බීච් බෝයිස්‌ලාට සුද්දන්ගේ සරණයි
අහුවෙන සුද්දට අබ සරණයි

කටේ කිරි සුවද යන්න කලින් බීච් බෝයිස්‌ලා වෙන හැටි
සුද්දන් සුද්ද කරන අමුතු ගේම්


ශ්‍රී ලංකාව ගැන ලොව පුරා ඇති විවිධ මත නිසාත් නිතර නිතර කරන ප්‍රවර්ධන නිසාත් මෙහි එන විදේශිකයන්ගේ ප්‍රමාණය දිනෙන් දින වැඩිවෙයි. එයට අනුගාමී අප රට තුළ බිහිවන ගයිඩ්ලාගේ සහ බීච් බෝයිස්‌ලාගේ ප්‍රමාණය ද වර්ධනය වෙයි. ඒ සමඟම ඔවුන් අතර වන අපචාර සහ වැරදි සිදුවීම් ද දිනෙන් දින ඉහළයයි.

සංචාරක මණ්‌ඩලය, විදේශ කටයුතු බාර අමාත්‍යාංශ සහ අදාළ රාජ්‍ය ආයතන මේ ගැන අදට වඩා වැඩි අවධානයකින් සොයා බැලිය යුතු බව අපේ අදහසයි.

ශ්‍රී ලංකාව යනු දිව්‍ය පාරාදීසයක්‌ මෙන් අලංකාර වූත් ජීවගුණයෙන් පිරි දූපතක්‌ බවට ලොව පුරා මතයක්‌ පවතී. විශේෂයෙන්ම රන්වන් වැලිතලාවෙන් යුත් නිල්වන් මුහුදු තීරය සදාහරිත වැසි වනාන්තර, අලි ඇතුන්, කොටි, වලසුන් වැනි වන සතුන් ගංගා ඇළ දොළ දියඇළි මෙන්ම නිල්වන් කඳුයායන්ගෙන් සහ තේවතුවලින් සපිරි කන්ද උඩරට වැනි තැන් නිසා ශ්‍රී ලංකාවට ලෝකයේ සුවිශේෂී ස්‌ථානයක්‌ හිමි වී ඇත. මේවා දැක බලා ගන්නට අප රටට ලොව නන්දෙසින් විදේශිකයන් පැමිණෙන්නේ බුරුතු පිටිනි.

ස්‌වභාව සෞන්දර්ය රස විඳීමට එන සංචාරකයන් පමණක්‌ නොව වෙනත් විවිධ වූ කරුණු කාරණා අරමුණු සහ අවශ්‍යතා සඳහා ද විදේශිකයෝ මෙරටට පැමිණෙති. ව්‍යාපාරික කටයුතු සේවා කටයුතු අධ්‍යාපන කටයුතු රාජකාරි රැකියා නිවාඩු ගතකිරීම වෛද්‍ය පහසුකම් ආදී දේ සඳහා මෙන්ම තම ලිංගික ආසාවන් සන්තර්පණය කරගනු පිණිස සහකරුවන් සහකාරියන් සොයා ගෙන ද සමහර විදේශිකයෝ මෙහි පැමිණෙති. ඒ අතර සමරිසියෝ හෙවත් සමලිංගික සේවනයට ලැදි පිරිමි සමලිංගික ගැහැණු ළමා අපචාරකාරයන් ලිංගික සංක්‍රාන්තිකයන් ද්‍රිලිංගිකයන් වැනි අය ද වෙති. මෙවැනි අය ගැන මෙන්ම අප රට තුළදී ලබා ගත හැකි සේවා සහ පහසුකම් ගැන ගැඹුරින් විස්‌තරාත්මකව ලියෑවුණු පොත් පත් ද අද ලොව පුරා පොත් සාප්පුවලින් ලබා ගත හැකිය. එමෙන්ම අන්තර්ජාලයේ ද අප රට ගැන විස්‌තරත් අප රට තුළදී සොයාගත හැකි යහපත් සහ අවර ගනයේ සේවා ගැන ද එහි පැහැදිලිව සඳහන්ය.

ටෝනි වීලර් නමැති ලොව පරසිදු සංචාරකයා විසින් ලොව පුරා කරක්‌ ගසා වසරින් වසර යාවත්කාලීන කරන ලෝන්ලි ප්ලැනට්‌ (තනිවූ ග්‍රහයා) නමැති සංචාරක අත්පොත ඒ සඳහා හොඳම උදාහරණය වන අතර ඒ පොතේ ඇති සමහර දේවල් ගැන අප රටේ ජීවත්වන්නන් පවා දන්නේ නැත. යහපත් ගුණාත්මක වැදගත් සේවා පහසුකම් මෙන්ම හොඳ ගංජා හෝ හෂීස්‌ සාධාරණ මිලට ලබා ගත හැක්‌කේ කොතනින් ද, සමාජ රෝග නැති ගණිකාවන් ඉන්නේ කොහේ ද, හොරුන්ගෙන් ප්‍රවේශම් වන්නේ කොහොම ද, චොකලට්‌ පාට සමක්‌ ඇති රන්වන් වැල්ලේ කොල්ලන් හෙවත් ගේ බීච් බෝයිස්‌ලා වැඩිපුර ඉන්නේ කොහේ ද, අඩුවට කාමර සහ නවාතැන් පහසුකම් ඇත්තේ කොහේ ද වැනි එකී නොකී දහසක්‌ අවර විස්‌තර ද මෙම පොත්වලින් දැන ගත හැකිය.

පොත් සීයක්‌ කියවා කටපාඩම් කරගෙන සහ එහි පිටපතක්‌ නිතර අත රඳවා සිටියත් භාෂා දැනුම සාමාන්‍ය දැනීම දේශාටන අත්දැකීම් කප්පරක්‌ තිබුණත් මෙහි එන බහුතරයක්‌ විදේශීය සංචාරකයන් කුමන හෝ අවස්‌ථාවකදී කාගේ හෝ සහය පිහිට මඟපෙන්වීම සහ උපකාරය පතයි.

මෙසේ සංචාරකයන්ට මඟපෙන්වන්නාට සාමාන්‍ය සරල සම්මත බසින් කියන්නේ ගයිඩ් කියායි. සංචාරකයන්ට මඟ පෙන්වන මෙවැනි ගයිඩ්ලා කුලක කීපයක්‌ අප රට තුළ දකින්නට ඇත.

ජාත්‍යන්තර සංචාරක ඒජන්සියක්‌ මඟින් කලින් සියල්ල වෙන්කරන ලද පහසුකම්වලින් යුත් තරුපහේ හෝටල්වල රැඳෙන අර්ධ සුඛෝපභෝගී ස්‌ටාර් බස්‌ රථවල ගමන් කරන, රජය අනුමත කරන ලද ලක්‌සල වැනි ස්‌ථානවලින් පමණක්‌ බඩු භාණ්‌ඩ මිලදී ගන්න, යහමින් මුදල් හදල් ඇති ධන කුවේරයන් බඳු සංචාරකයන්ට මඟ පෙන්වන්නාට කියන්නේ එක්‌සෙකටිව් ටුවර් ගයිඩ් කියායි. executive tour guide එහි සිංහල තේරුම සංචාරක විධායක මඟපෙන්වන්නායි. ඔහු ඉතා ඉහළ වැටුපක්‌ ලබයි. ඉංග්‍රීසි බස චතුර ලෙස කතා කළ හැකි අතර ප්‍රංශ, ජර්මන්, ඉතාලි, රුසියන් වැනි භාෂා ද හොඳින් හසුරවයි. මෙවැනි අයට රට තොට ගැන හොඳ දැනුමක්‌, ආචාරශීලි ගතිගුණ සහ පෙනුම හොඳ අධ්‍යාපනයක්‌ මෙන්ම ක්‍ෂේත්‍රයට අදාළ වන ඩිප්ලෝමා සහතිකයක්‌ හෝ උපාධියක්‌ පවා තිබිය යුතුය. ඔවුන් කරන්නේ ටයි පටියක්‌ බැඳ හොඳින් ඇඳ පැළඳ ගෙන සංචාරකයන් යන රියේ (මෝටර් රථයේ, වෑන් එකේ හෝ බස්‌රියේ) ඉදිරිපස අසුනේ වාඩිවී අදාළ භාෂාවෙන් සංචාරකයන්ට යන එන තැන් ගැන ආගිය විස්‌තර රටේ ශ්‍රී විභූතිය ඉතිහාසය, භූගෝලය වැනි දේ පැහැදිලි කර දීමයි. සංචාරකයන් බඩු භාණ්‌ඩ මිලට ගැනීම පිණිස ප්‍රසිද්ධ වැදගත් කඩයක හෝටලයක හෝ ව්‍යාපාරක ස්‌ථානයක නැවැත්තුවහොත් අනිවාර්යයෙන්ම මෙකී ටුවර් ගයිඩ් මහතාට එම සෑම මුදල් ගනුදෙනුවකින්ම සියයට විස්‌සක්‌ හතළිහක්‌ අතර ප්‍රතිශතයක කොමිස්‌ මුදලක්‌ ව්‍යාපාරික ආයතන විසින් ගෙවනු ලබයි. සමහර අවස්‌ථාවලදී කොම්පැනිය හෝ ඒජන්සිය හරහා මෙම කොමිස්‌ මුදල ලැබෙන අතර තවත් සමහරවිට Rජුවම ඔහුගේ අතට හෝ ගිණුමට බැරවෙයි. කෙසේ වෙතත් මාසය අන්තිමට මෙම ටුවර් ගයිඩ්ට ලැබෙන ලක්‍ෂයකට නොඅඩු වැටුපට අමතරව තව ඊට වැඩි ගණනක කොමිස්‌ මුදලක්‌ ද හිමිවෙයි. එසේම විදේශ සංචාර තෑගි භෝග, ආදරය, සතුට සහ සුද්දියන්ගේ ලිංගික සන්තෝසම් වැනි බෝනස්‌ ද ලැබෙන අවස්‌ථා සුලබය. අද අප රටේ මෙවැනි පලපුරුද් ද සහිත විශේෂඥ එක්‌සෙකටිව් ටුවර් ගයිඩ්ලාගේ හිඟයක්‌ රික්‌තකයක්‌ දකින්නට ඇති අතර ඒ වෘත්තිය සඳහා දැඩි ඉල්ලුමක්‌ ද පවතී.

දෙවැනි කණ්‌ඩායම වන්නේ සාමාන්‍ය ටුවරිස්‌ට්‌ ගයිඩ්ලා හෙවත් සංචාරක මඟපෙන්වන්නන්ය. තම ඉල්ලීම මත සංචාරක මණ්‌ඩලය මඟින් පවත්වන දේශන ඉගැන්වීම් සහ පුහුණු සැසි කීපයකට පසුව විභාගයකට වාඩි කරවා ඉන් සමත් වන අයට සහතිකයක්‌, බලපත්‍රයක්‌ වැනි දෙයක්‌ නිකුත් කරන අතර එකී ලැයිසම හිමි තැනැත්තාට තම බල ප්‍රදේශය තුළ හෝ සංචාරක මණ්‌ඩලයෙන් අවසර දෙන නගර ඇතුළත සංචාරකයන් හට මඟ පෙන්වන අවස්‌ථාව උදාවෙයි. සමහරුන්ට ජාතික මට්‌ටමේ අවසරය ද ලැබෙයි. එවැන්නන්ට දිවයින පුරා ඕනෑම තැනක තම රැකියාවේ යෙදිය හැකිය. නමුත් සංචාරක ව්‍යාපාරයේ සහ ටුවරිසම් උප සංස්‌කෘතියේ නොලියෑවණු ආචාර ධර්ම පද්ධතියට අනුව ගමේ පුහුලං ගමේ වවුලන්ට යන න්‍යාය මත පිට නගරයකට ගොස්‌ සුද්දන් ඇල්ලීම එතරම් ගෝචර නැත. උදාහරණයක්‌ වශයෙන් හික්‌කඩුව වැල්ලේ සුද්දන් අල්ලන සරත්ට මීගමුවට පැමිණ සුද්දන් ඇල්ලීම එතිකලි රෝංය. (සදාචාරයට පටහැනිය.) නමුත් තමාට අහුවුණු සුද්දා හෝ සුද්දිය සමඟ එසේත් නැත්නම් එම කණ්‌ඩායමක්‌ සමඟ රටපුරා ඇවිද්දාට ගම නගරය පෙන්නුවාට කිසිම අවුලක්‌ නැත.

තුන්වැනි කණ්‌ඩායම වන්නේ ප්‍රාදේශීය මට්‌ටමේ ගයිඩ්ලාය. මුහුදු බඩ පළාත්වල මේ අයට කියන්නේ බීච් බෝයිස්‌ හෙවත් වැල්ලේ කොල්ලන් කියායි. බෝයිස්‌ලා කීවාට වයස අවුරුදු දහය, දොළහේ සිට හැට හැත්තෑව පැන්න මහල්ලා දක්‌වා බීච් බෝයිස්‌ලා අද අප රටේ වැල්ල ආශ්‍රීතව දකින්නට ඇත.

හතරවැනි කණ්‌ඩායම ටුවර්ස්‌ Tours හෙවත් ජල්බරිස්‌ තැරැව්කරුවන්ය. මොවුන් අති භයානක පිරිසකි. Beware of Tours (තැරැව්කරුවන්ගෙන් ප්‍රවේශම් වෙන්න) කියා හික්‌කඩුව, ගාල්ල, උණවටුන, මහනුවර, මීගමුව, සීගිරිය, දඹුල්ල වැනි සංචාරක නගරවල ඒ කාලයේ අඩියෙන් අඩිය පෝස්‌ටර් ගසා තිබුණේ මේ මරිසිකාර පුද්ගලයන්ගෙන් විදේශීය සංචාරකයන් බේරා ගනු පිණිසයි. කුමන හෝ මුසාවක්‌ ඇද බා සුද්දන් සුද්දියන් සුද්ද කිරීම, ඔවුන්ගෙන් ලිංගික ආශ්වාදයක්‌ ලබා ගැනීම, අතවර කිරීම වැනි දේ මොවුන්ගේ ඒකායන අරමුණයි. සංචාරකයන් ගැවසෙන සෑම නගරයකම පාහේ මෙවැනි ව්‍යාජ ගයිඩ්වරුන් හෙවත් තැරැව්කරුවන් සැරිසරයි. ගයිඩ් වැඩ කිරීම ඔවුන්ගේ පූර්ණ කාලීන පීටිකාව නොවේ. සුද්දන් නැති කලට ඔවුන් හොරකම, කූට ව්‍යාපාර, මත්ද්‍රව්‍ය ජාවාරම, සිල්ලර වෙළෙඳාම වැනි වෙනත් ආදායම් මාර්ග වෙත ද යොමුවෙයි.

බීච් බෝයිස්‌ලා යනු වැල්ල අද්දරම හෝ එම ප්‍රදේශයේම ජීවත් වන කොටසකි. ගමේ පදිංචිකරුවන්, හෝටල් හිමියන්, ටැක්‌සි රියෑදුරන් මෙන්ම පොලිසියේ නිලධාරින් පවා මොවුන්ව හොඳින් දන්නා නිසා සුද්දන්ට සුද්දියන්ට භයානක හොරකම් චංචා හෝ අපරාධ කිරීමට මොවුන් පසුබට වෙති. නමුත් ටුවරිස්‌ලා යනු සුද්දන් බහින කාලයට පමණක්‌ නගරයට බහින නමක්‌ ගමක්‌ ලිපිනයක්‌ නැති (ඇඩ්‍රස්‌ නැති) අහසින් පාත් වුණු ඕපපාතික අපතයන් නිසා කිසි බයක්‌ නැතිව සුද්දන්ට සුද්දියන්ට පොලු තියති.

වැල්ලේ කොල්ලන් විදේශිකයන් සොයා වැල්ලට බහින්නට පටන් ගන්නේ කටේ කිරි සුවඳ යන්නටත් මත්තෙනි. බීච් බෝයිස්‌ලාගේ සහ එකී නගරවල උප සංස්‌කෘතියට අනුව විදේශීය සංචාරකයන් වෙත ගොස්‌ සේවා සපයනවාට කියන්නේ සුද්දන් අල්ලනවා කියායි. විදේශීයයන් පිරිසකට හෝ කණ්‌ඩායමක්‌ ඔවුන් හඳුන්වන්නේ සුද්දො පාටියක්‌ කියායි. (පාර්ශ්වයක්‌)

හික්‌කඩුවේ කමල් යනු සමස්‌ත ජන සමාජය ගැන මනා දැනුමක්‌ ඇති විශේෂයෙන්ම සංචාරක ව්‍යාපාරය පිළිබඳ වසර හතළිහකට වඩා අත්දැකීම් ඇති පළාතේ ප්‍රභූ පවුලකින් පැවත එන සුහදශීලී චරිතයකි. වෘත්තියෙන් චෙස්‌ ගුරුවරයකු වන ඔහු අමතර ආදායමක්‌ වශයෙන් තමාට පිය උරුමයෙන් ලැබුණු මුහුද අද්දර පිහිටි විශාල ඉඩමේ කාලයක සිට විදේශිකයන් සඳහා කබානා පහසුකම් සපයයි.

මේ කමල් එම ප්‍රදේශයේ සංචාරක ව්‍යාපාරය ගැන සහ බීච් බෝයිස්‌ලා ගැන දක්‌වන අදහසයි.

"සංචාරක ව්‍යාපාරය ඉස්‌සර වගේ දැන් එච්චරම සාර්ථක නැහැ. ගොඩක්‌ සංචාරකයන් හොඳට දැනගෙනයි මෙහෙ එන්නෙ. ඒක නිසා ගයිඩ්ලාට එච්චර වැඩ නැහැ. වැඩිදෙනෙක්‌ තරු පන්තියේ හෝටල්වල නැවතුණාට කන්නෙ බොන්නෙ පාරට ඇවිල්ල පොඩි හෝටලයකින්. හැම විස්‌තරයක්‌ම ඒ අය දැන් අන්තර්ජාලයෙන් ගූගල් කරල හොයාගන්න නිසා ගයිඩ්ලාගේ උපකාරය අවශ්‍ය නැහැ. මට තව එකක්‌ කියන්න ඕනි ඉස්‌සර වගේ නෙමෙයි දැන් කාලේ අපේ බීච් බෝයිස්‌ලා.. ඒ අය හරි හොඳයි. සාධාරණයි. ඒ කාලේ වගේ ජල්බරි මරිසි දාලා අහිංසක සුද්දන්ගේ ඉහමොල සූරා කාලා හපේ අත අරින්නේ නැහැ. අනික සුද්දොත් රටකින් රටකට එන්නේ මෝඩයෝ වගේ නෙමෙයි. ඔක්‌කොම සැලසුම් කරගෙනයි. මෙහෙ ආවම කීයක්‌ වියදම් කරනව ද, කීයක්‌ නාස්‌ති කරනව ද කොච්චර පිනට දෙනව ද කියල උන් දන්නව. අපේ අය හිතුවට උන් රැවැට්‌ටුවා කියල බලාගෙන ගියාම අපියි රැවටිලා තියෙන්නේ. තමන්ගේ වීසා ඉවර වුණාම ඒ අය ගාණට පිළිවෙළට ගිහින් තමන්ගෙ රටේ ආයෙ පුරුදු රස්‌සාව පටන් ගන්නව. ඒ අයගේ සාමාන්‍ය ජන ජීවිතයට පුරුදු වෙනවා. අපේ අය හම්බ කරපු සල්ලි ටික ඉක්‌මණට වියදම් කරගෙන තව සුද්දො පාටියක්‌ එනතුරු හරි ආයේ සීසන් එකක්‌ එනතුරු හරි මුහුද දිහා බලාගෙන හූල්ලනව",

කමල් එසේ කීවට හික්‌කඩුව නගරයට මඳක්‌ එහායින් ඇති නාරිගමෙන් මුහුදට බහින කළු හිච්චා කියන්නේ ඊට වෙනස්‌ කතාවකි.

"සුද්දො කියන්නෙ මහ මෝඩ රැලක්‌ මහත්තයෝ. මේ අහුවෙලා තව ටිකකින් ආයෙ අහුවෙනව. අපේ උන් දන්නව ගාණට අවශ්‍ය කෙනාව කරකවල තම්බල ගන්න. වැඩිහරියක්‌ සුද්දො අහුවෙන්නෙ තහනං දේ හොයන්න ගිහිල්ලයි, කළු හිච්චා ඇතුළු රට පුරා වෙසෙන තවත් බීච් බෝයිස්‌ලා සිය ගණනකට වැඩි පිරිසක්‌ සමඟ කතා කොට වරු ගණන් කාලය ගත කොට අප ලබා ගත් අත්දැකීම් මත අපට කියන්නට ඇත්තේ තාමත් බොහෝ විදේශිකයන් කපටි ටුවරිස්‌ලාගේ ගැට සහ උගුල්වලට අසුවන බවයි.

ටෙරී නමැති ජර්මානුවාට ගංජා හෝ හෂිස්‌ ගන්නට වුවමනා වී ඒ බව පවසන්නේ නසාර් නමැති බීච් බෝයිටය. ටෙරීව රැවටිය හැකි බව දන්නා නසාර් ඔහුට ඉස්‌තරම් වර්ගයේ ගංජා සුරුට්‌ටුවක්‌ සාම්පල් වශයෙන් පොවා වැඩි ප්‍රමාණයක්‌ මිලදී ගෙන එන්නැයි යයි පවසා ලොකු මුදලක්‌ අරන් පිටව යයි. පැය කීපයකට පසුව නසාර් යළි දාඩිය දාගෙන දිව එන්නේ. "ටෙරී මාර වැඩේ වුණේ.. බඩු ගන්න ගිහින් මගේ යාළුවාව පොලිසියට මාට්‌ටු වුණා..... දැන් හිරේ දාන්නයි යන්නේ. එහෙම වුණොත් යාළුවා ඔයාව පාවලා දෙයි. ඊට පස්‌සේ මල කෙළියක්‌ වෙන්නේ ඒක නිසා කීයක්‌ හරි පොලිසියට දීලා මිනිහව බේරා ගනිමු, කියමිනි.

දියෙන් ගොඩගත් මාළුවෙක්‌ මෙන් ගැහෙන්නට ගන්නා ටෙරී තව විශාල මුදලක්‌ නසාර්ට පූජා කරන්නේ පොලිස්‌ ග්‍රහණයෙන් බේරෙනු පිණිසයි. මෙහිදී නසාර් කරන්නේ තනිකරම බොරුවකි.

වෙරළාශ්‍රිත සංචාරක කලාපවලට ආවිට බහුතරයක්‌ සුද්දන්ට සුද්දියන්ට අමුතු අමුතු ආසා පහළ වෙයි. මේ ඕනෑම ආසාවක්‌ දොලදුකක්‌ සංසිඳුවන්නට අපේ බීච් බෝයිස්‌ලා සහ ටුවරිස්‌ලා ඉදිරිපත් වන්නේ ඉතාම සාදරයෙණි. නමුත් මෙහි ඇති බැරූරුම්කම ගැන කියන්නට ඔවුන් පැය කීපයක්‌ම වැය කරයි. ඒ අනුව සුද්දාට අවශ්‍ය ගංජා හෂීස්‌ හෝ හෙරොයින් වැනි මත්ද්‍රව්‍ය එසේත් නැත්නම් තම අවශ්‍යතාව පිණිස ගමේ ගොඩේ හැඩට අඳින ගැමි තරුණියක්‌, සමලිංගික සේවනය සඳහා සම කළු පැහැති කොළු ගැටවෙක්‌. ළමා අපචාරයක්‌ සඳහා ලාබාල තාම මුවින් කිරිසුවඳ හමන දැරිවියක්‌ වැනි ඉල්ලීමක්‌ සඳහා තැරැව්කරු තබන ලන්සුව ඉතා ඉහළය. සුද්දා ද කිසි ලෝබකමක්‌ නැතිව මුදල් ගෙවන අතර පසු තැරැව්කරුගේ වලිගයවත් සොයා ගන්නට නැත.

වරක්‌ මා දන්නා ගයිඩ් කොල්ලෙක්‌ නාග මාණික්‍යයක්‌ කියා සුද්දෙකුට කුඩා කළු ගල් කැටයක්‌ අලෙවි කළේ රුපියල් තුන් ලක්‌ෂයකටය. පිරිසිදු එළකිරි පිරුණු කුඩා අසෝක වීදුරුවක බහාලා ඔහු සුද්දාට කළු ගල් කැටය විකුණා කියා සිටියේ."මෙය හැමදාම මෙසේ මේ වීදුරුව තුළම තිබෙන්නට හැරිය යුතු බවත් නිකමට හෝ එළියට ගත්තොත් එහි බලය බිඳෙන බවයි. එම නාග මාණික්‍යය තම රටට ගෙන ගොස්‌ නිදන කාමරයේ මේසයක්‌ මත තබා නිතර නිතර වන්දනාමාන කරන කල්හි සිතූ පැතූ සම්පත් ලැබෙන බවත් සිරුරට වඩා ශක්‌තියක්‌ ලැබෙන බවත් එසේම වැඩි කාලයක්‌ ලිංගික ක්‍රියාවේ නිරතවිය හැකි වාජීකරණ බලයක්‌ ලැබෙන බවත් ඔහු සුද්දාට කියා ඇත. ඊළඟ වසරේ ලංකාවට ආ සුද්දා ඔහුට කියා ඇත්තේ ගල වැඩකරන බවත් එය ඉතා බලගතු බවත් තවත් ගල් කීපයක්‌ මෙවර ද රැගෙන යා යුතු බවත්ය.

අපේ බීච් කොල්ලන් සහ ටුවරිස්‌ලා විසින් සුද්දන් හට කරන ලද වංචා, අපරාධ, සොරකම්, බොරු ගැන පත්තර පිටුවක්‌ නොව පොත් සීයක්‌ පවා ලිවිය හැක. ඒවා එදා මෙන්ම අදටත් සිදුවෙයි. බහුතරයක්‌ සුද්දන් මේවාට විරුද්ධව පොලිසියට නොයන්නේ ඒ සෑම වංචාවක්‌ පසුපසම ඔහුගේ හෝ ඇයගේ නීති වීරෝධී සදාචාරයට පටහැනි ඉල්ලීමක්‌ ඇති නිසාය.

අලුත්ගම, බේරුවල, බෙන්තොට, අම්බලන්ගොඩ, නාරිගම, තිරණගම, හික්‌කඩුව, උණවටුන සහ මීගමුව වැනි මුහුදු බඩ පළාත් වලට එන සංචාරකයන් වැඩි දෙනෙක්‌ ඉල්ලන්නේ ලිංගික ආසාවන් සන්තර්පණය කෙරෙන දේවල් බව අපට පැවසුවේ සංචාරක ව්‍යාපාරයෙහි ඔස්‌තාර් වරයෙකි. ඔහු දැනට වසර පනහක්‌ තිස්‌සේ මේ කටයුත්තෙහි නියෑලෙයි. සුද්දන් අදින වාහන අටක්‌, හෝටල් තුනක්‌ සහ වැල්ලේ තැනු කබානා තිහකට අධික වත්කමක්‌ ඇති ජර්මන් නිහාල් කියන පරිදි ජර්මනිය ඇතුළු යුරෝපා රටවල් රැසකම අප රට කුප්‍රකටව ඇත්තේ ලිංගික සේවා ඉක්‌මණටම ආරක්‌ෂාකාරීවම ලබාගත හැකි දේශයක්‌ ලෙසිනි.

පිඩෝ µSඩියා හෙවත් කුමරකාමය නමැති ලිංගික දිශානතියෙන් හෙවත් අසම්මත කාමචර්යාවෙන් පෙළෙන මැදිවිය පැනපු සුද්දියන් ලාබාල කොලු ගැටයන් සොයා නිතර මෙහි එන අතර හැට පැන්න නාකි සුද්දන් ද හිරිමල් කොලු ගැටයන් සොයා මෙහි ඇදෙන බව අද රහසක්‌ නොවේ.

අද වැල්ලට බහින බහුතරයක්‌ කොල්ලන්ට කිසි අපහසුවෙන් තොරව බාසා හත අටත් කතා කළ හැකිය. එහි ව්‍යාකරණ සහ උච්චාරණ දෝෂ තිබුණ ද ඉතා චතුර ලෙස වතුර මෙන් එළියට එන වදන් නිසා සුද්දන් ද හොල්මන් වෙති. අපේ වැල්ලේ කොල්ලන් ඉංග්‍රීසියෙන් කතා කරන්නේ ද ඉතා දක්‌ෂ අන්දමටය. සාමාන්‍යයෙන් හෝ උගත් නගරයේ වෙසෙන අපේ තරුණ, තරුණියෝ අන් අය ඉදිරියේ ඉංග්‍රීසි වැනි පර බසක්‌ කතා කරන්නට මදක්‌ ලැඡ්ජාවක්‌ මැදිකමක්‌ දැක්‌වුව ද දකුණු පළාතේ වෙසෙන බීච් බෝයිස්‌ලා කිසි චාරයක්‌ නැති බ්‍රොaකන් ඉංග්ලිෂ් ඉතා ප්‍රසිද්ධියේ කතා කරන්නේ කිසි ලැ-ජාවක්‌, ඇඹරීමක්‌ නැතිවය. අපට නොතේරුණාට සුද්දන්ට නම් ඒවා ඉතා හොඳින් තේරෙයි.

බෝයිස්‌ලා කීවට මැදි වයසටත් ආසන්න අය ද අද සුද්දන් අල්ලන්නට වැල්ලට බහිති. ඔවුන් වැඩි දෙනෙක්‌ විවාහකයෝය. නමුත් සමහර විට සමරිසි සුද්දෙක්‌ ළඟින් ඇසුරු කරති. එසේම නාකි සුද්දියෙක්‌ සමඟ හෝ රූමත් තරුණ සුද්දියක්‌ සමඟ හෝටල් කාමරයක යහන් ගත වෙති. මේ කුමක්‌ කළ ද අපේ මිනිහාගේ විවාහක බිරිඳට ඒ ගැන ගැටලුවක්‌ නැත. ඔවුන්ට ඕනෑ තම සැමියා ඩොලර් හෝ යුරෝ මිටියක්‌ ගෙදර අරන් ඒමයි. නමුත් තම සැමියා සිංහල හෝ දේශීය කෙල්ලක්‌ හෝ ගැහැනියක්‌ සමඟ සම්බන්ධයක්‌ පවත්වනවාට ඔවුන් කැමති නැත. මෙය අද වැල්ලේ සාමාන්‍ය තත්ත්වයයි.

සමහර අම්මලා කිසි බයක්‌ නැතිව තම ගැටවර හෝ නව යොවුන් වයසේ පිරිමි දරුවන්ව වැල්ලට යවන්නේ. පලයන් ගිහින් සුද්දෙක්‌ පස්‌සෙ ගිහින් කීයක්‌ හරි හොයං වරෙන්, මොකෝ ආයෙ කොල්ලන්ට දරුවො හම්බ වෙනව කියලැයි, වැනි අසික්‌කිත කතාද කියමිනි.

සමහර බීච් බෝයිස්‌ලා සුද්දියන් අල්ලන්නට අමුතු ක්‍රමවේදයන් පාවිච්චි කරති.

"හලෝ මැඩම් මගේ ගර්ල් ෙµ්‍රන්ඩ් ඉන්නේ ප්‍රංශයේ. මට ප්‍රංශ බාසාව ලියන්න තේරෙන්නෙ නැහැ මට කරුණාකරල එයාට ලියුමක්‌ ලියල දෙනවද ?

මේ අද වැඩි දෙනෙක්‌ සුද්දියන් අල්ලන ක්‍රමයකි. අහිංසක ඉල්ලීමට රැවටෙන සුද්දිය ඔහුට ලියුමක්‌ ලියා දීමට ඉදිරිපත් වෙයි. ඔහුගේ ලිපියේ ඇති අහිංසක කමට, ආදර වදනට, පැණි බේරෙන බොරුවට මුලාවන සුද්දිය අන්තිමට නවතින්නේ ඔහු සමඟ නිදි වැදීමෙන් සහ තමාගේ වස්‌තුව ද ඔහුට පූජා කිරීමෙනි.

අද දකුණු පළාතේ භයානක ගයිඩ් මාµsයාවක්‌ ද ක්‍රියාත්මක වෙයි. පළාතේ හෝ කලාපයේ චන්ඩි පාට්‌ දාන මහ කෙරුමාට කප්පමක්‌ ලෙස කොමිස්‌ මුදල් නොදී කිසිවකුට තම ගයිඩ් රස්‌සාව කරගෙන යැමට නොහැකි කාලයක්‌ පසුගිය කාලයේ පැවතුණි. ඒ අනුව සුද්දාගෙන් උපයන මුදලින්, වාහනය හයර් කර ලැබෙන මුදලින්, මැණික්‌ සාප්පුවෙන් ලද කොමිස්‌ මුදලින් හෝ වෙනත් එවැනි අන්දමට ගයිඩ්ට ලැබෙන මුදලින් සියයට තිහක මුදලක්‌ අනිවාර්යෙන්ම කෙරුමාට ගෙවිය යුතුය. නැති නම් එදායින් පසු ඔහු ගයිඩ් වැඩේ කර හමාරය. නියමිත මුදල දුන්නොත් කිසි කරදරයක්‌ නැතිව සුද්දන් ඇල්ලිය හැකිය. ඕනෑම මරිසියකට ද ඉඩ ලැබේ. ගමේ ප්‍රශ්න, පොලිස්‌ ප්‍රශ්න, නීති ප්‍රශ්න සියල්ල කෙරුමා විසඳයි.

සුද්දන් සමඟ විවාහ වන ලාංකික තරුණියන් මෙන්ම සමරිසියන් සමඟ විවාහ වී විදේශගත වන කොල්ලන් ද අද දකුණු පළාතේ වැල්ලබඩ ප්‍රදේශවල එමටය. එමෙන්ම සුද්දියන් සමඟ විවාහ වී විදේශගත වන බීච් බෝයිස්‌ලා ද අනන්තය. නමුත් මෙවැනි විවාහ එතරම් සාර්ථක නැති බව තතු දන්නෝ කියති.

මිත්‍ර ශ්‍රී කරුණානායක

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.