මම දැක්‌කා තාත්තා දඟලමින් ඉන්නවා

දුවේ මට අමාරුවක්‌ නැහැ
අම්මා බලන්න කියා තාත්තා කිව්වා

දියණිය සාක්‍ෂි දෙමින් කියයි

මම පුතා එනකම් මග බලාගෙනම හිටියා
මියගිය හමුදා කෝප්‍රල්වරයාගේ පියා කියයි

වේයන්ගොඩ වඳුරව දුම්රිය අනතුරින් මියගිය අයගේ මරණ පරීක්‍ෂණ



ගිනි ගැනීමට ලක්‌ වූ මාතර සිට කිලිනොච්චි බලා ධාවනය වූ දුම්රිය වඳුරව දුම්රිය ස්‌ථානය අසලදී. ආර්. කේ.එච්.රදලියගොඩ


මොට්‌ටුන්න - ආර්. කේ. එච්. රදලියගොඩ, ටෝනි කරුණානායක සහ ධම්මික සල්වතුර

"තාත්තා මාව කෝච්චියෙන් බස්‌සවලා මට දුම්රිය මාර්ගයෙන් අයිනට යන්න කියලා තාත්තා අම්මවත් දුම්රියෙන් බස්‌සවාගෙන එනකොටම හෝන් එකවත් නොගහම නුවර පැත්තෙන් දුම්රියක්‌ වේගයෙන් අපි ඉදිරියට ආවා. මම දුම්රිය මාර්ගයෙන් ඉවතට වුණා. දුම්රිය වේගයෙන් අපිව පහුකරගෙන ගියත් එක්‌කම මිනිස්‌සු මහා හයියෙන් කෑගහන්න පටන් ගත්තා. ඒත් එක්‌කම මම අම්මවයි තාත්තවයි හෙව්වා. මම දැක්‌කා ඒ දෙන්නගේ සිරුරෙන් ලේ ගල ගල රේල් පාර අයිනේ තියෙන වෙලට වැටිලා ඉන්නවා."

වේයන්ගොඩ වඳුරව දුම්රිය ස්‌ථානය අසලදී කිලිනොච්චියේ සිට කොළඹ කොටුව බලා ධාවනය වූ දුම්රියේ ගැටී මියගිය තිදෙනාගේ මරණ පරීක්‍ෂණයේදී සාක්‌කි දුන් 11.03.13 ඔබ්ලික්‌ ඒ. එබ්ලික්‌ 03, හොරගොල්ල වත්ත ලිපිනයෙහි පදිංචිව සිටි වෛද්‍යරත්න මුදියන්සේලාගේ මොහොමඩ් තවුපික්‌ මොහොමඩ් හම්සදීන් මදලි (58) සහ හයිරූම් නීශා (47) නමැති මියගිය අඹුසැමි යුවලගේ දියණිය වන ෆාතිමා මදනිමා මදලි (17) යන අය පැවසුවාය.

වතුපිටිවල හදිසි මරණ පරීක්‍ෂක ආර්. කේ. ගුණතිලක මහතා වතුපිටිවල මූලික රෝහලේදී මරණ පරීක්‍ෂණය පැවැත්විය.

වේයන්ගොඩ පොලිස්‌ ස්‌ථානයේ පොලිස්‌ සැරයන් ඩබ්. එන්. පී. වනසිංහ (10174) සහ පොලිස්‌ කොස්‌තාපල් ඩබ්. එම්. යූ. ආර්. පෙරේරා (48943) යන නිලධාරීන්ගේ සාක්‍ෂි මෙහෙයවීම මත වැඩිදුර සාක්‍ෂි දුන් සාක්‍ෂිකාරිය මෙසේ ද කීවාය.

"මගේ තාත්තා ඩුබායි රටේ රියෑදුරු කෙනකු වශයෙන් වසර ගණනාවක්‌ සේවය කරලා ලංකාවට ඇවිත් හරියටම දවස්‌ හතයි. මේ අනතුර වෙනකොට මමයි අම්මයි තාත්තයි පසුගිය 26 වැනිදා අලුත්ගම දර්ගා ටවුන්වල තියෙන අපේ අම්මාගේ මහ ගෙදර ගියා. අපි එහේ දවසක්‌ම ගෙවලා ඊට පසුවදා (27 දා) සවස 3.45 ට විතර අපි තුන්දෙනා අලුත්ගම දුම්රිය ස්‌ථානයට ඇවිත් අලව්වට ටිකට්‌ අරන් මාතර ඉඳලා මහනුවර බලා ධාවනය වන දුම්රියෙන් නිවස බලා පිටත් වුණා.

වේගයෙන් ධාවනය වුණු දුම්රිය පස්‌වරු 6.40 ට පමණ වන විට වේයන්ගොඩ දුම්රිය ස්‌ථානය පහුවෙලා ටික දුරක්‌ යනකොට අපි හිටිය දුම්රිය මැදිරිය දුමෙන් පිරෙන්න පටන්ගත්තා. ඒ වෙලාවෙ දුම්රියේ හිටපු හැමෝම හොඳටම බයවෙලයි හිටියේ. මිනිස්‌සු ජනෙල්වලින් අත දදා කෑගැහුවා. දුම්රිය නවත්වන්න කියලා. ඒත් දුම්රිය නැවැත්තුවේ නැහැ. පස්‌සේ මම දැක්‌කා මිනිස්‌සු දුම්රියේ ආරක්‍ෂිත දම්වැල ඇද්දා. දුම්රිය ටික දුරක්‌ ගිහින් නැවතුණා. මිනිස්‌සු දොරවල්වල පොරකකා දුම්රියෙන් බැස්‌සා.

ඒ මිනිස්‌සු අතරින් තාත්තා මමත් දුම්රියෙන් බස්‌සවලා අම්මවත් බස්‌සවන්න ගිය අතරතුරයි ඒ දෙන්නා දුම්රියේ ගැටුනේ. මම දැක්‌කා තාත්තා දඟලමින් ඉන්නවා. මම තාත්තා ළඟට දුවලා තාත්තගේ ඇඟ හෙලෙව්වා. එතකොට තාත්තා කිව්වා දුවේ මට අමාරුවක්‌ නැහැ අම්මා ගැන බලන්න කියලා. ඒ වෙලාවේ එතනට ආපු කට්‌ටියක්‌ තාත්තව ත්‍රීවිලර් එකකට නග්ගවාගෙන රෝහලට රැගෙන ගියා. පසුව මම අම්මා ළඟට දුව ගියා. මම යනකොට අම්මට සිහිය නැහැ. මම අම්මවත් ත්‍රීවිලර් එකක දමාගෙන වතුපිටිවල රෝහලට රැගෙන ආවා.

ටික දුරක්‌ යනකොට අම්මට සිහිය ආවා. අම්මා කිව්වා තාත්තා කෝ දැන් මට කරදරයක්‌ නැහැ. තාත්තා ගැන බලන්න කියලා. අපි අම්මව දැඩි සත්කාර ඒකකයට ඇතුළත් කරලා මම ගියා තාත්තව බලන්න. එතකොට මම දැනගත්තා තාත්තා මියගිහින් කියලා. ඊට සුළු මොහොතකින් අම්මත් මියගියා යෑයි ද කීවාය. මෙම දුම්රිය අනතුරින් මියගිය අංක 05/01, ගොඩහේන, දොලපිහිල්ල, මහනුවර ලිපිනයෙහි පදිංචිව සිටි ඒකනායක මුදියන්සේලාගේ බුද්ධික නිරෝෂන් ඒකනායක (28) නමැති අයගේ මරණය සම්බන්ධයෙන් සාක්‌කි දුන් ඔහුගේ පියා වන ටිකිරි බණ්‌ඩාර යන අය කියා සිටියේ "මියගොස්‌ ඉන්නේ මගේ දෙවැනි පුතායි. එයා ගුවන් හමුදාවේ කෝප්‍රල්වරයකු (මෝටර් වයරින් ශිල්පියකු) වශයෙන් අනුරාධපුර ගුවන් හමුදා කඳවුරට අනුයුක්‌තවයි සේවය කළේ.

මගේ පුතාව මාස හයක මෝටර් වයරින් පුහුණුවක්‌ සඳහා ගාල්ල වෘත්තීය මධ්‍යස්‌ථානයට ගුවන් හමුදාවෙන් අනුයුක්‌ත කරලයි හිටියේ. මේ වෙනකොට මාස පහක්‌ ගෙවිලා ඉවරයි. පුතා මාසෙකට වතාවක්‌ අපිව බලන්න ගෙදර එනවා.

පුතා මියගිය දවසේ දහවල් 2.30 ට විතර මම පුතාට කෝල් එකක්‌ ගත්තා. එතකොට එයා කිව්වා මම දැන් ගෙදර එනන ලැහැස්‌ති වෙන ගමන් ඉන්නේ කියලා. මම මග බලාගෙන හිටියා පුතා එනකල්. ඒත් එන්න එන්නම රෑ වුණා. ඒත් පුතා ආවෙ නැති නිසා මම පුතාට කෝල් කළත් එයා ෆෝන් එක ගත්තේ නැහැ. රාත්‍රි 8.00 ට විතර මගේ මල්ලී අපේ ගෙදරට දුවගෙන ඇවිත් කිව්වා පුතා දුම්රියෙන් එනකොට අනතුරක්‌ වෙලා කියලා. වතුපිටිවල රෝහලෙන් කියලා මල්ලීගේ ෆෝන් එකට කෝල් එකක්‌ ආවා කියලා. අපි ඉක්‌මනින්ම රෝහලට එන විටත් පුතා සදහටම මෙලොවින් ගිහින් හිටියා. වතුපිටිවල මූලික රෝහලේ අධිකරණ වෛද්‍ය නිලධාරිනී මනීෂා වීරසිංහ මහත්මිය විසින් පශ්චාත් මරණ පරීක්‍ෂණ පැවැත්වූවාය.

පශ්චාත් මරණ පරීක්‍ෂණ වාර්තාව සහ ඉදිරිපත් වූ සාක්‍ෂි මත දුම්රිය අනතුරින් ඩබ්. එම්. මොහොමඩ් තවුµsක්‌ හම්සදින් මුදලි යන අයගේ සුසුම්නාවට සිදුව ඇති හානි නිසා මෙම මරණය සිදුව ඇති බවත් ඔහුගේ බිරිඳ වන හයිරූම් නීශා නමැත්තියගේ මරණය සිදුව ඇත්තේ ඇයගේ අක්‌මාවට සහ වකුගඩුවලට බරපතළ හානි සිදුවීම හේතුවෙන් බවත් එම අනතුරින්ම මියගිය ඊ. එම්. බුද්ධික නිරෝෂන් ඒකනායක නමැති ගුවන් හමුදා කෝප්‍රල්වරයාගේ මොළයට සහ ශරීරයේ අභ්‍යන්තරයට සිදුව ඇති බරපතළ හානි හේතුවෙන් එම මරණය ද සිදුව ඇති බවත් මරණ පරීක්‍ෂකවරයා තීන්දු කළේය.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.