අම්පාරේ ඉපැරණි දාගැබක්‌
ඩෝසර් කර නිධන් සෙවූ 7ක්‌ දැලේ

අම්පාර විශේෂ - සුසන්ත අමරබන්දු

අම්පාර තිරුක්‌කෝවිල් පොලිස්‌ බල ප්‍රදේශයේ ඌරකිතයි ප්‍රදේශයේ ඉපැරණි දාගැබක්‌ ඩෝසර් කර නිධන් හාරමින් සිටි ද්‍රවිඩ ජාතිකයන් 07 දෙනකු ඊයේ (25 වැනිදා) සවස එම ඩෝසර් යන්ත්‍රය සමඟ පොලිසිය මගින් අත්අඩංගුවට ගන්නා ලදී. මෙලෙස අත්අඩංගුවට පත්වූයේ තිරුක්‌කෝවිල් ප්‍රදේශයේ පදිංචිකරුවන් පිරිසකි. එක්‌තරා ජාත්‍යන්තර ස්‌වෙච්ඡා සංවිධානයකට අනුබද්ධව අම්පාර කාර්යාලයක සේවය කරන අයෙකුද සිටිති.

මොට්‌ටයාගල ඉපැරණි පුදබිමට මඳක්‌ දුරින් පිහිටි විශාල ප්‍රමාණයේ ඉපැරණි දාගැබක්‌ වන මෙම දාගැබ වටා ඩෝසර් කර එම ගඩොල් හා පස්‌ බිමට සමතලා කර තිබේ. ඉන් පසු දාගැබ ගර්භයේ මැද කොටස දෙකට වෙන්වෙනසේ ගැඹුරට හාරා නිධන් සොයා තිබේ. මෙලෙස මෙම ඉපැරණි ගර්භය හෑරීමේදී පැරණි මැටි භාජන කිහිපයක්‌ ඇතුළු පුරාවස්‌තු රැසක්‌ද හමුව තිබේ.

මොට්‌ටයාගල ඉපැරණි පුදබිමේ තිබුණු දාගැබක්‌ මීට මාස කිහිපයකට ඉහතදී මුළුමනින්ම ඩෝසර් කර වී වගාවට බිම් සකස්‌ කර තිබිණි. මෙම දාගැබද ඊට මඳක්‌ දුරින් පිහිටි එයට වඩා විශාල ප්‍රමාණයේ දාගැබකි. සැකකරුවන් 07 දෙනා සමඟ යතුරු පැදියක්‌ හා ඩෝසර් යන්ත්‍රයක්‌ද අත්අඩංගුවට ගෙන තිබේ.

අම්පාර පොලිස්‌ විශේෂ කාර්යාංශයට ලැබුණු තොරතුරක්‌ මත අම්පාර ජ්‍යෙෂ්ඨ පොලිස්‌ අධිකාරි අජිත් රෝහණ මහතාගේ උපදෙස්‌ මත අක්‌කරපත්තුව සහකාර පොලිස්‌ අධිකාරි ජයන්ත රත්නායක මහතාගේ මෙහෙයවීමෙන් තිරුක්‌කෝවිල් පොලිස්‌ ස්‌ථානාධිපති පො.ප. චමින්ද තෙන්නකෝන් මහතා ඇතුළු පොලිස්‌ නිලධාරීන් හා අම්පාර පුරාවිද්‍යා පොලිසියේ නිලධාරීන් විසින් මෙම වැටලීම සිදුකර තිබේ.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.