බැංකු ගිණුම් වාර්තා ඉල්ලා
සීඅයිඩිය ඇලෝසියස්‌ගේ නිවසට යයි

සරත් ධර්මසේන, ශ්‍යාම් නුවන් ගනේවත්ත

භාණ්‌ඩාගාර බැඳුම්කර ජනාධිපති කොමිසමේ රහස්‌ පොලිස්‌ කණ්‌ඩායමක්‌ පර්පෙචුවල් ට්‍රෙෂරීස්‌ සමාගමේ හිමිකරු වන අර්ජුන් ඇලෝසියස්‌ මහතාගේ නිවසට ඊයේ (12 වැනිදා) හදිසියේම ගොස්‌ ඔහුගේ බැංකු ගිණුමේ ප්‍රකාශ රැගෙන වහාම කොමිසමට පැමිණෙන ලෙස බලකර ඇතැයි ඔහු වෙනුවෙන් පෙනී සිටින ජනාධිපති නීතිඥ අනූජ ප්‍රේමරත්න මහතා ඊයේ බැඳුම්කර කොමිසමට දැනුම් දුන්නේය.

පර්පෙචුවල් ට්‍රෙෂරීස්‌ සමාගමේ ප්‍රධාන විධායක නිලධාරී කසුන් පලිසේන මහතා ඊයේ කොමිසම හමුවේ සාක්‍ෂි දෙමින් සිටියදී ඇලෝසියස්‌ මහතා වෙනුවෙන් පෙනී සිටි ජනාධිපති නීතිඥ අනූජ ප්‍රේමරත්න මහතා මේ බව කොමිසමට කීවේය.

මේ අවස්‌ථාවේ පොලිස්‌ නිලධාරීන් ඇලෝසියස්‌ මහතාගේ නිවසේ සිටින බවද ඔවුන් බැංකු වාර්තා ලබාදෙන ලෙස බලකර සිටින බවද නීතිඥ ප්‍රේමරත්න මහතා කියා සිටියේය.

පෙරේදා (11 වැනිදා) සවස වන තෙක්‌ කොමිසමේ රහස්‌ පොලිස්‌ නිලධාරීන් අර්ජුන් ඇලෝසියස්‌ මහතාගෙන් ප්‍රශ්න කර ඇති බවත් ඔහුගේ බැංකු ගිණුම් වාර්තා රැගෙන පසු දින නැවත පැමිණෙන ලෙස දන්වා ඇති බවත් ජනාධිපති නීතිඥ ප්‍රේමරත්න මහතා පැවසීය.

රහස්‌ පොලිස්‌ නිලධාරීන් අර්ජුන් ඇලෝසියස්‌ මහතාට එසේ දැනුම් දී ඇතත් බැංකු ගිණුම් වාර්තා බැංකුවෙන් ලබාගැනීම ඉක්‌මනින් කළ නොහැකි බවද හෙතෙම සඳහන් කළේය.

මේ අවස්‌ථාවේදී ජ්‍යෙෂ්ඨ අතිරේක සොලිසිටර් ජනරාල් දප්පුල ද ලිවේරා මහතා පැවසුවේ අර්ජුන් ඇලෝසියස්‌ මහතා හමුවීමට රහස්‌ පොලිස්‌ නිලධාරීන් ඔහුගේ නිවසට ගියේ ඔහුට කළ නියෝගය අනුව බැංකු ගිණුම් වාර්තා සමඟ ඊයේ ඔහු කොමිසමට නොපැමිණි නිසා බවයි.

ඇලෝසියස්‌ මහතාගේ බැංකු වාර්තා ලබාදෙන ලෙස බැංකුවලට දන්වා ඇති බවත් ඒ අනුව එම බැංකු වාර්තා අද (13 දා) සහ හෙට (14 දා) දිනවලදී කොමිසමට ඉදිරිපත් කරන බවත් ජනාධිපති නීතිඥ ප්‍රේමරත්න මහතා කොමිසමට දැනුම් දුන්නේය. ඒ සඳහා කොමිසමේ අවසරය ලැබිණි.
 


 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.