ග්ලයිෆොසෙට්‌ යළි ගෙන්වීමට
කිසි ලෙස ඉඩ දෙන්නේ නෑ

- අතුරලියේ රතන හිමි

රනිල් ධර්මසේන, රසාංගනී හේරත්

තේ කර්මාන්තයට මුවා වී මේ වන විට තහනමට ලක්‌කර ඇති ග්ලයිෆොසෙට්‌ වල් නාශක යළි ගෙන්වීමට ගන්නා උත්සහය වැලැක්‌වීමට කළ හැකි උපරිම දේ සිදු කරන බව ජනාධිපති ජ්‍යෙෂ්ඨ උපදේශක පාර්ලිමේන්තු මන්ත්‍රී අතුරලියේ රතන හිමියෝ පැවසූහ.

මහා පරිමාණ තේ කර්මාන්තකරුවන් සඳහා පමණක්‌ ග්ලයිෆොසෙට්‌ පොහොර ආනයනය කිරීමට වැවිලි කර්මාන්ත අමාත්‍යංශය කැබිනට්‌ පත්‍රිකාවක්‌ ඉදිරිපත් කිරීමට සූදානම් වන බවත් ජනපති මෛත්‍රිපාල සිරිසේන මහතා හා අගමැතිවරයා ඊට ඉඩ නොදෙන බව විශ්වාස බවත් ඊයේ (19 දා) කොළඹ පැවැති මාධ්‍ය හමුවකදී රතන හිමියෝ පැවසූහ.

ග්ලයිෆොසෙට්‌ නොමැතිව වී ගොවිතැන සිදුකළ හැකි බව අද තහවුරු වී තිබෙන බවද තේ කර්මාන්තයට ද මෙම වල් නාශක අවශ්‍ය නොවන බවද පැවසූ උන්වහන්සේ මෙම පොහොර ගෙන්වීමේ පිටුපස පොහොර සමාගම් හා බලවතුන් සිටින බව කීහ.

තේ කර්මාන්තය තුළ මහ පරිමාණ තේ වතු හිමිකරුවන් සිටිනුයේ සියයට 40 ක්‌ බවද එයින් ලැබෙන ආදායම සියයට 25 ක්‌ බවද කී රතන හිමියෝ සියයට 60 ක්‌ වන කුඩා තේ කර්මාන්තකරුවන් වැඩි ආදායමක්‌ රටට ලබා දෙන බවත් සඳහන් කළහ.

මහ වතු සමාගම්වලට තේ කර්මාන්තය නිවැරැදිව කරගෙන යා නොහැකි නම් යළි ඒවා නිවැරැදි පාලනයකට හෝ කළමනාකරණයකට යටත් කළ යුතු බවද රතන හිමියෝ පැවසූහ.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.