කෝටි 50 ක්‌ වටිනා පරණ බෙහෙත් අල්ලයි

* ගබඩාවට මුද්‍රාතබයි
* තව ටිකක්‌ පමා වුණා නම් ඒවා බීලා ලෙඩ්ඩු මැරෙනවා
* පරණ දිනය වැසෙන්නට අලුත් ලේබල් ද සකසලා

ලසිත දුමින්ද

රත්මලාන, අත්තිඩිය ප්‍රදේශයේ පිහිටා තිබූ මෙරට ප්‍රසිද්ධ ඖෂධ සමාගමකට අයත් ගබඩාවක්‌ පාරිභෝගික අධිකාරිය විසින් වටලා රුපියල් කෝටි 50 කට අධික වටිනාකමකින් යුත් භාවිතයට නුසුදුසු ඖෂධ, විටමින් සහ රූපලාවන්‍ය නිෂ්පාදන තොගයක්‌ ඊයේ (27 වැනිදා) සොයා ගෙන ඇත.

මෙම වැටලීමේදී වසර 4 කට අධික කාලයක්‌ කල් ඉකුත්ව තිබූ ඖෂධ හා ප්‍රතිජීවක ඖෂධ තොගයක්‌, ක්‍රීඩකයන් භාවිතා කරන අධිප්‍රොaටීන් සහ විටමින් තොගයක්‌ ද සොයා ගෙන තිබේ.

කල්ඉකුත් වූ ඖෂධ ඉදිරි වසරක්‌ දක්‌වා සඳහන් කොට නැවත අසුරා වෙළෙඳ පොළට එවන බව ද මූලික පරීක්‍ෂණවලදී අනාවරණය වී ඇත.


ඡායාරූපය-පින්සිරි ආරියරත්න

පෞද්ගලික ඔසුසල් හරහා මෙම ඖෂධ අලෙවි කිරීමට සූදානම් කර ඇතැයි ද යම් හෙයකින් මේවා වෙළෙඳ පොළට නිකුත් වූයේ නම් රෝගීන්ගේ ජීවිතවලට දැඩි අවදානමක්‌ මතුවන බව ද පාරිභෝගික අධිකාරිය පවසයි.

කල්ඉකුත් වී වසර 4කට අධික කාලයක්‌ ගත වී තිබූ මෙම ඖෂධවල කල්ඉකුත් වීමේ දිනය සූක්‍ෂම ලෙස වෙනස්‌ කොට නැවත වෙළෙඳ පොළට එවීමට සූදානම් කළ රුපියල් ලක්‍ෂ 10කට අධික වටිනාකමකින් යුත් ඖෂධ තොගයක්‌ සහ කෝටි 4 කට අධික වටිනාකමකින් යුත් ප්‍රතිජීවක ඖෂධ ලක්‍ෂ 20ක්‌ ද මෙහිදී සොයාගෙන ඇත.

කායවර්ධන ක්‍රීඩකයන් බහුලව භාවිතා කරන අධිප්‍රොaටීන් සහ විටමින් ඇතුළත් ඖෂධ ඇසුරුම්පත් 15,000ක්‌ හා ලේබල් ලක්‍ෂ 3ක්‌ ද සොයාගෙන තිබේ.

මීට අමතරව සම පැහැපත්වීමට යොදා ගන්නා ආලේපන වර්ග වසර 4කට අධික කාලයක්‌ කල්ඉකුත්ව තිබූ අතර, ඒවායේ කල්ඉකුත් වීමේ දිනය වෙනස්‌ කොට වෙළෙඳ පොළට එවීමට සූදානම් කර තිබූ ඇසුරුම් ලක්‍ෂ 5ක්‌ ද පාරිභෝගික අධිකාරිය භාරයට ගෙන ඇත.

දිවයිනේ ප්‍රසිද්ධ මහා පරිමාණ ඖෂධ අලෙවිසල් ජාලයක්‌ හිමි අදාළ සමාගමේ මෙම ගබඩාව සීල් තැබීමට පාරිභෝගික අධිකාරිය ඊයේ (27) කටයුතු කළ බව මාධ්‍ය ලේකම් නිපුන් ඒකනායක මහතා 'දිවයින'ට පැවසීය.

සමුපකාර හා අභ්‍යන්තර වෙළෙඳ ඇමැති ජොන්ස්‌ටන් ප්‍රනාන්දු මහතාගේ උපදෙස්‌ මත පාරිභෝගික අධිකාරියේ කොළඹ දිස්‌ත්‍රික්‌ ප්‍රධානී ප්‍රදීප් කළුතරආරච්චි මහතාගේ මෙහෙයවීමෙන් මෙම වැටලීම සිදුකර ඇත.


 

 
Powered By -


       උපාලි නිව්ස්‌පේපර්ස්‌ ප්‍රයිවට්‌ ලිමිටඩ්
           223, බ්ලූමැන්ඩල් පාර, කොළඹ 13.