රජය දූෂණ අක්‍රමිකතා පියවා ගැනීමට
ජනතාවාදී නොවන තීරණ ගැනීම නිසා
විදුලිය භාවිතයෙන් ඉවත්ව නැවත කුප්පි ලාම්පු
යුගයක්‌ කරා ජනතාවට ගමන් කිරීමට සිදුවෙලා

 ප්‍රජාතන්ත්‍රවාදී පක්‍ෂයේ නායක - සරත් ෆොන්සේකා

අජිත් අලහකෝන්

දූෂණ අක්‍රමිකතා පියවා ගැනීම සඳහා ආණ්‌ඩුව විසින් ගන්නා ජනතාවාදී නොවන තීන්දු තීරණ නිසා විදුලිය භාවිතයෙන් ඉවත්ව නැවත කුප්පිලාම්පු යුගයක්‌ කරා ගමන් කිරීමට ජනතාවට සිදුව ඇතැයි ප්‍රජාතන්ත්‍රවාදී පක්‍ෂයේ නායක හිටපු හමුදාපති සරත් ෆොන්සේකා මහතා ඊයේ (18 දා) පැවසුවේය.

ඇතුල්කෝට්‌ටේ පිහිටි පක්‍ෂ කාර්යාලයේ පැවැති ප්‍රවෘත්ති සාකච්ඡාවකදී හිටපු හමුදාපති සරත් ෆොන්සේකා මහතා මෙසේ ද කීය.

අද රටේ වැඩිපුරම කතා කරන්නේ විදුලි බිල ගැනයි. ජනතාවට මෙය ප්‍රශ්නයක්‌ වෙලා. විදුලි බිල අසාධාරණ ලෙස ඉහළ දමන්න සූදානම් බව විදේශ රටවල් පවා පසුගිය කාලයේ තේරුම් අරගෙන තිබුණා. විදුලිය වැඩි කිරීම ගැන සාකච්ඡාවකට එන ලෙස ඇමරිකානු තානාපති කාර්යාලය පවා ආණ්‌ඩුවට ආරාධනා කළා. ඒත් රජය එය ප්‍රතික්‍ෂේප කර තිබෙනවා. මේ වැඩි වූ විදුලි ගාස්‌තුව ජනතාවට ඔරොත්තු දෙන්නේ නෑ. ආණ්‌ඩුවෙ විදුලි ගාස්‌තු වැඩි කිරීමේ ක්‍රමවේදය නිසා වැඩිපුර පහර වදින්නේ අවම වශයෙන් විදුලිය පරිභෝජනය කරන ජනතාවටයි. රජය එක පැත්තකින් මහා පරිමාණයෙන් වංචා, දූෂණ, සහ අක්‍රමිකතා කරනවා. ජනතාවගේ මුදල් නාස්‌ති කරනවා. රටේ සම්පත් හූරාගෙන කනවා. ඒ පාඩුව පිරිමසා ගන්නේ දුප්පතාගේ පොකැට්‌ටුවට තට්‌ටු කරලා. මේවා ජනතාවාදී තීරණ නොවේ. ආණ්‌ඩුව දැන් නිදහසට කරුණු ඉදිරිපත් කරාවි... ණයට පෙට්‍රල් නොදෙන නිසා විදුලි බිල වැඩි කළා.... ණය ගෙවා ගන්න විදුලි බිල වැඩි කළා කියා හේතු කියමින් රජයට මෙයින් ගැලවෙන්න බෑ. ජනතා පැවැත්ම තහවුරු කරන්න බැරිනම් ඒ රජය අසාර්ථකයි. රජය ජනතාවට ලැබෙන ආදායම ඉහළ දැමීමට ක්‍රියාමාර්ග ගන්නේ නෑ. ජීවන වියදම එන්න එන්නම වැඩිවෙනවා. ජනතාවට දරා ගන්න බෑ... ජනතාවගේ වැය බර අඩු කිරීමට ආණ්‌ඩුවට සැලසුමක්‌ නෑ. එවැනි සූදානමක්‌ හෝ උත්සාහයක්‌වත් පෙනෙන්න නෑ. ජනතාව කබලේ හිටියේ... දැන් විදුලි බිල වැඩි කරලා. ආණ්‌ඩුව ජනතාව කබලෙන් ලිපට ඇදල දාලා. මේ දුෂ්ට පාලනය අවසන් කළ යුතුයි.... මේ පාලකයන් ගෙදර යවා ජනතාවගේ හද ගැස්‌ම අවංකව හඳුනන රජයක්‌ පත්කර ගත යුතුයි. වෑන්වලින්, පැජරෝවලින් ඇවිත් ගමේ කැරකිලා ගියාට ජනතාවගේ බඩ පිරෙන්නේ නෑ. ජනතා ප්‍රශ්න එහෙම විසඳන්න බෑ. එවැනි විසඳුම්වලට දැන් ජනතාව රැවටෙන්නේ නෑ. මේ දූෂිත පාලකයන් හා දූෂිත රජයේ ක්‍රියාකාරිත්වය රටට කොතරම් විනාශයක්‌ ද කියා ජනතාව දැන්වත් තේරුම් ගත යුතුයි.

බ්‍රිතාන්‍ය රජයේ විදේශ ලේකම් පවා පසුගිය දවසක විවේචනාත්මකව කියා තිබුණා රටේ මාධ්‍යයට එරෙහි ප්‍රහාර තවමත් නතර කරලා නෑ කියලා. සිරස මාධ්‍යයට සහ මාධ්‍යවේදීන්ට එල්ල කරන තර්ජන ගර්ජන අප තරයේ හෙළා දකිනවා. පසුගිය කාලයේ මාධ්‍ය ආයතනවලට, මාධ්‍යවේදීන්ට දිගින් දිගට ප්‍රහාර එල්ල කළා.. මාධ්‍ය නිදහස වෙනුවෙන් අපි දිගින් දිගටම කතා කරනවා.


අපේ දේශපාලන බලවේගය බලයට ආ පසුව මාධ්‍යවේදීන්ට, මාධ්‍ය ආයතනවලට අවශ්‍ය නිදහස, රජය විවේචනය කිරීමේ අයිතිය අනිවාර්යයෙන්ම ලබා දෙනවා. අපි ඉන්නේ ඒ ස්‌ථාවරයේ. මා හමුදාපතිව සිටි කාලයේ දී මාධ්‍ය ආයතනවලට, මාධ්‍යවේදීන්ට සිදුවූ විවිධ සිද්ධීන්වලට එරෙහිව ඇඟිල්ල දිගු කළේ හමුදාවට. මා වෙතත් චෝදනා එල්ල කළා. ඒත් අදත් අපිට පෙනෙනවා එදා වගේම මාධ්‍යවේදීන්ට ප්‍රහාර එල්ලවන බව.

මෙහිදී මාධ්‍යවේදීන් ඉදිරිපත් කළ ප්‍රශ්නවලට සරත් ෆොන්සේකා මහතා මෙසේ පිළිතුරු දුන්නේය.

මාධ්‍ය - විදුලි ගාස්‌තු තවත් මාස හයකින් වෙනස්‌ කරන බව රජය ප්‍රකාශ කර තිබුණා?
ෆොන්සේකා මහතා - මේ ආණ්‌ඩුව මාස හයෙන් හයට විදුලි ගාස්‌තු වෙනස්‌ කරනවා. තව මාස හයකින් වැඩි කරනවා මිස අඩු කරන්නේ නෑ. විදුලි බලාගාරවලට බාල උපකරණ සවි කරලා. මේ විදුලි ප්‍රශ්නය නිසා රටට ආයෝජකයෝ එන්නේ නෑ. හමුදා මූලස්‌ථානය තිබූ ස්‌ථානයේ ගාලුමුවදොර පිටිය ඉදිරිපිට හෝටලය හදන විදේශ සමාගමත් දැන් එය හදන්න බෑ කියනවා. රටේ වියදම වැඩියි කියලා. මේ ආණ්‌ඩුවට දැක්‌මක්‌ නෑ. එනිසා අනිවාර්යයෙන්ම ඉදිරියේදීත් විදුලි ගාස්‌තු වැඩි කරන්න ආණ්‌ඩුවට සිද්ධ වෙනවා.

මාධ්‍ය - විදුලි ගාස්‌තු ඉහළ දැමීමට එරෙහිව ඔබ පක්‍ෂය ඉදිරියේදී කුමන ආකාරයේ වැඩ පිළිවෙලක්‌ද අනුගමනය කරන්නේ?
ෆොන්සේකා මහතා - අපි ජනතාව වෙනුවෙන් කතා කරනවා. ඉදිරි දිනවල පවත්වන ජනරැලි වලදී ප්‍රවෘත්ති වැඩසටහන්වලදී, මැයි රැළියේදී අපි මේ විදුලි ගාස්‌තු වැඩි කිරීම වගේම ජනතාවගේ ජීවන බර ගැනත් කතා කරනවා. ඒ වගේම විද්වතුන් සමඟ මේ පිළිබඳ සාකච්ඡා කර යෝජනා මාලාවක්‌ සකස්‌ කරනවා. ඒත් මේ රජය කිසිම යෝජනාවකට සවන් දෙන රජයක්‌ නොවේ. අත්තනෝමතික ලෙස, හිතුවක්‌කාරි ලෙස ඒකාධිපති තීන්දු තීරණ ගන්නා රජයක්‌. අපි මේ රජයේ ප්‍රතිපත්ති හෙළා දකිනවා. අපිට බලය ලැබුණ විට අපි මේ රජය අද කරන වැරදි සියල්ලම නිවැරැදි කරනවා.

මාධ්‍ය - ඉදිරි මැතිවරණවලට තරග කරන්නේ සංධානගතවද?
ෆොන්සේකා මහතා - ඔව්... විකල්ප බලවේගයක්‌ ගොඩනැගෙනතුරු ජනතාව පෙළගැසී බලා සිටිනවා. එම නිසා ඉදිරියේදී පවත්වන සෑම ඡන්දයකටම අපි තරග කරනවා. තවත් පක්‍ෂ අප සමඟ අත්වැල් බැඳ ගනීවි.

මාධ්‍ය - යූ.එන්.පී., ඡේ.වී.පී. සමඟ සන්ධානගත වෙනවද?
ෆොන්සේකා මහතා - අපි කැමැතියි පසුගිය ජනාධිපතිවරණයේදී මෙන්ම ඉදිරියේදීත් යූ.එන්.පී. සහ ඡේ.වී.පී. සමඟ සන්ධානගත වෙන්න. ඒත් ඒ පක්‍ෂවල නායකයන් සන්ධානයේ නායකයන් ලෙස පිළිගන්න අපි කැමැති නෑ. නායකත්ව කමිටුවක්‌ යටතේ සන්ධානගත වෙන්න අපි කැමැතියි.

මාධ්‍ය - ආණ්‌ඩුව ඇමෙරිකානු සමාගම් සමඟ සාකච්ඡා කරන බව පවසා තිබුණා?
ෆොන්සේකා මහතා - ඇමරිකාවේ යම් යම් සමාගම් සමඟ සාකච්ඡා කිරීමත්, එරට රජය සමඟ සාකච්ඡා කිරීමත් දෙකක්‌. රාජපක්‍ෂලා විදේශ සමාගම් සමඟ සාකච්ඡා කරන්න හුඟාක්‌ කැමතියි. විදෙස්‌ ආණ්‌ඩු සමඟ සාකච්ඡා කරන්න කැමති නෑ. අත දිග හැරලා කොමිස්‌ ගන්න පුළුවන් සමාගම් සමඟ ගණුදෙනු කළොත් විතරයි.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.