ඇමරිකානු චිත්‍රපටයට එරෙහි වූවෝ
සමන්තුරේ අධිකරණයට ගල් ගසති

හේමන්ත රන්දුනු සහ සුසන්ත අමරබන්දු

නබිනායකතුමාට අපහාස වන අයුරින් ඇමරිකාව නිෂ්පාදනය කරන ලද චිත්‍රපටයට විරෝධය පළ කරමින් ඊයේ (19 වැනිදා) පෙරවරුවේ සමන්තුරේ සහ සයින්දමරුදු නගරවලට රැස්‌වූ දහසකට අධික මුස්‌ලිම් ජාතිකයන් පිරිසක්‌ කලහකාරී ලෙස හැසිරෙමින් සමන්තුරේ අධිකරණයට ගල්මුල් ප්‍රහාර එල්ල කරමින් පොලිස්‌ නිලධාරීන්ට ද ප්‍රහාර එල්ල කිරීම නිසා එම ප්‍රදේශවල උණුසුම් තත්ත්වයක්‌ උද්ගත විය.මෙම උද්ඝෝෂණය සංවිධානය කළ පුද්ගලයන් සමන්තුරේ නගරයේ පාසල්වල දරුවන් බලහත්කාරයෙන්ම ඒ සඳහා යොදවාගෙන ඇති බව පොලිස්‌ පරීක්‍ෂණවලදී හෙළිවී තිබිණි.

සමන්තුරේ අධිකරණය වෙත ගල් මුල් ප්‍රහාර එල්ල කර ඇත්තේ පාසල් ශිෂ්‍යයන් පිරිසක්‌ විසින් බවත් ඒ සම්බන්ධයෙන් පරීක්‍ෂණ ආරම්භ කර ඇති බවත් පොලිසිය කියයි.

නබිනායකතුමාට අපහාස වන අන්දමින් ඇමරිකාව නිෂ්පාදනය කරන ලද චිත්‍රපටයට විරෝධය පළ කරමින් මුස්‌ලිම් ජාතිකයෝ දින කීපයක සිට අම්පාර ප්‍රදේශයේ විරෝධතා ව්‍යාපාරවල නිරත වෙමින් සිටියහ.

ඊයේ පෙරවරු 11.00 ට පමණ උද්ඝෝෂකයන් පිරිසක්‌ සමන්තුරේ නගරයට රැස්‌වූ අතර පැය දෙකකට ආසන්න කාලයක්‌ තිස්‌සේ මෙම පිරිස්‌ විරෝධතා පෙළපාලි පැවැත්වූහ.

මෙම උද්ඝෝෂණය පැවැති අවස්‌ථාවේ සමන්තුරේ නගරයේ සාප්පු බොහොමයක්‌ වසා දමා තිබිණි.

පැය දෙකකට ආසන්න කාලයක්‌ තිස්‌සේ උද්ඝෝෂණයේ යෙදුණු මුස්‌ලිම් ජාතිකයෝ පසුව විසිර ගියහ.

මේ අතර කලහකාරී ලෙස හැසිරෙමින් පාසල් දරුවන් මෙම උද්ඝෝෂණය සඳහා යොදවා ගත් මුස්‌ලිම් ජාතිකයන් පිරිසක්‌ හඳුනාගෙන ඇති අතර ඔවුන් අත්අඩංගුවට ගැනීම සඳහා විශේෂ පොලිස්‌ කණ්‌ඩායමක්‌ පරීක්‍ෂණ ආරම්භ කර ඇත.

සමන්තුරේ සහ ඒ අවට ප්‍රදේශවල ආරක්‍ෂාව සඳහා විශේෂ පොලිස්‌ කණ්‌ඩායම් යොදවා තිබේ.

නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්‌පති පූජිත් ජයසුන්දර මහතාගේ උපදෙස්‌ මත අම්පාර පොලිස්‌ අධිකාරි ප්‍රේමලාල් රණගල මහතාගේ මෙහෙයවීමෙන් මේ පිළිබඳව පරීක්‍ෂණ පැවැත්වේ.