පාප්තුමාගේ සංචාරයෙන් දේශපාලන වාසි ගන්න බෑ
- අගරදගුරු හිමිපාණෝ

අජිත් අලහකෝන්

අති උතුම් ප්‍රැන්සිස්‌ ශුද්ධෝත්තම පාප්වහන්සේ ලබන ජනවාරි මාසයේදී ශ්‍රී ලංකාවේ සිදු කරන සංචාරයෙන් ආණ්‌ඩු පක්‍ෂයට හෝ විපක්‍ෂයට දේශපාලන වාසි ලබාගත නොහැකි බව අගරදගුරු මැල්කම් කාදිනල් රංජිත් හිමිපාණෝ පැවසූහ.

එම නිසා පාප්වහන්සේගේ සංචාරය සිදු කෙරෙන ජනවාරි මාසයේ ජනාධිපතිවරණයක්‌ හෝ මහ මැතිවරණයක්‌ පැවැත්වීම නුසුදුසු බව ජනාධිපති මහින්ද රාජපක්‍ෂ මහතාට දැනුම්දුන් බවද උන්වහන්සේ පැවසූහ.

මෙය පාප්වහන්සේගේ නිදහස්‌ සංචාරයක්‌ වන බැවින් ඡන්ද ප්‍රචාරක කටයුතු මැද උන්වහන්සේ මෙරටට පැමිණීම සුදුසු නැති බවට කතෝලික රදගුරු මණ්‌ඩලයේ මතය ජනාධිපතිවරයා ඇතුළු රජයට දැනුම් දී ඇතැයිද මැල්කම් කාදිනල් රංජිත් අගරදගුරු හිමිපාණන් පැවැසීය.

එම නිසා එම කරුණු සලකා බලා ජනාධිපතිවරණයකට හෝ මහ මැතිවරණයකට අදාළ දින වකවානු රජය තීරණය කළ යුතු බවද කී කාදිනල් රංජිත් හිමිපාණෝ තම අදහස රජය සලකා බැලිය යුතු බවද කීහ.

පාප්වහන්සේගේ ශ්‍රී ලංකා සංචාරය සිදු කෙරෙන ජනවාරි මාසයේ ඡන්දයක්‌ පැවැත්වෙනවාද නැද්ද යන්න මෙතෙක්‌ රජය විසින් කතෝලික රදගුරු මණ්‌ඩලයට දැනුම්දී නැතැයි කී උන්වහන්සේ එය රජය විසින් තීරණය කළ යුත්තක්‌ බවද කීහ.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.