අසාද් සාලි මහතාට අධිකරණයේ
පෙනී සිටින ලෙස දැනුම් ෙදයි


හේමන්ත රන්දුණු

දවටගහ මුස්‌ලිම් පල්ලියේ ආගමික කමිටු සභාපති හසන් මවුලානා මහතාට තර්ජනය කළ බව කියන සිද්ධියක්‌ සම්බන්ධයෙන් කරුණු ඉදිරිපත් කිරීම සඳහා කොළඹ නගර සභාවේ හිටපු නියෝජ්‍ය නගරාධිපති අසාද් සාලි මහතාට අධිකරණය ඉදිරියේ ලබන බදාදා (27 වැනිදා) පෙනී සිටින ලෙස කොළඹ අපරාධ කොට්‌ඨාසය දැනුම් දී ඇත.

හලාල් ඉවත් කර ගැනීමට එරෙහිව කටයුතු කරන මෙන් දවටගහ පල්ලියේ ආගමික කටයුතු සඳහා පැමිණෙන මුස්‌ලිම් ජාතිකයන්ට නියෝග කරන ලෙස කියමින් අසාද් සාලි මහතා හසන් මවුලානාගේ ජංගම දුරකථනය වෙත කෙටි පණිවුඩයක්‌ එවා තිබේ.

එහෙත් හසන් මවුලානා එම ඉල්ලීම සැලකිල්ලට ගෙන නැත. පසුව අසාද් සාලි මහතා හසන් මවුලානාට කිහිප අවස්‌ථාවකදී තර්ජනය කළ බව ඒ මහතා කොළඹ අපරාධ කොට්‌ඨාසය වෙත කළ පැමිණිල්ලේ සඳහන්ව තිබේ.

එහෙත් හසන් මවුලානා මහතා අපරාධ කොට්‌ඨාසය වෙත ඊයේ (22 වැනිදා) පැමිණ ප්‍රකාශ කර ඇත්තේ මෙම පැමිණිල්ල තමන්ට ඉල්ලා අස්‌කර ගැනීමට අවශ්‍ය බවයි.

ඒ අනුව මෙම සිද්ධියට සම්බන්ධ දෙපාර්ශ්වය අධිකරණය වෙත ගෙන්වා එය සමථයකට පත් කර ගැනීමට පියවර ගන්නා බව අපරාධ කොට්‌ඨාස ආරංචි මාර්ග කියා සිටියේය.

 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.