපි දර්ශන තලයේ සිටින්නේ චරිතයට සමවැදිලා. මොහොතකටවත් ඉන් මිදෙන්නෙ නැහැ. අංග රචනා කළ පසු අපි ඒ චරිතයෙන් මිදෙන්න නැහැ. අනවශ්‍ය විහිළුවලට යන්නෙත් නැහැ. එවන් විහිළු කරන අයට මගෙන් සමාවකුත් නැහැ. උපකාරයකුත් නැහැ. අපි ඒ චරිතයට ආරූඪ වූ විට අපි අපම නොවිය යුතුයි. එවිට සාර්ථක චරිත නිරූපණයක්‌ වනවා. වේදිකා නළුවෙක්‌ හෝ නිළියක්‌ මේ ක්‍රමය අනුගමනය කරන්නේ නම් සාර්ථක චරිත නිරූපණයක්‌ වේවි.

ඔහුගේ මෙම පිළිතුරත් සමග මට ටෝනි රණසිංහ නිෂ්පාදනය කළ ''ජුලියස්‌ සීසර්'' නාට්‍යයේ රඟ පෑ ගාමිණී ෙµdන්සේකා සිහියට නැගුණි. එහි චරිතය ආරූඪ වූ පසු ගාමිණී ෙµdන්සේකාද එලෙසය.

දැනට වේදිකාවේ රඟපාන සිංහල නළුවන් අතරින් ඉංග්‍රීසි දෙබස්‌ උච්චාරණය කරමින් සුදු ජාතීන්ගේ චරිත දක්‍ෂ අන්දමින් රඟපාන එකම නළුවා ඔබද?

ඇත්තෙන්ම ඔව්· ගුවන්විදුලියේ, වේදිකාවේ, ටෙලි නාට්‍යවල හෝ සිනමාවේ මාත් සමග විදේශීය චරිත එපරිද්දෙන්ම රඟපෑමට හැකි ඉංග්‍රීසි දෙබස්‌ එලෙසින්ම හසුරුවමින් රඟ පෑ හැකි කෙනෙක්‌ සිටී නම් ඉදිරිපත්වන ලෙසට මම අභියෝග කරනවා. සමහරු ඉංග්‍රීසි චරිත රඟ පාන්නේ ''නෝ ප්‍රොබ්ලම් ඕකේ මචං'' කියන වචන දෙක පාවිච්චි කරමින් විතරයි දන්නේ ඒ ටික විතරනේ. ඒ අය මම අහුලාගත්ත ඉංග්‍රීසි වචන පාවිච්චි කරන නළුවෙක්‌ නොවේ.

කලාකරුවෙක්‌ ලෙසින් සඳුන්ට නම් වූ නාම ගොඩාක්‌ තිබෙනවා. ''සාහිත්‍ය කලා විභූෂණ දේශබන්දු ලංකා පුත්‍ර'' ආචාර්ය කලා භූෂණ මේ අතරින් ඔබව මම කවුරු ලෙසට හඳුන්වා දෙන්නද?

මගේ හැකියාවන්, උගත්කම අනුව, මා කරන ලද ක්‍රියා අනුව ලබන නම්බු නාමනෙ. ඔය එකක්‌වත් නොමැතිව සඳුන් විඡේසිරි කියනවාටයි මම ආශා.

නවසිය හැටේදී ''අසෝක මාලා'' සහ ''කුඩු කෑ විත්ති'' නාට්‍ය දෙකේ රඟපාමින් සඳුන් වේදිකාවට ප්‍රවිෂ්ට වෙද්දී ඔහු සිටියේ දෙහිවල මධ්‍ය මහා විද්‍යාලයේ සරසවි පිවිසුම්පෙළ සිසුවෙක්‌ ලෙසිනි.

පාසල් සමයේදීම කලාව කෙරෙහි ලොල් වූ සඳුන් නැට්‌ටුක්‌කාරි, පොකුරු වැස්‌ස, ඔතෙලෝ, ජුලියස්‌ සීසර්, වැනීසියේ වෙළෙන්දා, සබඳ මම රස්‌පුටින්, කොමාන්ඩෝ, දියසේන, හැම්ලට්‌, හරිම බඩුහයක්‌, ආනන්ද ජවනිකා, බිසෝ, සමුද්‍රදේවි, ශ්‍රී වික්‍රම, මුහුණු දෙකක්‌, මුරුගසන්,නොනිවෙන ගිනි, නීරෝගෙ රඟමඩල, එලිසබෙත්, මළවුන්ගෙන් ආදී නාට්‍ය සමගින් නාට්‍ය සිය ගණනකට වඩා රඟ පෑ ඇති නළුවෙකි.

වේදිකාව පමණක්‌ නොව ගුවන් විදුලි නාට්‍ය ශිල්පියෙක්‌ ලෙසින්ද කටයුතු කළ ඔබ රඟ පෑ ගුවන් විදුලි නාට්‍ය කිහිපයක්‌ මතක්‌ කරන්න.

වසුන්දරා, වීදිය බණ්‌ඩාර, මිරිඟුව මා රඟ පෑ නාට්‍ය අතරින් ආශා කළ නාට්‍යය කිහිපයක්‌ විතරක්‌ සඳහන් කරන්නම්. දිගටම කීවොත් ප්‍රියශාන්ත පත්තරයක්‌ම ඕන වේවි මා ගැන පළ කරන්නට.

කටහඬ සපයන කලා ශිල්පියෙක්‌ ලෙසින්ද ඔබ දස්‌කම් පෙන්වා තිබෙනවා නේද?

ඔව්. ඔෂින්, ශාන්ති, මහ නගර්, ඉෂුවාරා, රාමායනය, මහගෙදර, ප්‍රවීණා ඔය මතකයේ ඇති කිහිපයක්‌ පමණයි.

සිනමාවට ඔබ සම්බන්ධ වූයේ කෙසේද?

ජී. ඩී. එල්. පෙරේරා මා රඟ පෑ නාට්‍යයක්‌ නරඹලා මට ඇරයුම් කළා ''සැඩොල් කඳුළු'' චිත්‍රපටයට ඉන් පස්‌සේ ශූරයා වීරයා, තණ්‌ශා ආශා, රෝමියෝ, ජුලියට්‌ කථාවක්‌, ගුරුගෙදර, ඈත මෑත ළංවී, උඩුසුළඟ, කෙළි මඬල, චක්‍රායුධ, සඳ යහනට සමගින් චිත්‍රපට 25 ක විතර රඟ පා තිබෙනවා.

සඳුන් විඡේසිරි යනු නළුවෙක්‌ම පමණක්‌ නොවේ. ඔහු ග්‍රන්ථ කතුවරයෙක්‌ද වේ. පූජිත පාද, මහ නගරය, හිරු නොදුටු නර්තනය නමින් කෙටි කථා ග්‍රන්ථ කිහිපයක්‌ද සුපුෂ්පිත අරණක හොඳ පද වැල් නමින් පද්‍ය ග්‍රන්ථයකුත් නිකුත් කර ඇත.

ඉදිරියට විල්සන් ගුණරත්නගේ චරිත 8 ක්‌ නාට්‍යයේ සම්පූර්ණයෙන්ම ඉංග්‍රීසි බසින් කථා කරන චරිතයක්‌ සහ පද්මසිරි කොඩිකාරගේ කෝරලයේ මහත්තයා නාට්‍යයේ උප ඒජන්තවරයෙක්‌ ලෙසින් ඉංග්‍රීසි බසින්ම චරිතයක්‌ කරනවා යෑයිද සඳුන් විඡේසිරි පැවසීය.

අවසන් වශයෙන් සඳුන් රඟ පෑ ටෙලි නාට්‍ය කිහිපයකුත් සිsහිපත් කළ යුතුව ඇත. ආශීර්වාද, සාම පූජා, නොනිමි වසන්තය, ජයතු කිස්‌තු, කන්දෙ ගෙදර, පාට සරුංගල්, ආයම්මාවරු, අවපාතය, පුංචි නෝනා, රුපියල් ශත, චල අචල, හතර කේන්ද්‍රය, ඇතුළු ප්‍රසංගික සහ ඒකාංගික ටෙලි නාට්‍යද ඒ අතර වේ.

අද ප්‍රේක්‍ෂකයන් රූපවාහිනියෙන් ඈත්වෙලා කියලා මතයක්‌ තිබෙනවා. ඔබ ඒ ගැන කියන්නේ කුමක්‌ද?

කවුරු හරි රචනා කළ ගැඹුරක්‌ නැති පොතක්‌ පාදක කරගෙන නිර්මාණයක්‌ හදලා නළුවෙක්‌ හරි නිළියක්‌ හරි නොපැමිණියහොත් දර්ශන තලයේදීම අධ්‍යක්‍ෂවරයා එය වෙනස්‌ කරනවා. එතෙක්‌ ගලාගෙන ආ කථාව වෙනත් පැත්තකට අරගෙන යනවා. ප්‍රේක්‍ෂකයා අන්ද මන්ද වෙනවා. ප්‍රේක්‍ෂකයා රූපවාහිනියෙන් ඈත් වෙන්න හේතුව ඒකයි.


සටහන සහ ඡායාරූප
හෙන්රි ප්‍රියශාන්ත මෙන්දිස්‌
 

 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.