ව්‍යාජ ක්‍රෙඩිට්‌ කාඩ් යොදාගෙන
මිලියන 260 ක්‌ වංචා කරලා


හේමන්ත රන්දුණු

ව්‍යාජ ක්‍රෙඩිට්‌ කාඩ්පත් යොදාගෙන රජයේ බැංකු මගින් රුපියල් මිලියන 260 ක මුදලක්‌ වංචනික ලෙස ලබාගත් බව කියන රාජ්‍ය නොවන සංවිධානයක සභාපතිවරයෙක්‌ අපරාධ පරීක්‍ෂණ දෙපාර්තමේන්තුව මගින් අත්අංගුවට ගෙන ඇත.

මෙම මහාපරිමාණ වංචාවට සම්බන්ධ පුද්ගලයන් 14 දෙනෙක්‌ මීට ඉහතදී අපරාධ පරීක්‍ෂණ දෙපාර්තමේන්තුව මගින් අත්අඩංගුවට ගෙන තිබිණි.

මේ සම්බන්ධයෙන් අත්අඩංගුවට ගැනීමට නියමිතව සිටි මෙම සැකකරු රටින් බැහැරව කලක්‌ සැඟවී සිටියේය.

මොහු අත්අඩංගුවට ගැනීමට ජාත්‍යන්තර පොලිසියේ සහාය ලබාගැනීමට අපරාධ පරීක්‍ෂණ දෙපාර්තමේන්තුව පියවර ගනිමින් සිටියහ.

මේ අතර සැකකරු හොර රහසේම ශ්‍රී ලංකාවට පැමිණ නීතිඥවරයෙකු මාර්ගයෙන් අපරාධ පරීක්‍ෂණ දෙපාර්තමේන්තුව වෙත භාරවී ඇත. පසුව මෙම සැකකරු අත්අඩංගුවට ගෙන රඳවා තබා ගැනීමේ නියෝග මත තබාගෙන ප්‍රශ්න කරගෙන යෑයි.

මෙම සැකකරු ඇතුළු සංවිධානාත්මක පිරිසක්‌ විසින් රාජ්‍ය නොවන සංවිධානයක්‌ පිහිටුවාගෙන අසරණයන්ට පිහිට වීම සඳහා යෑයි කියමින් එහි ගිණුමකට මුදල් රැස්‌ කර ඇත.

ව්‍යාජ ක්‍රෙඩිට්‌ කාඩ්පත් යොදාගෙන රජයේ බැංකුවකින් ලබාගත් රුපියල් මිලියන 260 ක මුදලක්‌ මෙම රාජ්‍ය නොවන සංවිධානයේ ගිණුමට බැරකරගෙන තිබේ.

එම රජයේ බැංකුව මගින් අපරාධ පරීක්‍ෂණ දෙපාර්තමේන්තුව වෙත කල පැමිණිල්ලකට අනුව විමර්ශන ආරම්භ කර තිබිණි. එහිදී මෙම මහා පරිමාණ වංචාව පිළිබඳව සුලමුල හෙළිකරගත් අපරාධ පරීක්‍ෂණ දෙපාර්තමේන්තුව ඊට සම්බන්ධ ප්‍රධාන සැකකරුවන් 15 දෙනෙක්‌ මේ වනවිටත් අත්අඩංගුවට ගෙන තිබේ.

එම සැකකරුවන් සියලු දෙනා මේ වන විට රඳවා තබා ගැනීමේ නියෝග මත තබාගෙන ප්‍රශ්න කරගෙන යෑයි.

මෙම මහා පරිමාණ වංචාවට සම්බන්ධ තවත් පුද්ගලයන් පිරිසක්‌ අත්අඩංගුවට ගැනීමට නියමිතව ඇති අතර අපරාධ පරීක්‍ෂණ දෙපාර්තමේන්තුව පරීක්‍ෂණ පවත්වාගෙන යයි.
 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.