බ්‍රාහ්මණවත්තේ සීවලීතිස්‌ස අනු නාහිමියන්ගේ ශාසනික හා සමාජ මෙහෙවර ප්‍රශංසනීයයි
- අගමැති රනිල් වික්‍රමසිංහ ශෝක පණිවුඩයකින් කියයි

රටේ සමගිය, සංහිඳියාව වෙනුවෙන් සුවිශේෂී කාර්යභාරයක්‌ ඉටුකළ බ්‍රාහ්මණවත්තේ සීවලීතිස්‌ස අනු නාහිමිපාණන් වහන්සේගේ ශාසනික සහ සමාජ මෙහෙවර ප්‍රශංසනීය යෑයි අගමැති රනිල් වික්‍රමසිංහ මහතා ශෝක පණිවුඩයක්‌ නිකුත් කරමින් කියා සිටී.

එම ශෝක පණිවුඩයේ වැඩිදුරටත් මෙසේද සඳහන් වේ.

ශ්‍රී ලංකා අමරපුර නිකායේ මහා ලේඛකාධිකාරී, ත්‍රිපිටක වාගීෂ්වරාචාර්ය, ආචාර්ය අතිපූජ්‍ය බ්‍රාහ්මණවත්තේ සීවලීතිස්‌ස අනුනායක ස්‌වාමීන්ද්‍රයාණන් වහන්සේ අපවත් වූ බව දැන ගන්නට ලැබීමෙන් මම බලවත් සංවේගයට පත්වීමි.

1936 වසරේ බලපිටිය බ්‍රාහ්මණවත්තේ උපත ලද අප අනු නාහිමිපාණෝ 1951 වසරේ දී එවකට යාපනය නාගදීප විහාරස්‌ථානාධිපති වූ බ්‍රාහ්මණවත්තේ ධර්මකීර්ති හිමියන් යටතේ පැවිදි දිවියට සැපත් වූහ. අතිපූජ්‍ය යක්‌කඩුවේ ප්‍රඥරාම වැනි දැන උගත් භික්‍ෂුන් වහන්සේලා ඇසුරේ ධර්ම ශාස්‌ත්‍ර හැදැරූ අනු නාහිමිපාණන් වහන්සේ 1966 වසරේ ඉන්දියාවේ මධුරෙයි විශ්වවිද්‍යාලයෙන් දෙමළ භාෂාවෙන් ශාස්‌ත්‍රවේදී උපාධියද, ආචාර්ය උපාධියද ලබාගත්හ. මුලින්ම ගුරුවරයකු ලෙස ගිරිතලේගම, කුලියාපිටිය, ලාහුගල, කිරිල්ලවල වැනි විවිධ ප්‍රදේශවල සේවය කළ අනු නාහිමිපාණන් වහන්සේ කැලණිය විදුහලේ සහ කැලණිය ධර්මාශෝක විදුහලේ විදුහල්පති ධුරයෙහිද කටයුතු කර ඇත.

දෙමළ භාෂාව මැනවින් හැසිරවීමේ සමත්කම් දැක්‌වූ අතිපූජ්‍ය සීවලීතිස්‌ස අනු නාහිමිපාණෝ දෙමළ බසින් ධර්මය දේශනා කළ ස්‌වාමීන් වහන්සේ නමක්‌ වූහ. දිගු කාලයක්‌ නාගදීප විහාරස්‌ථානයේ වැඩ වාසය කළ උන්වහන්සේ එහි විහාරාධිපති ධුරය දරමින් එම ප්‍රදේශයේ දෙමළ ජනතාවගේද ඉමහත් ගෞරවාදරයට පාත්‍ර වූහ. යුද සමයේ නාගදීප විහාරස්‌ථානයේ සුරක්‌ෂිත බව වෙනුවෙන් දැඩි කැපවීමකින් කටයුතු කළ යතීන්ද්‍රයාණන් වහන්සේ නමකි.

එසේම කිලිනොච්චිය ලුම්බිණි විහාරස්‌ථානය, කොළඹ නාග විහාරය, බලපිටිය වික්‍රමසිංහාරාමය,

ශ්‍රී පාද නල්ලතන්නි බෞද්ධ මධ්‍යස්‌ථානය ආදී විහාරස්‌ථානවල විහාරාධිපතිත්වය දැරූ අනු නාහිමිපාණන් වහන්සේ ශ්‍රී ලංකා අමරපුර නිකායේ විවිධ තනතුරු හොබවමින්, දෙස්‌ විදෙස්‌ ධර්ම ප්‍රචාරයේ යෙදෙමින් දෙමළ බසින් මෙන්ම සිංහල බසින්ද ග්‍රන්ථකරණයේ යෙදෙමින් ඉටුකළ ශාසනික, සමාජ මෙහෙවර ප්‍රශංසනීයය.

සාමය සඳහා ආගමික සංහිඳියාව සංවිධානයේ නියෝජ්‍ය සභාපති, ආගම් සමුළුවේ නියෝජ්‍ය ලේකම්, ද්‍රවිඩ ධර්ම දූත ව්‍යාපාරයේ සභාපති ආදී භූමිකාවන්හි සුවිශේෂ කාර්යභාරයක්‌ උසුලමින් අප රටේ වාර්ගික සමගිය, සංහිඳියාව වෙනුවෙන්ද, යහපත් සමාජයක්‌ ගොඩනැංවීමේ පරම අභිප්‍රායෙන්ද අනු නාහිමිපාණන් වහන්සේ ඉටුකළ යුග මෙහෙවර පැසසුම් කටයුතුය.

මා සමඟ ඉතාමත් සමීපව කටයුතු කළ අතිපූජ්‍ය සීවලීතිස්‌ස අනු නාහිමිපාණන් වහන්සේ මගේ දේශපාලන ගමන් මඟටද විටින් විට අවවාද අනුශාසනා ලබා දෙමින් ලබාදුන් ශක්‌තිය මේ අවස්‌ථාවේදී මහත් ගෞරව පූර්වකව සිහිපත් කරමි.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.