සෝමවංශ සහෝදරයාගේ වෙනසට හේතුව පැහැදිලි නෑ
- ජනතා විමුක්‌ති පෙරමුණේ බස්‌නාහිර පළාත් පළාත් සභා මන්ත්‍රී ලාල් කාන්ත

තමාට ජනතා විමුක්‌ති පෙරමුණෙන්a ඉවත්වීමට බලපෑ හේතු සාධකයන් කිහිපයක්‌ පිළිබඳවම සෝමවංශ අමරසිංහ මහතා අවස්‌ථා කිහිපයකදීම ප්‍රකාශ කර ඇත. එම හේතු සාධකයන් අතර ඇති එක්‌ හේතු සාධකයක්‌ වන්නේ, එම පක්‍ෂයේ සාමාජිකයන්ට පන්සලකට යැමට නොහැකි තත්ත්වයක්‌ තිබෙන බවට කළ ප්‍රකාශයයි.

එම කාරණය සහ වත්මන් දේශපාලනය පිළිබඳව ජනතා විමුක්‌ති පෙරමුණේ දේශපාලන මණ්‌ඩල සභික බස්‌නාහිර පළාත් සභා මන්ත්‍රී කේ. ඩී. ලාල්කාන්ත මහතා දැක්‌වූ අදහස්‌ සහ සෝමවංශ අමරසිංහ මහතා ආගමික කාරණා පිළිබඳව දැක්‌වූ අදහස්‌ පිළිබඳව ජනතා විමුක්‌ති පෙරමුණේ හිටපු ප්‍රබල නායකයකු වූ නන්දන ගුණතිලක මහතා සහ ජනතා විමුක්‌ති පෙරමුණෙන් වෙන්ව ගොස්‌ වෙනම පක්‍ෂයක්‌ ලෙස කටයුතු කරන පෙරටුගාමී සමාජවාදී පක්‍ෂයේ ප්‍රචාරක ලේකම් පුබුදු ජයගොඩ මහතා දැක්‌වූ අදහස්‌ පහත පරිදි වේ.

ප්‍රශ්නය - සෝමවංශ අමරසිංහ මහතා ජනතා විමුක්‌ති පෙරමුණෙන් ඉවත් වන බව ප්‍රකාශ කළ මාධ්‍ය හමුවේදී සඳහන් කළා, තමන් පන්සිල් රැක්‌කත්, පන්සිල් ගැනීමට නොහැකි බව. සෝමවංශ මහතාගේ එම ප්‍රකාශය පිළිබඳව ඔබගේ ස්‌ථාවරය කුමක්‌ද?

පිළිතුර - විවිධ ආගම්වලට සම්බන්ධ විශාල පිරිසක්‌ අපේ පක්‍ෂයට සම්බන්ධ වී සිටිනවා. ඒ අය තමන්ගේ ආගමික සහ සංස්‌කෘතික කටයුතු තමන්ට රිසි පරිදි ඉටුකර ගන්නවා. අපි වුණත් ගෙදරකට ගොඩවෙන්නේ ආයුබෝවන් කියල තමයි. නමුත් සෝමවංශ සහෝදරය කියනව පක්‍ෂය එහෙම ආයුබෝවන් කියල කියන්නේ නැතිලු. ඇත්තටම ඒ කතා බොරු.

අපේ පක්‍ෂයේ මධ්‍යම කාරක සභාව දේශපාලන බල මණ්‌ඩලය ඇතුළු සියලු දෙනා දන්නවා ආයුබෝවන් කියල කිවයුතු තැනදී කියන්න. ඒ වගේම අතට අත දෙන්න ඕන තැන්වලදී එය කරන්නත් දන්නවා. මුස්‌ලිම් ප්‍රජාව සමඟ කටයුතු කිරීමේදී අතට අත දීම තමයි සිද්ධ වෙන්නේ. අපගේ සමහර ප්‍රාදේශීය සභා මන්ත්‍රීවරරු, පන්සල් වල දායක සභා වල ප්‍රධානීන්.

මේ කියන කාරණය පිළිබඳව සාකච්ඡාවක්‌ පක්‍ෂය තුළ තිබුණා. 2003-2006 වගේ කාල වලදී පෙරටුගාමී සමාජවාදී පක්‍ෂය ලෙස පෙළ ගැසුණු සමහරුන්ට ඔය වගේ ප්‍රශ්න තිබුණා. ඒ අය එම කාරණය පක්‍ෂය තුළ සාකච්ඡාවක්‌ බවටත් පත්කර තිබුණා. නමුත් ජනතා විමුක්‌ති පෙරමුණ විදියට සෝමවංශ සහෝදරයා කියන විධියේ ප්‍රශ්නයක්‌ නොමැති බව, අපේ පක්‍ෂයේ සහෝදරවරුන් ළඟින් ඇසුරු කරන අය දන්නවා.

අපි පන්සලකට ගියොත් යමක්‌ සාකච්ඡා කිරීමට, හාමුදුරුවන්ට වැඳල තමයි එම කටයුත්ත ආරම්භ කරන්නේ. අපි නැවත පිටත් වෙනකොට, හාමුදුරුවෝ අපේ අතේ පිරිත් නූලකුත් බැඳල තමයි පිටත් කරන්නේ. අපි කවදාවත් එය ප්‍රතික්‍ෂේප කරන්නේ නෑ. එම නිසා ඔය කියන කාරණා ගත්තොත් පිළිගන්න පුළුවන් තත්ත්වයක්‌ නෑ.

ප්‍රශ්නය - ඔබ සඳහන් කළා පිරිත් නූල් බැඳීම ප්‍රතික්‍ෂේප නොකරන බව. නමුත් සෝමවංශ මහතා සඳහන් කර තිබෙනවා. ජ.වි.පෙ නායකයන්ගේ අතේ පිරිත් නූල් බඳින කොට එය නොපෙනන ලෙස කැමරාවට පිටුපස හරවන බව.

පිළිතුර - සෝමවංශ සහෝදරයා එහෙම කරල තියනවද කියල මම දන්නේ නෑ. මම පෞද්ගලිකව ගත්තොත් කවදාවත් එහෙම කරල නෑ, මම, මගේ ගමට ගිය සෑම අවස්‌ථාවකදීම ගමේ පන්සලේ හාමුදුරුවනුත් හමුවෙනවා. ඒ වගේම ගමේ හින්දු කෝවිලේ පූජකතුමා සමඟ පොඩි කාලයේ සිටම කටයුතු කර තිබෙනවා. එම නිසා මේ රටේ පවතින ප්‍රධාන ආගම් අතර සහ ඒ හා බැඳුණු සහ නොබැඳුණු වෙනස්‌ සංස්‌කෘතික අංග ලක්‍ෂණ සමඟ අපි ගොඩක්‌ සමීපයි.

පසුගිය සිංහල දෙමළ අවුරුදු අවස්‌ථාවේදී එම චාරිත්‍ර වාරිත්‍ර අපගේ ගෙවල්වල සිද්ධ කළා. අපි අවුරුදු උත්සව වලට සහභාගි වනවා. යම් විදියකින් තිබෙන වැඩකටයුතු හෝ දේශපාලනයේ ඇතිවී තිබෙන සංකීර්ණතා නිසා සමහර අවස්‌ථාවක එහෙම දෙයක්‌ මගහැරගොස්‌ මිසක්‌, සෝමවංශ සහෝදරයා සඳහන් කරන තරමේ ප්‍රශ්නයක්‌ නොමැති බව පැහැදිලියි.

ඉදිරියට වෙසක්‌ සමය එළඹෙනවා. සමහර ප්‍රදේශවල තොරණ්‌ පවා ගැසීමට අපේ සහෝදරවරු මුල්වී කටයුතු කරනවා. වෙසක්‌ කූඩු තරග පැවැත්වීමට පවා මූලික දායකත්වය දී කටයුතු කරනවා. එම නිසා රටක සංස්‌කෘතියත් සමඟ දේශපාලනය සම්බන්ධ වෙලා යන්න ඕන කියන එක පිළිබඳව අපේ කිසිම විවාදයක්‌ නෑ.

එහෙම සංවාදයක්‌ ජනතා විමුක්‌ති පෙරමුණ තුළ ඇති කළා නම් ඇති කළේ පෙරටුගාමීන් නමින් පසුව සංවිධානය වූ අය අතරත් සිටින සුළු පිරිසක්‌ පමණයි. අපි ශ්‍රී ලාංකීය සංස්‌කෘතිය පදනම් කරගෙන දේශපාලනයට මූලිකත්වයදී තිබෙනවා මිස, ඊට පිටින් විශේෂ ස්‌වරූපයකින් අප කටයුතු කර නෑ.

ප්‍රශ්නය - ජනතා විමුක්‌ති පෙරමුණ මාක්‌ස්‌වාදය පදනම් කරගෙන කටයුතු කරන පක්‍ෂයක්‌ ලෙසයි හඳුන්වන්නේ. නමුත් සෝමවංශ අමරසිංහ මහතා ප්‍රකාශ කර තිබෙනවා. රෝහණ විඡේවීර මහතා ජනතා විමුක්‌ති පෙරමුණ ගොඩනැගුවේ එක දර්ශනයක්‌ පදනම් කරගෙන නොවන බව. සෝමවංශ මහතාගේ අදහස සමඟ ඔබ එකඟ වෙනවාද?

පිළිතුර - වාමාංශික නායකයන් අතරින් රෝහණ විඡේවීර සහෝදරයාට තිබෙන විශේෂත්වය තමයි, සමාජවාදය ගොඩනැගීම සඳහා ශ්‍රී ලාංකීය මාවතක්‌ තෝරාගැනීම, කම්කරු පංතිය කියන එකම මූලික කර ගත්තෙත් නෑ. අනිකුත් සමාජ බලවේග, රටේ පවතින සංස්‌කෘතීන් සමඟ සම්බන්ධ වෙලා තමයි දේශපාලනය රටට ගලපා ගත්තේම, එම නිසා රටේ අනිකුත් වාමාංශික ව්‍යාපාරයන්ට වඩා අපි වෙනසුත් වුණා. සමසමාජ පක්‍ෂය, කොමියුනිස්‌ට්‌ පක්‍ෂය, නව සමසමාජ පක්‍ෂය යන පක්‍ෂවලට වඩා අපේ පක්‍ෂයට විශේෂත්වයක්‌ තිබෙන්නේ සංස්‌කෘතිය සමඟ බද්ධ වී කටයුතු කරන නිසයි. එම නිසා අපේ පක්‍ෂයේ නායකයන්ට හෝ සාමාජිකයන්ට හෝ තහංචියක්‌ හෝ නියම කිරීමක්‌ තිබුණේ මේ මේ දේ වලට සම්බන්ධ විය යුතු හෝ නොවිය යුතුයි කියලා. ඒ අයට ස්‌වාධීන අයිතියක්‌ තිබුණා තමන්ගේ ආගම, තමන්ගේ ඇදහිලි, තමන්ගේ බලි තොවිල් ආදී දේවල් කර ගැනීම සඳහා.

අපේ සමහර සහෝදර සහෝදරියන් විවාහ වන කොට සිංහ කොඩිය දාලා තිබෙනවා. අපි ඒ දේවල් වලින් වෙන්වෙලා නෑ. පෙරටුගාමීන් ලෙස පෙළගැසුණු අය ඇති කළ සාකච්ඡාවෙන් ඇතිවූ මානසික බලපෑමක්‌ සෝමවංශ සහේදරයාට තියෙනවාද දන්නේ නෑ. එම සාකච්ඡාවෙන් ඇතිවූ බලපෑමක්‌ දැන් පක්‍ෂය තුළ නෑ.

ප්‍රශ්නය - ජනතා විමුක්‌ති පෙරමුණ ප්‍රකාශ කරන ආකාරයට ඔබලාගේ පක්‍ෂය කටයුතු කරන්නේ ද්‍රව්‍ය මූලික වනවා යන පදනමේ සිටයි (භෞතිකවාදය) නමුත් බුද්ධාගම පදනම් වී තිබෙන්නේ සිත මුල්වනවා යන කාරණය මත.

ඔබ සඳහන් කරන්නේ බුදුදහමේ සහ මාක්‌ස්‌වාදය අතර වෙනසක්‌ නොමැති බවද?

පිළිතුර - යම් යම් වෙනස්‌කම් තිබෙනවා. නමුත් යම්කිසි රටක පවතින සංස්‌කෘතිය සම්බන්ධ කර නොගෙන ඒ සංස්‌කෘතියත් සමඟ අනන්‍ය වෙමින් ගමන් නොකර යමක්‌ කරන්න පුළුවන් කියල ජනතා විමුක්‌ති පෙරමුණ පිළිගන්නේ නෑ. මගේ උප්පැන්න සහතිකයේ ආගම ලෙස සඳහන් වන්නේ බුද්ධාගම. නමුත් මම පක්‍ෂයේ කටයුතු කරගෙන යන ක්‍රියාවලියක සිටිනවා මිස, මගේ දින පොතේ පෝයට සිල් ගන්න යන්න ඕන කියල දාගෙන නෑ. නමුත් ඒකත් සමඟ මගේ ගැටුමකුත් නෑ. වෙන කිසිම වාමාංශික කියා ගන්නා පක්‍ෂයක නොමැති ආකාරයට ජනතා විමුක්‌ති පෙරමුණේ සමාජවාදී භික්‍ෂු සංවිධානය නමින් සංවිධානයකුත් තිබෙනවා.

අපේ මැයි පෙළපාළියට සමාජවාදී භික්‍ෂු සංගමය දායක වෙලා තිබෙනවා. අපේ සම්මේලන පවත්වද්දී භික්‍ෂූන්වහන්සේලා අති විශාල ප්‍රමාණයක්‌ සම්බන්ධ වෙලා තිබෙනවා.

එම නිසා මේක සමාජයේ නැති, සමාජය ප්‍රශ්න නොකරන සෝමවංශ සහෝදරයා විසින් තමා එළියට යැම සම්බන්ධයෙන් ඉදිරිපත් කිරීමට බරපතළ දේශපාලන කාරණයක්‌ නොමැති නිසා මෙම කාරණය අරගත්තද කියන එක තමයි මම හිතන්නේ.

ප්‍රශ්නය - ආගම ඇදහීම සම්බන්ධයෙන් ප්‍රශ්න ඇතිවිය හැකිය යන බිය නිසා ජනතාව, ජනතා විමුක්‌ති පෙරමුණට බලය ලබාදීමට බියවන බවකුත් සෝමවංශ මහතා ප්‍රකාශ කර තිබුණා.

ඒ පිළිබඳව ඔබගේ ස්‌ථාවරය කුමක්‌ද?

පිළිතුර - සෝමවංශ මහතාගෙන්ම තමයි ඒක අහන්න වෙන්නේ. එහෙම ප්‍රශ්නයක්‌ අපේ පක්‍ෂය තුළ නෑ.

ප්‍රශ්නය - සෝමවංශ අමරසිංහ මහතා පක්‍ෂයට සම්බන්ධ කර ගැනීම සඳහා සාකච්ඡා කරන බව ප්‍රකාශ වී තිබුණා. එම සාකච්ඡා සාර්ථකද?

පිළිතුර - එලෙස සාකච්ඡා කරන්නත් විශේෂත්වයක්‌ තිබෙනවා. මීට පෙර විමල් වීරවංශ මන්ත්‍රීතුමා ඇතුළු පිරිසක්‌ පක්‍ෂයෙන් එළියට බසින කොට ඒක අපට තේරුම් ගන්න පුළුවන්කම තිබුණා. ආණ්‌ඩුවට සම්බන්ධ වීම නොවීම පිළිබඳව පක්‍ෂ තුළ සාකච්ඡාවක්‌ තිබුණා.

එම අවස්‌ථාවේදී පක්‍ෂයේ බහුතර මතය හා එකඟ විය නොහැකි තත්ත්වයක්‌ විමල් වීරවංශ මන්ත්‍රීතුමා ඇතුළු පිරිසට තිබුණා. මූලික වශයෙන්ම ඒ මත පදනම්වෙලා තමයි ඔවුන්ට යන්න සිද්ධ වුණේ.

දැන් පෙරටුගාමී ලෙස සංවිධානය වී සිටින පිරිසත් පක්‍ෂය තුළ ආගම, සිරිත් විරිත් වගේ දේ පිළිබඳව කරපු සංවාදයක්‌ තිබුණා. එම සංවාදයට පක්‍ෂය එකඟ වූයේ නෑ. ඔවුන් වෙනම කණ්‌ඩායමක්‌ සාදාගෙන පක්‍ෂයේ බලය ඇල්ලීමේ ව්‍යාපාරයක්‌ ගෙන ගියා. එහි ප්‍රතිඵලයක්‌ ලෙස ඔවුන්ට පක්‍ෂයෙන් යන්න සිද්ධවූවා.

ඒ අනුව එම කණ්‌ඩායම් පක්‍ෂයෙන් ගියේ ඇයි කියන එක අපට පැහැදිලියි. නමුත් සෝමවංශ සහෝදරයා ගිය කාරණය අපට අපැහැදිලියි. හමුදා කුමන්ත්‍රණයක්‌ සම්බන්ධයෙන් මතුකරන ප්‍රශ්නය පවා පක්‍ෂයෙන් එළියට බහින්න තරම් කාරණයක්‌ද කියන එක අපට අපැහැදිලියි. ඔයිට වඩා බරපතල දේ සම්බන්ධයෙන් පක්‍ෂය තුළ පුළුල් ලෙස සාකච්ඡා කෙරී තිබෙනවා. එහිදී අප බහුතරයේ මතය මත තීන්දු තීරණ ගෙන තිබෙනවා. සමහර තීන්දු ඒකච්ඡන්දයෙන් සම්මත වී තිබෙනවා. නමුත් සෝමවංශ මහතා මතුකරන කාරණා පක්‍ෂයෙන් එළියට බසින්න තරම් කාරණාද කියන එක අපට දැනෙන්නේ නෑ. ඒ නිසාම තමයි මෙහි අපට අපැහැදිලි කමක්‌ තියෙන්නේ. එම අපැහැදිලිකම නිසාම තමයි ඒ සහෝදරයා මුණගැසෙමින් සම්බන්ධවෙමින් එය නිරාකරණය කර ගැනීම සඳහා උත්සාහයක්‌ දරන්නේ.

නිශ්චිත හේතු සාධකයක්‌ තිබ්බ නම් මෙවැනි පියවරක්‌ ගත් පසු පක්‍ෂය ගන්න ඕන තීරණ අරගෙන අවසන්. කාරණය අපැහැදිලි නිසාම තමයි සෝමවංශ සහෝදරයා මුණගැසෙමින්, දුරකථනයෙන් කතා කරමින් යම් උත්සාහයක්‌ දරන්නේ. මෙම තත්ත්වය නිරවුල් කර ගනිමින් සෝමවංශ සහෝදරයා පක්‍ෂයට සම්බන්ධ කර ගන්න. ඒ සහෝදරයටම පෞද්ගලික වෙච්ච, අපට තාමත් තේරුම් ගැනීමට අපහසු යමක්‌ මෙතන තිබෙනවා. අප එය තේරුම් ගැනීමට උත්සාහ දරනව. සෝමවංශ සහෝදරයා කියන දේ අසන බාහිර අයත් අපට කියනවා මේ කාරණා පක්‍ෂයෙන් ඉවත්වීමට තරම් බරපතළ කාරණාද කියන එක. එම නිසා අප පක්‍ෂයත් ලෙස තීරණයක්‌ ගත්තා සෝමවංශ සහෝදරයා කැමැති අය සමඟ කතා කරමින්, ඒ සංවාදය පවත්වාගෙන යමින් සහෝදරයා නැවත පක්‍ෂයට සම්බන්ධ කර ගන්න.

ප්‍රශ්නය - බැඳුම්කර නිකුත් කිරීම සම්බන්ධයෙන් මහ බැංකු අධිපතිවරයාට එරෙහිව එල්ල වූ චෝදනාව සම්බන්ධයෙන් සිදුකළ පරීක්‍ෂණයෙන් ඔහු නිර්දොaෂි බව ප්‍රකාශ කර තිබෙනවා.

එම තීන්දුව ජනතා විමුක්‌ති පෙරමුණ පිළිගන්නවාද?

පිළිතුර - මහ බැංකු අධිපතිවරයා සම්බන්ධ ප්‍රශ්නයේදී අපි ගත්ත ස්‌ථාවරය තමයි. ඒ සම්බන්ධයෙන් විනිවිද පෙනෙන යුක්‌ති සහගත ජනතාවට පිළිගත හැකි පරීක්‍ෂණයක්‌ සිදුකළ යුතු බව එය පත් කළ කමිටු පරීක්‍ෂණය පිළිබඳව නොවෙයි අපි සඳහන් කළේ. අපගේ ස්‌ථාවරය වූයේ අපරාධ පරීක්‍ෂණ දෙපාර්තමේන්තුව හරහා පර්යේෂණයක්‌ සිදුකළ යුතු බවයි. එහෙම පරීක්‍ෂණයක්‌ කෙරුණේ නෑ. එම නිසා කෙරිච්ච පර්යේෂණය පිළිබඳව අපි සෑහීමකට පත්වන්නේ නෑ.

අපි කියන්නේ මේක බරපතළ කාරණයක්‌. එම නිසා තමයි අපි කියන්නේ සමාජයට පිළිගන්න පුළුවන් පරීක්‍ෂණයක්‌ අපරාධ පරීක්‍ෂණ දෙපාර්තමේන්තුව මගින් සිදුකරන්න කියලා.



දැන් හරි එහෙම හිතෙනවා නම්  හොඳයි
- නන්දන ගුණතිලක

1989 න් පසුව ජනතා විමුක්‌ති පෙරමුණේ හිටපු අපට අත් දෙක උස්‌සල ආයුබෝවන් කියන්න, ඉගැන්වූයේ සෝමවංශ අමරසිංහ සහෝදරයා, මම පක්‍ෂයට සම්බන්ධ වූයේ, පක්‍ෂය තහනම් කරල තිබුණ කාලයේදී. එම කාලයේදී ආයුබෝවන් කිය කියා ඉන්න පුළුවන්කමක්‌ තිබුණේ නෑ. එම නිසා පක්‍ෂය එම කාරණා පිළිබඳව පක්‍ෂය තහංචි කිරීමට පෙර රෝහණ විඡේවීර සහෝදරයා කෙසේ කටයුතු කළා ද කියල මම දන්නේ නෑ.

ජනතා විමුක්‌ති පෙරමුණේ බහුතරයක්‌ සිටින්නේ සිංහල - බෞද්ධයන්. ඔවුන්ට එබඳු කාරණා අමුතුවෙන් උගන්වන්න අවශ්‍ය වන්නේ නෑ. ජනතා විමුක්‌ති පෙරමුණෙ සාමාජිකයන් භෞතිකවාදීන් විදියට පුරුදු පුහුණු කළාට, එම සම්ප්‍රදායයන් සම්පූර්ණයෙන්ම අත්හැරලා කටයුතු කරන්න බෑ.

එහෙත් ගෝත්‍රික විධියට කටයුතු කරන අයට එහෙම නෑ. ඔවුන් පක්‍ෂයෙන් ඉවත් වන සාමාජිකයන්ට එරෙහිව බොරු ප්‍රචාරයන් යවනවා. ඇණ ගහපු දෙකයි දෙකේ පොලුවලින්, අසූචි මිශ්‍ර කළු තෙල්වලින් පහර දෙනවා. ගෙවල්වලට පවා පහර දෙනවා. ඒ කාරණා ඔවුන්ට උගන්වලා ද කියන ප්‍රශ්නය තිබෙනවා. ඔවුන්ට තිබෙන්නේ ගෝත්‍රික ලක්‍ෂණ.

පසුගිය කාලයේ සිදු වූ එබඳු සිදුවීම්වලදී සෝමවංශ සහෝදරයත්a සිටියේ ඔවුන් සමග. එබඳු අවස්‌ථාවලදී ඔහු එක වචනයක්‌ කිව්වෙත් නෑ. ආගම සිහි වූයෙත් නෑ. නමුත් දැන් හරි එහෙම හිතෙනවා නම් හොඳයි.

මෙබඳු කාරණා නිගමනයක්‌ දීලා
අවසන් කරන්න පුළුවන් දෙයක්‌ නොවෙයි

- පුබුදු ජයගොඩ

පන්සල හෝ පල්ලියට යන එක අපි සලකන්නේ පෞද්ගලික කටයුත්තක්‌ විධියට. අද වන විට පන්සලට, පල්ලියට යන එක ඇදහිල්ලකට වඩා වතාවතක්‌ බවට පත් වී තිබෙනවා. පන්සිල් වැනි කාරණා පිළිබඳව බෞද්ධයන් තුළ පවා විවාද, මතවාද තිබෙනවා. අපි හිතනවා ගොඩක්‌ වතාවත් නිර්මාණය කරල තිබෙන්නේ තමන්ගේ සිත, චරිතය පාලනය කර ගැනීමට බැරි අය සඳහා කියලා. තමන්ගේ විධිය තමන්ට පාලනය කර ගන්න පුළුවන් නම් වතාවත් අවශ්‍ය වන්නේ නෑ.

අපි උදාහරණයක්‌ විධියට සොරකම් කිරීම අරගමු. තමන්ම සිතල සොරකම් කිරීමෙන් වැළකී සිටිනවා නම් අමුතුවෙන් සීලයක්‌ අවශ්‍ය වන්නේ නෑ.

මෙම සම්ප්‍රදායන් පිළිබඳව වාමාංශිකයන් තුළ ගොඩනැඟුණ සම්ප්‍රදායක්‌ තිබෙනවා. ඒවා එහෙමම කරන්න ඕනි කියලා අපි සිතන්නේ නෑ. ඒ පිළිබඳව අපි දැනට සංවාදයක නිරත වී සිටිනවා. මෙබඳු කාරණා නිගමනයක්‌ දීලා අවසන් කරන්න පුළුවන් දෙයක්‌ නොවෙයි.

එරික්‌ ගාමිණ ජිනප්‍රිය
ඡායාරූප - නිමල් දයාරත්න

 

 
Powered By -


සීමාසහිත උපාලි පුවත්පත් සමාගම
අංක 223, බ්ලූමැන්ඩල් පාර, කොළඹ 13, ශ්‍රී ලංකාව.