ලන්ඩනයට යළි ත්‍රස්‌ත ප්‍රහාරයක්‌
7 ක්‌ මියයති - 48 කට තුවාල

චතුර පමුණුව

ලන්ඩන් නුවරට එල්ල වූ ත්‍රස්‌ත ප්‍රහාරයෙන් පුද්ගලයන් හත් දෙනකු මියගොස්‌ තවත් 48 දෙනකු තුවාල ලබා ඇත.

සෙනසුරාදා (03 දා) රාත්‍රි 10 ට පමණ සුදු පැහැති වෑන් රථයකින් පැමිණි ජිහාඩ් සාමාජිකයන් තිදෙනකු ලන්ඩන් බ්‍රිඡ් පාලම මතින් ගමන් ගත් පුද්ගලයන් 20 ක්‌ පමණ යටකර පසුව එම රථයෙන් බැස අසල සිටි සියලු දෙනාටම පිහිවලින් ඇන තිබේ.

මෙම පාලම අසල බොරෝ මාකට්‌ ප්‍රදේශයේ මත්පැන් ශාලාවල සිටි අයටද පිහියෙන් ඇන තිබේ.

මෙම ප්‍රහාරය පිළිබඳ පළමු දුරකථන ඇමතුම ලැබී විනාඩි අටක්‌ තුළ එම ස්‌ථානයට පැමිණි පොලිස්‌ නිලධාරීන් ත්‍රස්‌තයන් තිදෙනාට වෙඩි තබා මරාදමා ඇත.

සිද්ධිය ඇසින් දුටු ලන්ඩන් වැසියකු වන ජෙරාඩ් ප්‍රකාශ කරන්නේ ත්‍රස්‌තයන් මේ අල්ලාහ් වෙනුවෙන් යෑයි කෑගසමින් තරුණියකට 15 වතාවක්‌ පිහි පහර එල්ල කළ බවයි.

ලන්ඩන් බ්‍රිඡ් පාලම මත සිටි බී.බී.සී. වාර්තාකාරිනිය වූ හොලී ජොන්ස්‌ ප්‍රකාශ කළේ වෑන් රිය තමා වටින් කැරකී ගොස්‌ හය දෙනෙකු හැප්පූ බවයි.

මේ ත්‍රස්‌තයන් තිදෙනා මරාගෙන මැරෙන බෝම්බකරුවන් ලෙස සැරසී සිටි නමුත් ඒවා ව්‍යාජ ජැකට්‌ බව ලන්ඩන් පොලිසිය කියයි.

මැන්චෙස්‌ටර්හි සංගීත ප්‍රසංගයකට එල්ල වූ මරාගෙන මැරෙන බෝම්බ ප්‍රහාරයෙන් දින 12 කට පසුව මේ ත්‍රස්‌ත ප්‍රහාරය එල්ල විය. මැන්චෙස්‌ටර් ප්‍රහාරයට 23 ක්‌ බිලි වූහ.

මෙහිදී පොලිස්‌ නිලධාරියකුටද පිහියෙන් ඇන තිබේ. අඩියක්‌ පමණ දිගැති පිහියාවලින් මෙම ත්‍රස්‌තයන් සන්නද්ධව සිටි බව ඇසින් දුටුවෝ පවසති.

මැන්චෙස්‌ටර් ප්‍රහාරයට පසුව ලන්ඩන් නගරයේ ආරක්‍ෂාවට හමුදා භටයන්ද යොදවා තිබිණි.

ත්‍රස්‌තවාදීන් තිදෙනා මැදපෙරදිග සම්භවයක්‌ ඇති පුද්ගලයන් බව ඩේලිමේල් පුවත්පත කියයි.

බ්‍රිතාන්‍ය මහ මැතිවරණය ලබන බ්‍රහස්‌පතින්aදා පැවැත්වීමට නියමිතය.

කෙසේ නමුත් මේ ප්‍රහාරයේ වගකීම මෙතෙක්‌ කිසිවකු විසින් භාරගෙන නැත.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.