ජෝර්දාන් ගිය මව යළි ගෙන්වා දෙන්නැයි
දරු දෙදෙනා උපවාසයේ


හලාවත - ප්‍රියරංග ඉලංගමුදලි හා ජී. සී. හෙට්‌ටිආරච්චි



ජෝර්දානයේ රැකියාවක්‌ සඳහා මීට මාස 10 කට පෙර පිටත්ව ගිය තම මව යළි මව්බිමට ගෙන්වා දෙන ලෙස හැඬූ කඳුලින් ආයාචනය කරමින් ඇයගේ දරුවෝ හලාවත විදේශ සේවා නියුක්‌ති කාර්යාංශය ඉදිරිපිට ඊයේ (23 දා) උපවාසයක්‌ ආරම්භ කළහ.

එලෙස උපවාසයක යෙදී සිටි 9 හැවිරිදි පිරිමි දරුවකු ඊයේ දහවල් ක්‌ලාන්ත වීම හා වමනය දැමීම හේතුවෙන් රෝහල්ගත කර තිබේ.

ලක්‍ෂිත උදයකුමාර නමැති එම දරුවා සමග 5 හැවිරිදි ඔහුගේ සොහොයුරාද මිත්තණිය ළඟ රඳවා ඔවුන්ගේ මව වන 32 හැවිරිදි කේ. ඒ. චන්ද්‍රdනි නිරෝෂා ජෝර්දානයේ රැකියාවක්‌ වෙත පිටව ගොස්‌ ඇත්තේ කුරුණෑගල පිහිටි විදේශ රැකියා ආයතනයකට තම සේසතම උකස්‌ කර මුදල් බැඳය.

ඇය විදේශගතවී මාස 10 ක්‌ ගෙවී ගිය නමුත් කිසිදු මුදලක්‌ මේ දරුවන් වෙනුවෙන් මිත්තනිය වෙත එවා නොමැත. මේ නිසා ඔවුහු ජීවත්වීමේ බරපතළ ගැටලුවකට මුහුණපා සිටිති.

රියෑදුරෙකු ලෙස සේවය කරන මෙම දරු දෙදෙනාගේ පියාට ද ලැබෙනුයේ සුළු මුදලක්‌ බැවින් දරුවන්ගේ කුසගිනි නිවීමට එය ප්‍රමාණවත් නැතැයි දරු දෙදෙනාගේ මිත්තනිය හැඬූ කඳුළින් පැවසුවාය.

"මමත් ලෙඩෙක්‌, මට තනියම මේ දරුවෝ දෙන්නාගේ රාජකාරි කරන්න බැහැ. ළමයින්ගේ තාත්තා නිතර ගෙදර නැති නිසා ළමයින්ව ඉස්‌කෝලෙට එක්‌කගෙන යන්නත් විදිහක්‌ නැහැ. මේ පොඩි දරුවෝ දෙන්නාට එයාලගේ අම්මා නැතිව මම බලාගන්නේ කොහොමද....? බැරිම තැන තමයි මේ දරුවෝ දෙන්නාවත් අරගෙන මම විදේශ සේවා එකට ගියේ. කියන්න ඕනේ හැමෝටම කිව්වා. කිසිම සහනයක්‌වත් තොරතුරක්‌වත් ලැබුණේ නැහැ. අනේ අපේ දුව ආපසු ගෙන්නලා දෙන්න.

මේ දරු පැටව් දෙන්නා ගැන බලලා දුව ගෙනත් දෙන්න කියලයි අපි කියන්නේ. දුව ගෙන්නලා දෙනතුරු අපි විදේශ සේවා කාර්යාලයේ දොරකඩින් ඉවත් වෙන්නේ නැහැ. මේ දරු පැටව් දෙන්නාත් එක්‌කම මෙතැනම හාමතේ මැරිලා යනවා හැරෙන්නට වෙන කරන්න දෙයක්‌ නැහැ." යෑයි ඒ මිත්තණිය කීවාය.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.