දරුණු කොටි රඳවා සිටින මැගසින් හිරගෙදර
ආරක්‍ෂාවෙන් යුද හමුදාව ඉවත් කෙරේ


සමන් ගමගේ

දරුණු ගණයේ එල්.ටී.ටී.ඊ. ත්‍රස්‌තවාදී සැකකරුවන් රැසක්‌ රඳවා සිටින කොළඹ මැගසින් බන්ධනාගාරයේ ආරක්‍ෂාව සඳහා යොදවා සිටි යුද හමුදා නිලධාරීන් ඉන් ඉවත් කිරීමට රජය පියවර ගෙන තිබේ.

ඊශ්‍රායල් සටන් පුහුණුව පවා ලැබූ ප්‍රබල ත්‍රස්‌තවාදී සැකකරුවන් රාශියක්‌ රඳවා සිටින බැවින් එම බන්ධනාගාරයට විශේෂ ආරක්‍ෂාවක්‌ සැපයීම සඳහා පසුගිය කාලයේ මැගසින් බන්ධනාගාරයට හමුදා නිලධාරීන් යොදවා තිබිණි.

මැගසින් බන්ධනාගාරයේ රඳවා සිටින ත්‍රස්‌තවාදී සැකකරුවෝ ඉකුත් කාලයේ අවස්‌ථා කිහිපයකදී බන්ධනාගාරය තුළ උපවාස හා උද්ඝෝෂණද පැවැත්වූහ. එම තත්ත්වය හමුවේ මෙසේ හමුදා ආරක්‌ෂාව ඉවත් කිරීම බරපතළ ගැටලුවක්‌ බව බන්ධනාගාර නිලධාරියෙක්‌ පැවසීය.

වැලිකඩ බන්ධනාගාර ගැටුමෙන් පසු කාලයක සිට බන්ධනාගාර නිලධාරීන්ට ලබාදී තිබූ ටී. 56 ගිනි අවිද ඉවත් කර ඇත. මේ හේතුවෙන් මෙසේ හමුදා ආරක්‌ෂාව ඉවත් කිරීමෙන් මැගසින් බන්ධනාගාරය දැඩි අනාරක්‌ෂිත තත්ත්වයකට පත්ව ඇතැයිද හෙතෙම සඳහන් කළේය.


 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.