විෂ මුසු සිසිල් පැන් දී මත්කර
කනකර කොල්ලකන කල්ලියක්‌

නුවරඑළි එන්නේ ප්‍රවේශමෙන්

මස්‌කෙළිය - ගාමිණී බණ්‌ඩාර ඉලංගන්තිලක

විෂ වර්ග මිශ්‍ර කරන ලද සිසිල් පැන් පානය කිරීමට දී මත්කර සිහි මුර්ජා වීමෙන් අනතුරුව මුදල් හා කනකර සොරකම් කරන සංවිධානාත්මක කොල්ල කණ්‌ඩායමක්‌ නුවරඑළියේ සැරිසරන බවට අනාවරණය වී ඇති නිසා එම කොල්ල කල්ලියෙන් ප්‍රවේශම් වන ලෙස නුවරඑළිය පොලිසිය මහජනතාවගෙන් ඉල්ලා සිටියි.

ව්‍යාපාරික කටයුතු සඳහා පැමිණි අය හා සංචාරක පිරිසක්‌ ලෙස හැසිරෙමින් නවාතැන් පහසුකම් අවශ්‍ය බව පවසමින් කාමර හා නිවාස සොයන මුවාවෙන් මෙම කොල්ල කල්ලියේ පිරිස්‌ විවිධ පුද්ගලයන් හමුවී තම අරමුණු ඉටුකර ගැනීම සඳහා සැලසුම් කරන බවත්, එසේ නවාතැන් පහසුකම් සොයා දෙන්නට ඉදිරිපත් වන පුද්ගලයන් සමග කුළුපග වී ඔවුන්ට විවිධ අයුරින් සංග්‍රහ උපකාර කිරීමට ඉදිරිපත් වන බවත් පවසති. අනතුරුව මෙම කොල්ල කල්ලිය ළඟ ඇති මත්පැන් හා සිසිල්බීම වර්ගවලට විෂ මුසු කර ඔවුන්ට පානය කිරීමටදී සිහි මුර්ජා වීමෙන් පසුව කොල්ලකරුවන්ගේම වාහනවලින් හා ත්‍රිරෝද රථවලින් සිහි මූර්ජා වූවන් රැගෙන ගොස්‌ හුදෙකලා පාළු ස්‌ථානවලදී ඔවුන් සතු මුදල් හා රන් ආභරණ සියල්ල ගලවාගෙන පලායන බවද පොලිසිය පවසයි.

මෙවැනි සිදුවීම් කීපයක්‌ සම්බන්ධයෙන් ඉකුත් සතිය තුළ නුවරඑළිය පොලිsසියට වාර්තා වී ඇති හෙයින් ඒ සම්බන්ධයෙන් මහජනතාව දැනුත් කිරීමට මේ වන විට පියවර ගෙන ඇති බව නුවරඑළිය පොලිසිය පවසයි.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.