හෙද, මහජන සෞඛ්‍ය සහ පවුල් සෞඛ්‍ය සේවාවන් සඳහා සුදුස්‌සන් සොයා ගැනීම ගැටලුවක්‌ බවට පත්වෙලා
- ඇමැති මෛත්‍රිපාල සිරිසේන

හෝමාගම - ජයසිරි කාරියවසම්

අපේ රටේ සෞඛ්‍ය අංශයේ සුදුස්‌සන් නැති නිසා පුරප්පාඩු තිබෙනවා. හෙද සේවාවට අයෑදුම් කරන්නන්ගෙන් සුදුස්‌සන් ඉන්නේ 60% යි. මහජන සෞඛ්‍ය පරීක්‍ෂක තනතුරු වගේම පවුල් සෞඛ්‍ය සේවාවටද සුදුසුකම් ඇති අය සොයා ගැනීම ගැටලුවක්‌ වෙලා යෑයි සෞඛ්‍ය ඇමැති මෛත්‍රිපාල සිරිසේන මහතා හෝමාගම දී පැවැසීය.

2014 වර්ෂයේ නව පාසල් වාරයේ පළමු වසර සඳහා සිසුන් ඇතුළත් කිරීමේ ජාතික උත්සවය හෝමාගම නියඳගල විද්‍යා කීර්ති විද්‍යාලයේ දී ඊයේ (16 වැනිදා) පැවැත්විණි. එම උත්සවයට ප්‍රධාන ආරාධිත අමුත්තා ලෙස පැමිණි සෞඛ්‍ය ඇමැති මෛත්‍රිපාල සිරිසේන මහතා තවදුරටත් අදහස්‌ දක්‌වමින්á

පවතින රාජ්‍ය පුරප්පාඩු පිරවීම සඳහා දැන උගත් මානව සම්පත් අවශ්‍ය යුගයක්‌ බවට මේ කාලය පත්වී තිබෙනවා. මේ මානව සම්පත් ඌනතාවය ජාත්‍යන්තර මට්‌ටමේ ගැටලුවක්‌ බවටත් පත්වී තිබෙනවා. දකුණු ආසියාවේ ඉහළම අධ්‍යාපනය ඇති රට අපේ රටයි. එහෙත් වර්තමාන රැකියා ක්‍ෂේත්‍රයට අවශ්‍ය ලෙස අධ්‍යාපන ක්‍රමය වෙනස්‌ විය යුතු කාලය මෙය බවට පත්වී තිබෙනවා.

අධ්‍යාපන ඇමැති බන්දුල ගුණවර්ධන මහතා කතා කරමින් ජනප්‍රිය පාසල්වලට ගමේ ළමයි ගිය නිසා ගමේ පාසල් වැසී ගියා. ළමයින් 50 ට අඩු පාසල් වැහෙන නිසා ළමා මිතුරු පාසල් 5000 ක්‌ අපි ඇති කළා. සෑම ප්‍රාදේශීය ලේකම් කොට්‌ඨාසයකටම ඉන් පාසල් 3 ක්‌ ලැබෙනවා. සාක්‌ කලාපීය රටවල් 8 අතරින් ඉහළම මානව සම්පත් තිබෙන රට බවට ශ්‍රී ලංකාව පත්වී ඇති බව එක්‌සත් ජාතීන්ගේ මානව සම්පත් වාර්තාව පෙන්වා දී තිබෙනවා.

උසස්‌ පෙළ හදාරන 51% ක්‌ සිසුන්ට රැකියා හිඟයි. මේ නිසා තාක්‍ෂණවේදය හදාරන්න පාසල් 250 ක්‌ ඇති කළා, යෑයි පැවැසීය.

විදුහල්පති එස්‌. එම්. අයි. ඒ. කේ. සූරියකුල මහතා කතා කරනු ලැබූ අතර හෝමාගම කලාප අධ්‍යාපන අධ්‍යක්‍ෂ පාලිත වීරසූරිය මහතා ප්‍රමුඛ රාජ්‍ය නිලධාරීහු විශාල පිරිසක්‌ මෙම ජාතික උත්සවය සඳහා සහභාගි වී සිටියහ.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.