විදුලි බිල වැඩි කිරීමට එරෙහිව
එජාප - ජවිපෙ උද්ඝෝෂණ


අකිත පෙරේරා සහ සිරිමන්ත රත්නසේකර

විදුලි ගාස්‌තු ඉහළ දැමීමට එරෙහිව එක්‌සත් ජාතික පක්‍ෂය සහ ජනතා විමුක්‌ති පෙරමුණ උද්ඝෝෂණ පැවැත්වීමට තීරණය කර ඇත.

මෙවර අලුත් අවුරුද්ද නිමිත්තෙන් ආණ්‌ඩුව ජනතාවට දුන් ලොකුම තෑග්ග වන විදුලි බිල වැඩි කිරීමට එරෙහිව උද්ඝෝෂණ මාලාවක්‌ ආරම්භ කරන බව එක්‌සත් ජාතික පක්‍ෂයේ කළුතර දිස්‌ත්‍රික්‌ පාර්ලිමේන්තු මන්ත්‍රී අජිත් පී. පෙරේරා මහතා පැවසීය.

ලබන මැයි පළමුවැනිදා පැවැත්වෙන මැයි රැලියේදී ද විදුලි ගාස්‌තු ඉහළ දැමීම සම්බන්ධව විරෝධය දැක්‌වීමට කටයුතු කරන බව ජාතික වතු කම්කරු ශාලාවේදී ඊයේ (18 වැනිදා) පැවැති මාධ්‍ය හමුවේදී මන්ත්‍රීවරයා කියා සිටියේය.

විදුලි බිල ඉහළ දැමීම සම්බන්ධයෙන් මහජන අදහස්‌ ලබා ගන්නා බව කියමින් මහජන උපයෝගිතා කොමිසම ජනතාව රැවැට්‌ටූ බවත් එහි සාමාජිකයන් ආණ්‌ඩුවේ හිතවතුන් බවත් හෙතෙම පැවැසීය.

ගාස්‌තුව ඉහළ දැමීම නිසා දිළිඳු සහ පහළ මධ්‍යම පාන්තිකයන් දැඩි අසීරුතාවට පත්වන බව ද පැවසූ අජිත් පී. පෙරේරා මහතා මෙම වැඩිකිරීමට එරෙහිව වීදි බැසීමට ජනතාව ඒකරාශී කරවන බව ද පැවැසීය.

අතිශයින්ම අසාධාරණ මෙන්ම අනුකම්පා විරහිත ලෙස විදුලි බිල ඉහළ දමමින් වත්මන් රජය නව වසරට වැඩ ඇල්ලූ බව ජනතා විමුක්‌ති පෙරමුණේ ප්‍රධාන ලේකම් ටිල්වින් සිල්වා මහතා ඊයේ (18 වැනිදා) සඳහන් කළේය.

මෙම මිල ඉහළ දැමීම ජනතාවගේ බෙල්ල මිරිකා මුදල් ගන්නා වැඩක්‌ බව පැවසූ හෙතෙම තම පක්‍ෂය රජයේ මෙම ක්‍රියාමාර්ගය තරයේ හෙළා දකින බව ද කීවේය.

මෙම අසාධාරණ මිල ඉහළ දැමීම භාර නොගන්නැයි ද ඊට එරෙහිව මහ පාරට බැස උද්ඝෝෂණ ක්‍රියාමාර්ගයකට අවතීර්ණ වන්නැයි ද හෙතෙම විදුලි පාරිභෝගිකයන්ගෙන් ඉල්ලා සිටියේය.

විදුලි බිල ඉහළ දැමීමට එරෙහිව තම පක්‍ෂය ප්‍රාදේශීය හා දිස්‌ත්‍රික්‌ මට්‌ටමින් උද්ඝෝෂණ මාලාවක්‌ පවත්වන බවත් ටිල්වින් සිල්වා මහතා සඳහන් කළේය.

වත්මන් රජය මෙවැනි අසාධාරණ ජනතාව පෙළන තීරණ ගන්නේ තමන් ගන්නා ඕනෑම තීරණයක්‌ ජනතාව අනුමත කරන්නේ යෑයි යන පූර්ව නිගමනයෙන් බවත් පැවසූ හෙතෙම ආණ්‌ඩුව ගන්නා මෙවැනි තීරණ තමන් අනුමත නොකරන බව පෙන්වීමට ජනතාවට දැන් මහඟු අවස්‌ථාවක්‌ හිමි වී ඇති බව ද කීවේය.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.