ඒ අමිහිරි අවසන් මහා තරග අත්දැකීම් යළිත් නොවිදිය යුතුයි
- දිනේෂ් චන්දිමාල්

අවසන් 20-20 ලෝක කුසලාන පැරදුනේ මගේ වරදින්
- ලසිත් මාලිංග

අසේල විතාන සහ චමිල කරවිට

ලෝක කුසලාන අවසන් මහා තරග හතරක ලද අමිහිරි අත්දැකීම් යළිත් නොවිඳීමට බංග්ලාදේශයේදී හෙට (16 දා) පන්දුවාර 20-20 ලෝක කුසලාන ක්‍රිකට්‌ තරගාවලියේදී සිය කණ්‌ඩායම උත්සහ කරන බව ශ්‍රී ලංකා විස්‌සයි විස්‌ස ක්‍රිකට්‌ නායක දිනේෂ් චන්දිමාල් පවසයි.

විස්‌සයි විස්‌ස ලෝක කුසලාන ක්‍රිකට්‌ තරගාවලියට සහභාගි වන ශ්‍රී ලංකා කණ්‌ඩායම හෙට (16 දා) බංග්ලාදේශය බලා පිටත්ව යැමට නියමිත අතර ඊට ප්‍රථම මාධ්‍ය හමුවේ අදහස්‌ දක්‌වමින් චන්දිමාල් ඉහත අදහස්‌ පළ කර සිටියේය.

"මම හිතන්නෙ ශ්‍රී ලංකා ක්‍රිකට්‌ ප්‍රේක්‍ෂකයන්ගේ බලාපොරොත්තුව පසුගිය ලෝක කුසලාන අවසන් මහා තරගවල පරාජය අමතක කර මෙවර අපි ශූරතාව දිනා ගනු ඇතැයි යන්නයි. අපි කණ්‌ඩායමක්‌ විදිහට උපරිම සූදානමකින් තමයි විස්‌සයි විස්‌ස ලෝක කුසලාන තරගාවලියට සහභාගි වෙන්නෙ. ඒත් තරගයෙන් තරගයට සැලසුම් සකස්‌ කරමින් පළමුව අවසන් පූර්ව වටයට පැමිණ අවසන් මහා තරගයට පැමිණීම තමයි අපේ අරමුණ." යනුවෙන් චන්දිමාල් වැඩිදුරටත් පැවසීය.

පසුගිය සති කිහිපය තුළදී බංග්ලාදේශයේදී දීර්ඝ සංචාරයකට සහභාගි වෙමින් ලද අත්දැකීම විස්‌සයි විස්‌ස ලෝක කුසලාන තරගාවලියට අතිරේක වාසියක්‌ වන බවත් ශ්‍රී ලංකාව ක්‍රීඩා කරන කාණ්‌ඩය පිළිබඳව තමන් සතුටු වන බවත් චන්දිමාල් පවසයි.

මෙවර ලෝක කුසලාන තරගාවලිය සඳහා රටවල් 16 ක්‌ තරග වදින අතර එහිදී සුදුසුකම් ලැබීමේ වටය යටතේ 'ඒ' කාණ්‌ඩයෙන් බංග්ලාදේශය, ඇµaගනිස්‌ථානය, නේපාලය සහ හොංකොං කණ්‌ඩායම්ද 'බී' කාණ්‌ඩයෙන් සිම්බාබ්වේ, අයර්ලන්තය, එක්‌සත් අරාබි එමීර් රාජ්‍යය සහ නෙදර්ලන්තයද තරග වදිති. ප්‍රධාන කණ්‌ඩායම් අට අතරින් පළමු කාණ්‌ඩය යටතේ ශ්‍රී ලංකාව, එංගලන්තය, දකුණු අප්‍රිකාව සහ නවසීලන්තය තරග වදින අතර සුදුසුකම් ලැබීමේ වටයේදී 'බී' කාණ්‌ඩයේ පෙරමුණ ගන්නා කණ්‌ඩායමද මෙම කාණ්‌ඩයට ඇතුළත් වේ. දෙවැනි කාණ්‌ඩය යටතේ බටහිර ඉන්දීය කොදෙව්, ඉන්දියාව, පකිස්‌තානය, ඔස්‌ටේ්‍රලියාව සහ සුදුසුකම් ලැබීමේ වටයේදී 'ඒ' කාණ්‌ඩයේ පෙරමුණ ගන්නා කණ්‌ඩායමද මෙම කාණ්‌ඩයට ඇතුළත් වේ.

ලෝක කුසලාන අවසන් මහා තරග හතරකට ක්‍රීඩා කරමින් ලද පරාජයන් අතරින් වඩාත්ම දුකට පත්වන්නේ, අවසන් වරට පැවැති විස්‌සයි විස්‌ස ලෝක කුසලාන අවසන් තරගයේදී කොදෙව් කණ්‌ඩායම හමුවේ ලද පරාජය බව විස්‌සයි විස්‌ස උපනායක ලසිත් මාලිංග පවසයි.

"මට තවම ලෝක කුසලාන දිනන කණ්‌ඩායමක ක්‍රීඩා කරන්න ලැබිල නැහැ. අපි ලෝක කුසලාන අවසන් මහා තරග හතරක්‌ පරාජය වුණේ වෙන තරග වලට වඩා ඕනෑවටත් වැඩිය හොඳින් ක්‍රීඩා කිරීමේ අරමුණින් ක්‍රීඩා කිරීම කියලයි මම හිතන්නෙ. අපි මෙවර අවසන් මහා තරගයට පැමිණියහොත් සාමාන්‍ය තරගයක්‌ විදිහට ක්‍රීඩා කරන්න ඕන. අනවශ්‍ය පීඩනයක්‌ සමග ක්‍රීඩා කිරීම පරාජයට බලපානවා.

මම ක්‍රීඩා කරපු ලෝක කුසලාන අවසන් මහා තරග හතර අතරින් වඩාත් දුකට පත්වන්නෙ අවසන් වරට පැවැති විස්‌සයි විස්‌ස ලෝක කුසලාන තරගාවලිය. ඒ තරගයේදී මට හොඳට පන්දු යවන්න බැරි වුණ නිසා තමයි පරාද වුණේ." යනුවෙන් ලසිත් මාලිංග පවසයි.

"අපිට මෙවර තරගාවලියේදි ලැබෙන හැම තරගයක්‌ම අභියෝගයක්‌. පිතිකරුවන් එන්නෙ කොහොම හරි ලකුණු ලබා ගන්න. අපි දැනගන්න ඕන තණතීරුව පිතිකරුවන්ට පන්දු යවන්නන්ටද කියන එක නෙමෙයි. මොන තණතීරුවක වුණත් පිතිකරුවාට තර්ජනයක්‌ වෙන විදිහට පන්දු යවන්න. මම සතුටු වෙනවා පසුගිය තරගාවලි කිහිපයේදී මම යළිත් කඩුලු අතරට පැමිණිම ගැන. ඒත් මගේ පෞද්ගලික මතය අනුව මම මගේ උපරිමයට තවම ඇවිල්ල නැහැ." යනුවෙන් මාලිංග වැඩිදුරටත් පැවසීය.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.