ආචාර ධර්ම පද්ධතියකින්
මන්ත්‍රීවරු හසුරුවන්න බැහැ

එය සමාජ මතයක්‌ පමණයි
ජවිපෙ නායක අනුර කුමාර දිසානායක


ව්‍යවස්‌ථා සංශෝධන ඇතුළු පනත් සම්මත කර ගැනීම සඳහා මන්ත්‍රීවරුන්ට කප්පම් දීමට අද ආණ්‌ඩුවට සිදු වී ඇතැයි ජනතා විමුක්‌ති පෙරමුණේ නායක, පාර්ලිමේන්තු මන්ත්‍රී හා ජාතික විධායක සභාවේ සාමාජික අනුර කුමාර දිසානායක මහතා පවසයි.

ව්‍යවස්‌ථා සංශෝධන, ආණ්‌ඩුවේ අතුරු අය වැය, ජෝන් අමරතුංග ඇමැතිවරයාට විරුද්ධව ඉදිරිපත් වී ඇති විශ්වාසභංග යෝජනාව, පසුගිය සතියේ අලුතින් පිහිටුවා ගත් දේශපාලන පෙරමුණ, පෝට්‌සිටි ව්‍යාපෘතිය හා මන්ත්‍රීවරුන් සඳහා සකස්‌ කෙරෙන ආචාර ධර්ම පද්ධතිය ආදිය සම්බන්ධයෙන් 'දිවයින ඉරිදා සංග්‍රහය' සමඟ සාකච්ඡාවකට එක්‌වෙමින් දිසානායක මහතා පළ කළ අදහස්‌ මෙසේය.

ප්‍ර - ආණ්‌ඩුව පිහිටුවලා දැන් මාසයකුත් ගතවුණා. මේ මාසය තුළ ඇති වී තිබෙන ප්‍රගතිය කොහොමද?

පි - ඇත්තටම ජනතා විමුක්‌ති පෙරමුණ මේ ආණ්‌ඩුවේ කොටස්‌කරුවන් හෝ හවුල්කාරයන් නොවෙයි. නමුත් මේ දින 100 ඇතුළත ව්‍යවස්‌ථාවේ ප්‍රතිසංස්‌කරණ, නීතිමය ප්‍රතිසංස්‌කරණ, අලුත් ප්‍රජාතන්ත්‍රවාදී ක්‍රමයේ වැඩ ටිකක්‌ සකස්‌ කරදීම ආදිය ඉටුකර ගන්න තිබෙනවා. මේ කාර්යයන් ඉටුකර ගැනීම සඳහා ජනතා විමුක්‌ති පෙරමුණේ මැදිහත්වීමක්‌ තියෙනවා. නමුත් මා දැක්‌කා ආණ්‌ඩුව සමහර දේවල් දිනවලට නම් කරල තිබුණා. නමුත් මැතිවරණයට ආකර්ෂණය වුණාට එය අතාර්තිකයි. අපිට තිබෙනවා ලොකු බලාපොරොත්තුවක්‌ මේ දින 100 ඇතුළත, විශේෂයෙන්ම විධායක ජනාධිපති ක්‍රමය අහෝසි කිරීම, කෙමිෂන් සභා ස්‌ථාපිත කිරීම, තොරතුරු දැන ගැනීමේ නීතිය සම්මත කර ගැනීම, ඖෂධ පනත සම්මත කර ගැනීම, සාක්‍ෂිකරුවන් ආරක්‍ෂා කිරීමේ නීතිය සම්මත කර ගැනීම, ජනතාවට බදු බර යම් ප්‍රමාණයකින් අඩුකර සහන ලබා දීම, වංචා දූෂණවල යෙදුන අය නීතියට කොටුකර දඬුවම් ලබාදීම ආදී අපේක්‍ෂාවන් තිබෙනවා.

මේ සියල්ල දින 100 තුළ කළ යුතුව තිබෙනවා. ඒ දින 100 අවසන් වූ පසු තමයි පාර්ලිමේන්තු මැතිවරණය පවත්වන්නේ. මෙන්න මේ දින 100 ඇතුළත නිදහසත්, ප්‍රජාතන්ත්‍රවාදයත් පුළුල් කර ගැනීමේ අරමුණෙන් කළ යුතු ව්‍යවස්‌ථා හා නීතිමය සංශෝධන තිබෙනවා. මම හිතන්නේ ඒක කර ගත යුතුයි. එය කරන්නේ නැතුව බකන් නිලාගෙන පැත්තකට වෙලා ඉන්නෙ නැතුව දින ගණන්ක ර කර බැණ බැණ ඉන්න එක නොවෙයි මේ වෙලාවේ වගකීම. ඒ නිසා ජනතාවගේ ඒ වුවමනාවන් ඉෂ්ටකර ගැනීම වෙනුවෙන් ජනතා විමුක්‌ති පෙරමුණ මැදිහත් වෙනවා.

ප්‍ර - 19 වැනි ව්‍යවස්‌ථා සංශෝධනය දැන් අදහස්‌ විමසීම සඳහා පක්‍ෂවලට යවල තිබෙනවා. මෙය කවදා විතරද පාර්ලිමේන්තුවට ඉදිරිපත් කරන්නේ.

පි - මේ තිබෙන තත්ත්වය දිගටම පවතීවිදැයි කියල අපි දන්නේ නැහැ. ඒ නිසා මාර්තු මාසෙ ඇතුළත ව්‍යවස්‌ථා සංශෝධන පාර්ලිමේන්තුවට ගෙනල්ල සම්මත කර ගැනීමේ අභිලාසයෙන් තමයි ජනතා විමුක්‌ති පෙරමුණ කටයුතු කරන්නේ.

ප්‍ර - මේ ව්‍යවස්‌ථාවත් සමඟ 17 වැනි සංශෝධනයත් එනවානේ. එය සම්මත වූ පසුව කොමිෂන් සභා පත් කළ යුතු වෙනවා. ඒ සඳහා පූර්ව සූදානමක්‌ තිබෙනවාද?

පි - මුලින් ව්‍යවස්‌ථාදායක සභාවක්‌ හැදෙනවා. අග්‍රාමාත්‍යවරයාගේ සහ විපක්‍ෂ නායකවරයාගේ එකඟතාවයෙන් තමයි එය හැදෙන්නේ. ඒ ව්‍යවස්‌ථාදායක සභාවෙන් තමයි අනිකුත් කොමිෂන් සභා පත් කරන්නේ. පළමුවෙන් මේ නීති සම්මත කරගත යුතු වෙනවා. ඉන් පසු ඒ ආයතන ස්‌ථාපිත කිරීම සඳහා යම් බලපෑමක්‌, අරගලයක්‌ අපට කරන්න සිදුවේවි. පළමුවෙන්ම කරන්න ඕන ව්‍යවස්‌ථාවට මේ සංශෝධන ඇතුළත් කර ගැනීමයි.

ප්‍ර - මේ කොමිෂන් සභාවලට සාමාජිකයන් පත් කිරීමේදී ඒවාට සුදුස්‌සන්ම පත්වේවි යෑයි සිතනවාද?

පි - අපි මෙහෙමත් සිතනවා. මේවාට පුද්ගලයන් පත්කිරීමෙන් හෝ නීති ප්‍රතිසංස්‌කරණවලින් විතරක්‌ මේවා කළ හැකි යෑයි කියල හෝ අපි විශ්වාස කරන්නේ නැහැ. පුද්ගලයන්ගේ දුබලකමුත් මේවාට හේතුවෙලා තිබෙනවා. නීති ප්‍රතිසංස්‌කරණවල අඩුවක්‌ මේ අර්බුදයට හේතු වෙලා තියෙනවා. නීති හදපු පමණින්, පුද්ගලයන් හොඳ වූ පමණින් සියල්ල සම්පූර්ණ වෙන්නේ නැහැ. අපේ රටේ ප්‍රජාතන්ත්‍රවාදය වේවා, නීතිය කඩාවැටීම වේවා, අධිකරණය කඩාවැටීම වේවා මේ සියල්ලටම යටින් තිබෙනවා සමාජ ආර්ථික ගැටලුවක්‌. ඒ සමාජ ආර්ථික දේහය පුළුල් ලෙස වෙනසකට ලක්‌ නොකොට මේවා සියල්ල ඒ විධියටම සිදුවේ යෑයි අපි විශ්වාස කරන්නේ නැහැ. හැබැයි මේ ප්‍රතිසංස්‌කරණවල යමක්‌ තියෙනවා. හැබැයි සියල්ල නොවෙයි. සියල්ල සම්පූර්ණ වෙන්න නම් පුළුල් සමාජ ආර්ථික පරිවර්තනයක්‌ ඇති වෙන්න ඕන. ඒකට රනිල් වික්‍රමසිංහ මහත්තයාගේ එක්‌සත් ජාතික පක්‍ෂයට හෝ මෛත්‍රීපාල සිරිසේන මහත්තයා ප්‍රමුඛ ශ්‍රී ලංකා නිදහස්‌ පක්‍ෂයට හෝ එය ඉටුකළ හැකි යෑයි විශ්වාසයක්‌ අප තුළ නැහැ. අපි පක්‍ෂයක්‌ හැටියට පුළුල් සමාජ පරිවර්තනයක්‌ වෙනුවෙන් පෙනී සිටිනවා.

ප්‍ර - පසුගියදා ඉදිරිපත් වූ අය වැයෙන් ජීවන වියදම පහත හෙළීම සඳහා අත්‍යවශ්‍ය භාණ්‌ඩ 13 ක බදු අඩු කළා. එයින් ජනතාවට සහනයක්‌ සැලසී තිබෙනවාද?

පි - සමහර සහන ලැබිල තියෙනවා. නමුත් සහන ලැබියයුතු සමහර ක්‍ෂේත්‍රවලට සහන ලැබිලත් නැහැ. ඒ පිළිබඳ අපට විවේචනයක්‌ තිබෙනවා. කෙසේ වුවත් ඇත්තටම සහන ලබාදිය හැකිව තිබූ බවයි මා හිතන්නේ. බදු අඩු කිරීම මගින් තමයි බඩු මිල අඩු කරල තියෙන්නේ වෙනත් සමහර භාණ්‌ඩවල බදු අඩු කරන්න ක්‍රමවේදයක්‌ නැහැ. ආණ්‌ඩුව විශාල වශයෙන් භාණ්‌ඩ ගෙනැල්ලා විකුණන්නේ නැහැ. ආණ්‌ඩුව මහා පරිමාණ ගොවිපළවල් ආරම්භ කරල නිෂ්පාදනයට අවතීර්ණ වෙලා නැහැ. ඒ නිසා රජයට කරන්න තියෙන්නෙ බදුÊපහළ දැමීමක්‌ පමණයි. බදුවල යම් පහළ දැමීමක්‌ කරල තියෙනවා. ඩීසල්, පෙට්‍රල් සහ ගෑස්‌ වගේ ඒවායේ බදු පහත දැමීමෙන් ප්‍රතිලාභයක්‌ ජනතාවට ලැබෙනවා.

ප්‍ර - අත්‍යවශ්‍ය භාණ්‌ඩවල මිල අඩු කළාට සහල්වල මිල අඩු කරල නැහැ. සහල් අත්‍යවශ්‍ය නැද්ද?

පි - ඇත්තටම ඒක ගැටලුවක්‌. හැබැයි ඒකත් අපි හරියටම තේරුම් ගත යුතුයි. පැට්‍රල් ඩීසල්වලට බද්දක්‌ තිබෙනවා. ඒ බද්ද අඩු කළ විට ඒවායේ මිල අඩු වෙනවා. ඒත් හාල්වලට බද්දක්‌ නැහැ. ඉතින් හාල් මිල අඩු කරන්නේ කොහොමද? ඇත්තටම එතන තිබෙනවා වෙන ප්‍රශ්නයක්‌. අපේ රටේ ගොවියා වී නිෂ්පාදනය කරනවා. ඒවා පාරිභෝගිකයා වෙත යැමට පෙර ක්‍රියාදාමයක්‌ තිබෙනවා. වී තොග රැස්‌ කරන්නෙක්‌ ඉන්නවා. සහල් මෝල් හිමියෙක්‌ ඉන්නවා. තොග වෙළෙන්දෙක්‌ ඉන්නවා. අපේ රටේ සිද්ධවෙන දේa තමයි අඩු මිලට වී ගන්නවා. නමුත් සහල් අඩු මිලට නැහැ. වීත් වැඩිවෙලා හාලුත් වැඩිවෙනවා නම් පිළිගන්න පුළුවන්. නමුත් අපේ රටේ සිද්ධ වෙන්නේ අඩු මිලට වී අරගෙන වැඩි මිලට හාල් අලෙවි කිරීමයි. මේ තත්ත්වය රජය මැදිහත් වෙලා පාලනය කළ යුතුයි. එහෙම වුණොත් විතරයි ගොවියටත් සාධාරණ මිලට වී විකුණාගන්නටත් පාරිභෝගිකයාට සාධාරණ මිලට හාල් ලබා ගන්නටත් පුළුවන් වන්නේ.

අය වැය ලේඛනයකදී මා හිතන්නේ නැහැ සැලසුම් සහගත ක්‍රමවේදයකට මේ නායකයන්ට යන්න පුළුවන්ද කියලා. මොකද ඔවුන් දන්නේ බඩු අඩු කරල මිල පහත දැමීම පමණයි. ඒත් සහල්වලට බද්දක්‌ නැහැ.

ප්‍ර - මේ අය වැයෙන් එක්‌ වරක්‌ පමණක්‌ අය කරන බදු පනවලා තිබෙනවා. ඇයි මේ එක්‌වරක්‌ පමණක්‌ අය කරන බදු ගේන්නේ.?

පි - කාලාන්තරයක්‌ තිස්‌සේ විවිධ බදු නොගෙවපු අය ඉන්නවා. බදු හිල්වලින් රිංගලා. අසීමිත ලාභයක්‌ ගත්තු සමාගම් තිබෙනවා. ඒ සමාගම්වලින් එක වරක්‌ පමණක්‌ විශාල බද්දක්‌ අය කිරීමේ ක්‍රමවේදයක්‌ වෙන්න ඇති අය වැයෙන් හඳුන්වා දීල තියෙන්නේ.

ප්‍ර - දිනේෂ්, වාසු, විමල් හා ගම්මන්පිල ආදීන් එකතු වෙලා අලුත් දේශපාලන පෙරමුණක්‌ හදාගෙන තිබෙනවා. මේක ජනතා විමුක්‌ති පෙරමුණ දකින්නේ කොහොමද?

පි - රාජපක්‍ෂගේ තුරුල්ලේ කාලයක්‌ ජීවත් වෙච්ච මේ අයට රාජපක්‍ෂගේ අවතාරයවත් නැතිව ජීවත් වෙන්න බැහැ. මොකද මේ කිසිවෙකුට කිසිදු පක්‍ෂයක්‌, පක්‍ෂ යාන්ත්‍රණයක්‌ හෝ පදනමක්‌ නැහැ. ඔවුන් රාජපක්‍ෂ තුරුල්ලේ විරාජමාන ලෙස වැජඹුණු, එහි බලයෙන් මුසපත් වෙලා මහා ධනයක්‌ එක්‌රැස්‌ කරගත්තු පිරිස්‌. මේ පිරිසට තියෙන්නේ රාජපක්‍ෂ සරණං ගච්චාමි විතරයි. ඒ නිසා රාජපක්‍ෂ අවතාරය නැවතත් කැඳවීමට ඔවුන් උත්සාහ කරනවා. ඒ රාජපක්‍ෂට තිබෙන ආදරය නිසා යෑයි කවුරු හරි හිතනවා නම් ඒක වැරදියි. මෙය ඔවුන් තමන්ගේ පැවැත්ම වෙනුවෙන් දරන උත්සාහයක්‌. මේක මේ රටේ ජනතාව පිළිගන්නේ නැහැ. ඔය හැදෙන පෙරමුණ තමයි මේ රටේ දුෂ්ටතම අන්ත ප්‍රතිගාමී, අන්ත කුහක පෙරමුණ. මෙයින් පෙරමුණක්‌ ගොඩනැගෙන්නෙත් නැහැ. හතර දෙනෙක්‌ එකතුවෙලා ඉන්නවා පමණයි.

ප්‍ර. ඇමැති ජෝන් අමරතුංග මහත්තයාට විරුද්ධව විශ්වාසභංග යෝජනාවක්‌ ඉදිරිපත් වී තිබෙනවා. ඒ පිළිබඳව ජනතා විමුක්‌ති පෙරමුණේ මතය කුමක්‌ද?

පි - ශ්‍රී ලංකා නිදහස්‌ පක්‍ෂයේ සභාපති ජනාධිපතිවරයා. ඒ පක්‍ෂයෙන්ම විශ්වාසභංග යෝජනාවක්‌ ගේනවා. තව පැත්තකින් ඒ ආණ්‌ඩුවෙන්ම වාහන ගන්නවා. තෙල් ගහගන්නවා. ඩ්‍රයිවර්ලත් ගන්නවා. මේක මේ දේශපාලනයේ පිළිකුල් සහගත තත්ත්වයක්‌. මේ වැනි මජර තත්ත්වයකට ජනතා විමුක්‌ති පෙරමුණ වැටෙන්නේ නැහැ. සැබැවින්ම අමාත්‍යවරයකුට එරෙහිව විශ්වාසභංගයක්‌ අවශ්‍ය නම්, ආණ්‌ඩුවට එරෙහි විශ්වාසභංගයක්‌ අවශ්‍ය නම් ඒක පිළිබඳව පුළුල් සාකච්ඡාවකින් පසු ගත යුතු ක්‍රියාමාර්ග තීරණය කළ යුතුයි. මේක එවැනි විශ්වාසභංගයක්‌ නොවෙයි. කටමැත දොඩවා මෙය ඉදිරිපත් කළාට මේ ගැන පාර්ලිමේන්තු විවාදයක්‌වත් පැවැත්වේවි යෑයි මා හිතන්නේ නැහැ.

ප්‍ර - ඒ වුණාට අගමැතිතුමා කියල තියෙනවා විශ්වාසභංගයෙන් ආණ්‌ඩුව පැරදුනොත් පාර්ලිමේන්තුව විසුරුවා හරිනවාය කියලා

පි - ඔව් ඒක ඔහු දාන තුරුම්පුවක්‌. මේ පාර්ලිමේන්තුවේ විශේෂ මන්ත්‍රීන් පිරිසක්‌ ඉන්නවා. පාර්ලිමේන්තුව හදිසියේ විසුරුවා හැරියොත් ඔවුන්ට පැන්ෂන් එක නැති වෙනවා. ඒ නිසා අගමැති උත්සාහ කරනවා පැන්ෂන් එක නැති වෙන බව කියා ආණ්‌ඩුවේ පැත්තට ඔවුන් නම්මවා ගැනීමට.

ප්‍ර - මේ යෝජනාව උඩ පාර්ලිමේන්තුව විසුරුවා හැරියොත් දින 100 වැඩපිළිවෙළට මොකද වෙන්නේ? ව්‍යවස්‌ථා සංශෝධන සම්මත කරන්නේ කොහොමද?

පි - මේ ගැන අගමැතිවරයා එකක්‌ කියා තිබෙනවා. විපක්‍ෂ නායක තව එකක්‌ කියා තිබෙනවා. මේවා වහසි බස්‌ විතරයි.

ප්‍ර - අගමැති කියන විදියට යෝජනාවෙන් ආණ්‌ඩුව පැරදුනොත් පාර්ලිමේන්තුව විසුරුවා හරින එකක්‌ නැද්ද?

පි - විසුරුවා හරින එකක්‌ නැහැ. ඒක තමයි මගේ හැඟීම. ඔබ හිතන්න මේ දින 100 සම්පූර්ණ වෙනවා අප්‍රේල් 19 දාට. ඇයි 23 දා වෙනකම් පාර්ලිමේන්තුව තියාගන්නේ? ඒ පැන්ෂන් එකටයි. දින 100 ඉවර වූ ගමන් ම 19 දා විසුරුවා හැරියොත් පැන්ෂන් එකට කාලය සම්පූර්ණ වෙන්න දින 4 ක්‌ මදි. එහෙමයි මේ ගොල්ලො මේව හදල තියෙන්නේ. ඒ නිසා අපට තේරුම් ගන්න පුළුවන් ව්‍යවස්‌ථා සංශෝධනය සම්මත කර ගැනීමට කප්පම් දෙන්න වෙලා තියෙනවා. විශ්වාසභංගය සම්මත කළොත් උඹලගේ පැන්ෂන් එක නැති කරනවා කියල බය කරල මෙල්ල කරගන්න බලනවා. ජනතාවට මේ සිදුවීම්වලින් තේරුම් ගන්න තියෙන්නේ අපේ රටේ උත්තරීතරයි කියල ඒ ගොල්ලො කියන, ඒ ගොල්ලො කියන තැන සිටින කණ්‌ඩායම්වල ඇත්ත ස්‌වභාවය තමයි මේකෙන් පෙන්නුම් කරමින් තිබෙන්නේ.

ප්‍ර - පසුගිය ආණ්‌ඩුව යටතේ ක්‍රියාත්මක වන පෝට්‌ සිටි සහ උමා ඔය ව්‍යාපෘතිවලට ජනතා විමුක්‌ති පෙරමුණ විරුද්ධ වන්නේ ඇයි?

පි - 'පෝට්‌ සිටි' නතර කළ යුතුයි. එකක්‌ අපේ රටේ කුඹුරු ගොඩකරන්නත් නීතියක්‌ තිබෙනවා. ඒත් අපේ රටේ මුහුද ගොඩකරන්න නීතියක්‌ නැහැ. මුහුද ගොඩකරන හැම රටකම ඒකට නීතියක්‌ හදල තියෙනවා. ඒ නිසා ඒකට නීතියක්‌ සෑදිය යුතුයි. පරිසර ඇගයීම් වාර්තාවක්‌ ඕනෑ. ඔබ හිතන්න මුහුදේ අක්‌කර 575 ක්‌ ගොඩ කරන විට මුහුදු පතුලේ අඩුම ගණනේ අක්‌කර 1000 ක්‌ වත් තිබිය යුතුයි. මේ මුහුද පිහිටලා තිබෙන්නේ ස්‌වාභාවිකවයි. තුඩුව, බොක්‌ක, කලපුව පිහිටලා තිබෙන්නේ ස්‌වාභාවික පිහිටීම් අනුවයි. අපට ඕන විදියට නොවෙයි. ඒ ස්‌වභාවික පිහිටීම්වලට විශාල හානියක්‌ ඇති කරනවා නම් එහි ඇතිවන අනිසි ප්‍රතිවිපාක ගැනත් අපි බැලිය යුතුයි. පසුගිය කාලෙ මධ්‍ය කඳුකරයට කරන ලද විනාශය එදා රෝහණ විඡේවීර සහෝදරයා පෙන්නල දුන්නා. බලන්න අද ඒ ප්‍රදේශවල නාය යමින් ජීවිත විනාශ වෙමින් තිබෙනවා. මේ පරිසර විනාශයට තවදුරටත් අනාගත පරම්පරාවට වන්දි ගෙවන්න ඉඩ දිය නොහැකියි. අනික මෙතන තිබෙන ආර්ථික ප්‍රශ්නය.

පෝට්‌ සිටි යටතේ මුහුදේ ගොඩකරන අක්‌කර 575 න් අක්‌කර 270 ක්‌ සින්නක්‌කරම චීන රජයට පැවරෙනවා. එතකොට මෙතන චීන දූපතක්‌ හැදෙනවා. ඒ හැර තව අක්‌කර 75 ක්‌ වෙන් කරනවා පොදු කටයුතුවලට. ඉතුරු ඉඩම් විකුණලා 60 - 40 අනුපාතයට බෙදා ගන්නවා. 40 ක්‌ වරාය අධිකාරියට. 60 ක්‌ චීන සමාගමට. අපේ මුහුද ගොඩකරලා ඒගොල්ලන්ට දූපතක්‌ හදාගන්න දීලා මහ ධනයක්‌ එක්‌රැස්‌ කරගන්න ඒ ගොල්ලන්ට ඉඩ ලැබෙනවා. අපට ආර්ථික වශයෙනුත් මෙයින් පාඩුයි.

ඒ වාගේම තමයි ජාත්‍යන්තර දේශපාලන තත්ත්වයත් කල්පනා කර බැලිය යුතුයි. අපේ කොළඹ වරාය ආසන්නයේ සින්නක්‌කර චීන දූපතක්‌ ගොඩනැගෙන එක හිතකරද අහිතකර ද කියල මේ සියල්ල සැලකිල්ලට ගෙන එහි තිබෙන භයානකකම නිසයි රනිල් වික්‍රමසිංහ විපක්‍ෂ නායකයා විදියට සිටිද්දී කිව්වේ ඔහු බලයට පත්වුණොත් මේක නතර කරනවා කියලා. ඒ නිසා දැන් ඒක ක්‍රියාත්මක කරන්න කිසිදු සදාචාරාත්මක අයිතියක්‌ නැහැ. ඒ වගේ අපි හොඳට තේරුම් ගන්න ඕන. මේ මෛත්‍රීපාල සිරිසේන මහත්තයට ලැබිල තියෙන ජනවරම ගැන. ඒක රාජපක්‍ෂ පුටුවෙන් එළවලා දමන්න ලැබුණු ජනවරමක්‌ පමණක්‌ නොවෙයි. ඒ කාලේ කරන ලද මේ ව්‍යාපෘතිවලට එරෙහිව නැඟී ආ ජනමතය මේ ජනවරම තුළට කාන්දු වී තිබෙනවා. ඒ ගැන තමයි මැතිවරණ වේදිකාවලත් කිව්වේ. ඒ නිසා ජනවරම අනුව ගත්තත් මේ ව්‍යාපෘතිය කරන්න බැහැ. ඒ නිසා අපි කියන්නෙ මේ පරිසර විනාශය නතර කළ යුතුයි.

උමා ඔය ගත්තොත් එහි පරිසර විනාශය දැන් තේරුම් අරන් තිබෙනවා. ගෙවල්වල බිත්ති පුපුරලා තිබෙනවා. කඳු කඩා වැටෙනවා. විශාල හානියක්‌ සිදුවෙලා තිබෙනවා. පසුගියදා ඌව පළාත් සභාවේ ඒකමතිකව යෝජනාවක්‌ සම්මත කරගත්තා මේක අත්හිටුවන්න කියලා. ඒ නිසා මා පාර්ලිමේන්තුවේදීත් කිව්වේ උමා ඔය ව්‍යාපෘතිsය අත්හිටුවන්න. අත්හිටුවල නැවත පරිසර අගැයීම් වාර්තාවක්‌ හදන්න. මේකට විකල්ප ක්‍රමවේදයක්‌ තිබෙනවාද කියල කල්පනා කර බලන්න. ඉන් පසු ව්‍යාපෘතිය කරනවා නම් කරන්න කියලයි. එසේ නැතිව මේ ව්‍යාපෘතිය කළොත් මධ්‍යම කඳුකරයේ දැවැන්ත විනාශයක්‌ සිදුවෙනවා. පරිසරය, ජන ජීවිතය විනාශ වේවි.

ප්‍ර - ජාතික විධායක සභාව මගින් මන්ත්‍රීවරුන්ට ආචාර ධර්ම පද්ධතියක්‌ හදන්න ඔබට බාර දුන්නානේ. මොකක්‌ද දැන් ඒකෙ තත්ත්වය.

පි - දින 100 වැඩ පිළිවෙළ යටතේ ආචාර ධර්ම පද්ධතියක්‌ මන්ත්‍රීවරුන්ට හදන්න ඕන කියල යෝජනාවක්‌ තිබුණා. ඒ අනුව ජාතික විධායක සභාව ඇතුළු කමිටුවකට පවරලා තියෙනවා. අපි හිතන්නේ නෑ මේ ආචාර ධර්ම පද්ධතියකින් මේ ඔක්‌කොම විසඳන්න පුළුවන් කියලා. අපේ රටේ සොරකම් කරන්න බෑ කියල නීතියක්‌ තිබෙනවා. නීති අඩුවක්‌ නැහැ. ඒත් සොරකම් සිද්ධ වෙනවා. මන්ත්‍රීවරයකු හැසිරෙන්න ඕන කොහොමද කියල නීතියක්‌ නැහැ. සම්ප්‍රදායක්‌ තිබෙනවා. ඒවා සිද්ධ වෙන්නෙ නැහැ. ආචාර ධර්ම පද්ධතිවලින් ම සියල්ල විසඳන්න බැහැ. හැබැයි උත්සාහයක්‌ දරන්න ඕන සමාජයට අඩුම තරමේ මන්ත්‍රීවරයෙක්‌ සම්ප්‍රදායට අනුව හැසිරෙන්නෙ නැතිනම් ඔහුට ඡන්දෙ දෙන්න එපා කියල සමාජ කතිකාවක්‌ ගොඩනැඟිය යුතුයි. ආචාර ධර්ම පද්ධතියක්‌ හදල මේ මන්ත්‍රීවරු හසුරුවන්න පුළුවන් කියල හිතනවා නම් එය මිථ්‍යාවක්‌ පමණයි. මේ අය ආචාර ධර්ම පද්ධතිවලින් හසුරුවන්න පුළුවන් අය නොවෙයි. බුදුÊදහමෙන්, හින්දු ආගමෙන්, ඉස්‌ලාම් ධර්මයෙන්, කතෝලික ආගමෙන් මෙහෙයවන්න බැරි වූ අය ආචාර ධර්ම පද්ධතිවලින් මෙහෙයන්න පුළුවන් කියලා මා හිතන්නේ නැහැ. ඒක නිකම් සමාජ මතයක්‌ ගොඩනැඟීමක්‌ පමණයි.

සාකච්ඡා කළේ - දයා ලංකාපුර

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.