ජල ව්‍යාපෘති 20 ක්‌ ඇරඹීමේදී
බිලියන ගණනක අක්‍රමිකතාවක්‌ සිදුවූවැයි
හිටපු ඇමැති දිනේෂ් හා ජල මණ්‌ඩල
නිලධාරීන් පිරිසක්‌ ගැන විමර්ශන


හේමන්ත රන්දුණු

පසුගිය රජය සමයේ රටපුරා පානිය ජල ව්‍යාපෘති 20 ක්‌ ස්‌ථාපිත කිරීමේදී සිදුවූ බව කියන රුපියල් බිලියන ගණනක මූල්‍ය අක්‍රමිකතාවක්‌ සම්බන්ධයෙන් හිටපු ඇමැති දිනේෂ් ගුණවර්ධන මහතා සහ ජල සම්පාදන හා ජලාපවාහන අමාත්‍යාංශයේ ජ්‍යෙෂ්ඨ නිලධාරීන් පිරිසක්‌ සම්බන්ධයෙන් බරපතළ වංචා විමර්ශනය සඳහා පත්කළ ජනාධිපති කොමිසම පුළුල් විමර්ශනයක්‌ ආරම්භ කර ඇත.

මෙම මූල්‍ය අක්‍රමිකතාව සම්බන්ධයෙන් හිටපු ඇමැතිවරයා ගෙන් සහ ජල සම්පාදන අමාත්‍යංශයේ හිටපු උසස්‌ නිලධාරීන් පිරිසකගෙන් ළඟදීම ප්‍රශ්න කිරීමට නියමිත බව ජනාධිපති කොමිසමේ ආරංචිමාර්ග පැවසීය.

ඉකුත් 2013 සහ 2014 වර්ෂවලදී මෙම පානීය ජලය ව්‍යාපෘති ආරම්භ කරනු ලැබුවේ විදේශ ණය සහ දේශීය බැංකුවලින් ලබා ගත් ණය මුදල් යොදා ගෙනය.

වව්නියාව, අම්පාර, විල්ගමුව, කොළඹ, බෙන්තර, ඇල්පිටිය ඇතුළු රටපුරා ප්‍රදේශ ගණනාවක පානීය ජල ව්‍යාපෘති 20 ක්‌ එවකට ජලසම්පාදන හා ජලාපවාහන මණ්‌ඩලය විසින් ආරම්භ කරන ලදී.

එහිදී මෙම ව්‍යාපෘති සඳහා යොදාගත් අමුද්‍රව්‍ය සැපයීමේදී මෙන්ම ඒ සඳහා ටෙන්ඩර් ලබාදීමේදී මහා පරිමාණ වංචාවන් සිදුවී ඇති බව ජනාධිපති කොමිසම සිදු කළ විමර්ශනයකින් අනාවරණය වී තිබේ.

මෙම ව්‍යාපෘතිවලින් සිදුවූ මූල්‍ය අක්‍රමිකතාව කොතෙක්‌ දැයි මේ වනතුරු ගණනය කර නොමැති බවත් එය රුපියල් බිලියන ගණනක්‌ වන බවට තොරතුරු ලැබී ඇති බවත් ජනාධිපති කොමිසම ආරංචිමාර්ග පවසයි.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.