සිංහල ජනතාව බහුතරය ලෙස
ජීවත්වන අවසන් සියවස මෙයයි

- ඇමැති පාඨලී චම්පික රණවක

ප්‍රභාත් විතාන

වසර දස දහස්‌ ගණනක ඉතිහාසය ගැන කතාකරන, ලෙයින්, රනින්, යකඩින් හා ගලින් කරපු ඉතිහාසයක්‌ ගැන ආඩම්බර වෙන අපේ ජාතියේ මේ ගෙවෙන්නේ අන්තිම සියවස යෑයි තාක්‍ෂණ හා පර්යේෂණ ඇමැති පාඨලී චම්පික රණවක මහතා පැවසීය.

රටේ ජනගහණය පිළිබඳ ගැටලු මතුවී තිබෙනවා. අද මේ රට වේගයෙන් වියපත් වන රටක්‌ බවට පත්වෙලා. රටේ දරුවන්ගේ ජනගහණය ක්‍රමයෙන් අඩුවෙමින් යන අතර රටේ ජනගහණය සමස්‌ථයක්‌ ලෙස වර්ධනය වීම 1% ටත් අඩු තත්ත්වයට පත්ව තිබෙනවා. සිංහල ජනතාවගේ ජනගහණ වර්ධනය 0.74 %යි. මේ ආකාරයට සිංහල ජනගහණය දෙගුණයක්‌ වීමට වසර 160ක්‌ ගත වන අතර මේ රටේ සිංහල ජනතාව බහුතරයක්‌ ලෙස ජිවත්වන අවසන් සියවස ලෙස මෙය හඳුන්වාදිය හැකි යෑයිද රණවක මහතා කියා සිටියේය.

බෙදුම්වාදය අද මේ රටේ හැමතැනම දක්‌නට ලැබෙනවා. ඇඳුමෙන්, පැළඳුමෙන්, කෑමෙන්, බීමෙන්, බැංකු කටයුතුවලින්, ආර්ථිකයෙන් ආදී සෑම තැනකදීම මේ සංස්‌කෘතික බෙදුම්වාදය ක්‍රියාත්මක වෙමින් තිබෙනවා. මේ රටේ මාධ්‍ය, සමාජය, දේශපාලනය පවා අද මේ අන්තවාදී, සමාජ බෙදුම්වාදී කල්ලි කණ්‌ඩායම්වල ගොදුරු බවට පත්ව තිබෙනවා. තවත් දශක කිහිපයකින් අපටත් අද සිරියාවේ ඉරාකයේ ඇµaඝනිස්‌ථානයේ ඇසෙන අඳෝනාවන්ගේ හ`ඩ අසන්නට සිදුවීම පුදුමයක්‌ නොවනු ඇතැයිද ඇමැතිවරයා කියා සිටියේය.

බණ්‌ඩාරනායක අනුස්‌මරණ ජාත්‍යන්තර සම්මන්ත්‍රණශාලා පරිශ්‍රයේ පසුගියදා පැවති ප්‍රංශයේ ශ්‍රී ලංකා අධ්‍යාපනික, සංස්‌කෘතික හා සමාජයීය සංවිධානය මෙහෙයවූ වාර්ෂික ශිෂ්‍යත්ව ප්‍රදානෝත්සවයට සහභාගී වෙමින් ඇමැතිවරයා මේ බව කියා සිටියේය.

එහිදී වැඩිදුරටත් අදහස්‌ දැක්‌වූ ඇමැති චම්පික රණවක මහතා:

අප අවට කලාපයේ රටවල් ගණනාවක කාන්තාවන්ට අධ්‍යාපනය ලැබීමේ අවස්‌ථාව අහිමිකොට තිබේ. පකිස්‌ථානයේ කාන්තා පාසල් වසා දැමීමට අන්තවාදීන් ක්‍රියාකරන විට එය නොතැකූ මලාලා වැනි දියණියන්ට වෙඩි තැබූ අතර කාන්තාවන්ට අධ්‍යාපනය අහිමි කළා. අද බොහෝ රටවල ඇතැම් ආගමික ආයතනවල 7 හා 8 වන සියවස්‌වල ලියෑවී තිබෙන සම්ප්‍රදායික පොත් පත්වල තියෙන ආකාරයට නීති ක්‍රියාත්මක කිරීමට යාමෙන් කාන්තාවන්ට අධ්‍යාපනය අහිමිකොට තිබෙනවා.

නමුත් අද අපේ රට ගැන අපට ඉතාමත් ආඩම්බර විය හැකියි. මන්ද අද අපේ රටේ දැරිවියන්, කාන්තාවන් අධ්‍යාපනයෙන් ඉහළින්ම සිටිනාවා. විශ්වවිද්‍යාලවල, වෛද්‍ය, නීතීඥ, අධිකරණ සේවාවල, පරිපාලන නිලධාරි, ග්‍රාම නිලධාරි, අමාත්‍යාංශ ලේකම්වරු දක්‌වා අද බහුතරයක්‌ කාන්තාවන් නියෝජනය කරති. මේ රටේ අධ්‍යපනය ගැන සෑම දර්ශකයකින්ම බැලූවිට අපට ආඩම්බර විය හැකියි. අද සෑම තැනකම විදුලිය, දුරකතන, අධ්‍යාපන හා සෞඛ්‍ය වැනි පහසුකම් ඉහළ නැංවී තිබෙනවා. කෙසේ වුවද මේ රටතුළ අධ්‍යාපනයේ විවිධ විෂම ක්‍රියාදාමයන්, ක්‍රියාකලාපයන් ක්‍රියාත්මක වෙනවා. රජය අධ්‍යාපනයට වියදම් කරන මුදල හා සමාන මුදලක්‌ අද අධ්‍යාපනය වෙනුවෙන් දෙමාපියන් ද වියදම් කරනවා.

අවාසනාවකට අද අධ්‍යාපනයේ විවිධ ප්‍රවණතාවයන් පාලනය කළ නොහැකි තත්ත්වයන්ට පත්ව තිබෙවනවා. මුළු ලෝකයේම නැති පාසල් පද්ධතියක්‌ මේ රටේ බිහිවී තිබෙන අතර ඒවා අන්තර්ජාතික පාසල් ලෙස හඳුන්වනවා. අන්තර්ජාතික පාසලක්‌ අවශ්‍ය වෙන්නේ රාජ්‍ය තාන්ත්‍රිකයන්ට, එසේ නොමැතිනම් යම් රටක විදේශිකයන් ජීවත් වන්නේනම් ඔවුන්ගේ දරු දැරියන්ගේ අධ්‍යාපනය සඳහායි. 1980 දශකයේ මුල් කාලයේ ලංකාවේ පළමු අන්තර්ජාතික පාසල ආරම්භ වුණේ ඒ වෙනුවෙනි.

අද මේ ඊනියා අන්තර්ජාතික පාසල්වල ලක්‌ෂ 04 ක්‌ දරුවන් ඉගෙන ගන්නා අතර මේ සඳහා දෙමාපියන්ගේ වියදම රටේ අධ්‍යාපන වියදමෙන් හරි අඩකි. රටේ ලක්‌ෂ 40ක්‌ දරුවන්ගේ වියදමෙන් හරි අඩක්‌ මේ ලක්‌ෂ 04ක්‌ වූ දරුවන් වැය කරනවා.

1961 මේ රටේ පාසල් ජනසතු කළ අවස්‌ථාවේ සිරිමාවෝ බණ්‌ඩාරණායක මැතිණියට මහත් පීඩනයක්‌ එල්ල වූ අතර විශාල ලේ වැගිරීමක්‌ කරන බවට ඇතැම් ආගමික සංවිධාන තර්ජනය කළා. ඒ අවස්‌ථාවේ අපේ ස්‌වාමීන් වහන්සේලා ඉදිරිපත්වී එතුමියට ඊට ශක්‌තිය ධෛර්යය ලබා දුන්හ. එදා ගෙන ආ පනතේ රජයේ අවසරය නැතිව මේ පාසල් පවත්වා ගෙන යානොහැකි බවට පැහැදිලිව සඳහන් වුණු රටේ නීතියට පිටින්, නීති විරෝධීව දරුවන් හාර ලක්‌ෂයක්‌ අධ්‍යාපනය ලබන අන්තර්ජාතික පාසල් බිහිවීම කණගාටුවට කරුණක්‌. මෙය රටේ අධ්‍යාපනයේ සිදුවූ බලගතු විලම්පනයක්‌. විද්‍යා අධ්‍යාපනය සිංහලෙන් ඉගැන්වීමට බැරි බව එදා පැවසුවත් අපේ විද්වතුන් ඉතා වෙහෙස මහන්සියෙන් ඒ කාර්යය ඉටු කරනු ලැබු අතර මේ තත්ත්වය දැන් කණපිට හැරී තිබේ. තමන්ගේ බස අතහැර ඉංග්‍රීසි බසින් අධ්‍යාපනය ලැබීමේ ප්‍රවණතාවක්‌ ඇති වී තිබෙනවා.

අද පාසලේ පළමු පන්තියේ සිටම සිංහල බස අතහැර ඉංග්‍රීසි භාෂාවට යොමුවීම ඉතාම කණගාටුදායක කරුණක්‌. එපමණක්‌ නොව, අද පෞද්ගලික අංශයේ රැකියා ලබාදීමේදී ද ඊනියා ජාත්‍යන්තර පාසල් වලට හා එම පාසල් ඇසුරෙන් ගොඩනැගී ඇති ජාත්‍යන්තර විශ්ව විද්‍යාල වලට ප්‍රමුඛතාවය ලබාදෙනවා. අද රටේ අධ්‍යාපනය ඉතාම කණගාටුදායක තත්ත්වයට, ඉතාම විකෘති සහගත තත්ත්වයකට, රටට ජාතියට ලබාගත් ජයග්‍රහණයන් ආපසු හරවන තත්ත්වයට පත්වන යුගයක්‌ උදාවී තිබෙනවා.

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.