අසාද්සාලි අත්අඩංගුවට ගතහොත්
ලක්‍ෂ 10 ක ශරීර ඇප මත මුදාහරින්නැයි නියෝග


සමන්ත ඉලේපෙරුම

කොළඹ අපරාධ කොට්‌ඨාසය මගින් පවත්වනු ලබන විමර්ශනයකට අදාළව ජාතික සමගි පෙරමුණේ මහ ලේකම් අසාද්සාලි මහතාව අත්අඩංගුවට ගැනීමක්‌ සිදුවුවහොත් රුපියල් ලක්‍ෂ 10 ක්‌ වටිනා ශරීර ඇප දෙකක්‌ මත මුදාහරින ලෙස කොළඹ ප්‍රධාන මහෙස්‌ත්‍රාත් රශ්මි සිංගප්පුලි මහතා ඊයේ (28 දා) නියෝග කළේය.

කොළඹ අපරාධ කොට්‌ඨාසය මගින් තමන්ව අත්අඩංගුවට ගෙන ඇප ලබා ගත නොහැකි චෝදනා සඳහන් කරමින් අධිකරණයට ඉදිරිපත් කිරීමට සූදානමක්‌ පවතින හෙයින් සුදුසු ඇපයක්‌ මත මුදා හරින ලෙසට නියමකරන ලෙස ඉල්ලා අසාද් සාලි මහතා ගොනුකරනු ලැබූ අපේක්‍ෂිත ඇප අයදුම්පතක්‌ කෙරෙහි සැලකිලිමත් වෙමින් මහෙස්‌ත්‍රාත්වරයා එලෙස නියෝග කළේය.

අපේක්‍ෂිත ඇප අයදුම්පත්‍රය කැඳවනු ලැබූ අවස්‌ථාවේදී කුරුඳුවත්ත පොලිස්‌ ස්‌ථානාධිපති සමග එක්‌වූ කොළඹ අපරාධ කොට්‌ඨාසයේ ස්‌ථානාධිපතිවරයා කරුණු දක්‌වමින් දවටගහ මුස්‌ලිම් දේවස්‌ථානයේ පූජක හසන් මව්ලානා මහතා කළ පැමිණිල්ලක්‌ අනුව ඇප අයදුම්කරුට එරෙහිව මෙහි විමර්ශන පවත්වන බවත් ඒ සම්බන්ධයෙන් ඔහුගෙන් ප්‍රකාශ ලබා ගැනීමට අවශ්‍යව ඇති අතර ඔහු අත්අඩංගුවට ගැනීමට අවශ්‍යතාවක්‌ නොමැති බවත් කියා සිටියේය.

එහිදී අයදුම්කරු වෙනුවෙන් පෙනී සිටි ජනාධිපති නීතිඥ අනිල් සිල්වා මහතා කරුණු දක්‌වමින් තම සේවාදායක ඇප අයදුම්කරුව අත්අඩංගුවට ගැනීමට අවශ්‍ය නැතිනම් ඇප අයදුම්පත ඉල්ලා අස්‌කර ගැනීමට සූදානම් බවත් ඒ පිළිබඳ පොලිසියේ දැනුම් දීම ඇප අයදුම් ගොනුවේ සඳහන් කරන ලෙසත් ඉල්ලා සිටියේය.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.