වකුගඩු රෝගයෙන් අත්මිදෙන්න දේශීය සහල් පරිභෝජනය කරන්න
- වෛද්‍ය ඡන්න ජයසුමන

තලාව, එප්පාවල - රත්න බී. ඒකනායක

කාලයක්‌ තිස්‌සේ කරන ලද පර්යේෂණයන්ට අනුව උතුරුමැද පළාත පුරා පැතිරී ඇති වකුගඩු රෝගය නිවාරණය කිරීමට ඇති එකම මග කෘෂි රසායන භාවිතයෙන් තොර කළුහීනටි, රත්ඇල්, රත්සුවඳැල්, මඩතවාලු, සූදුරු සම්බා, කුරුළුතුඩු, මඩැල් වැනි දේශීය වීවර්ග වගාකොට ඒවායින් ලබාගන්නා සහල් පරිභෝජනයට ගැනීම යෑයි කැලණීය විශ්වවිද්‍යාලයීය වකුගඩු රෝග පර්යේෂණ කණ්‌ඩායමේ පර්යේෂක රජරට වෛද්‍ය විද්‍යාලයේ ජ්‍යෙෂ්ඨ කථිකාචාර්ය ඡන්න ජයසුමන මහතා "දිවයින"ට කියා සිටියේය.

මේ පිළිබඳ තමන් එක එල්ලේම ජනාධිපතිවරයාට කරුණු පැහැදිලි කිරීමෙන් පසු රජරට පුරා දේශීය වී වර්ග ව්‍යාප්ත කිරීමට වහාම පියවර ගන්නැයි විශේෂ ව්‍යාපෘති ඇමැතිවරයා වන එස්‌. එම්. චන්ද්‍රසේන මහතාට උපදෙස්‌ ලබාදී ඇතැයි පැවසීය.

වැඩිදුරටත් කතා කළ වෛද්‍ය ඡන්න ජයසුමන මහතා - දැන් රජරට වතුර වෙළෙඳාම ලොකුම ජාවාරමක්‌ වෙලා. වතුරේ ඇති බැර ලෝහ සහ අනිකුත් අපද්‍රව්‍ය පෙරී වතුර පිරිපහදු කරන්නේ යෑයි ජනතාව නොමග යවමින් විවිධ මිල ගණන්වලට ආනයනික ජල පෙරණ රජරට පුරා අලෙවි කරනවා. මේවායින් අපේක්‌ෂිත බැරලෝහ සහ වෙනත් අපද්‍රව්‍ය හරියට ඉවත් වෙන බවට තියෙන විද්‍යාත්මක සහතිකය කුමක්‌ද? වතුරේ බැර ලෝහ තිබේද? නැද්ද? යනුවෙන් නිවැරදිව හඳුනාගත හැකි එක්‌ යන්ත්‍රයක්‌ කාර්මික විද්‍යා ආයතනයේත් තවත් යන්ත්‍රයක්‌ මොරටුව විශ්වවිද්‍යාලයේත් තියෙන බව දැන ගන්න තියෙනවා. වතුරේ බැරලෝහ තිබේද නැද්ද යනුවෙන් පරීක්‍ෂා කළ හැක්‌කේ මේ යන්ත්‍රවලින් පමණයි. දැනට රජරට පුරා අලෙවියේ ඇති විවිධ ආනයනික ජල පිරිපහදු යන්ත්‍රවලින් එය හරියට කෙරෙනවාද කියල අපි කවුරුත් දන්නෙ නෑ. මේ නිසා රටට ආනයනය කෙරෙන සියලු ආකාරයේ ජල පෙරණ යන්ත්‍රවලින් බැර ලෝහ හා අනිකුත් අපද්‍රව්‍ය ඉවත් වෙනවාද යනුවෙන් ප්‍රමිති සහතිකයක්‌ අත්‍යවශ්‍යයි. නැත්නම් මෙය මහජනතාව මුළා කිරීමක්‌ පමණයි.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.